Úr aðalnámskrá tónlistarskóla:

Mennta- og menningarhlutverk tónlistarskóla er að

15. október 2004

Tónleikaröð kennara: Blásarakvintett og píanó

Fyrstu tónleikar vetrarins í Tónleikaröð kennara Tónlistarskóla Kópavogs verða haldnir í Salnum laugardaginn 23. október 2004 kl. 13.00. Þá koma fram Berglind María Tómasdóttir, sem leikur á þverflautu og piccoloflautu, Eydís Franzdóttir, óbóleikari, Ármann Helgason, klarínettleikari, Anna Sigurbjörnsdóttir, hornleikari, Kristín Mjöll Jakobsdóttir, fagottleikari, og Unnur Fadila Vilhelmsdóttir, píanóleikari.

Þetta er fimmta árið sem kennarar skólans halda tónleika í Salnum í samvinnu við Kópavogsbæ og er þess að vænta að framhald verði á starfseminni sem hefur mælst gífurlega vel fyrir og orðið kennurum hvatnig til dáða. Á þessum vettvangi hefur nemendum og aðstandendum þeirra gefist kostur á að hlusta á kennara skólans og kynnast þeim betur sem listamönnum en tónleikarnir eru annars opnir öllum.

Skólinn vill eindregið hvetja nemendur til að mæta á þessa tónleika, enda er aðgangur ókeypis fyrir þá og ekki spillir að sjá aðstandendur og velunnara skólans með í för. Góða skemmtun.

Efnisskrá

• Jacques Ibert (1890-1962): Trois pièces brèves
  • I. Allegro
  • II. Andante
  • III. Assai lent - Allegro scherzando
• Þorkell Sigurbjörnsson (f. 1938): Hræra

HLÉ

• György Ligeti (f. 1923): Sex bagatellur
  • I. Allegro con spirito
  • II. Rubato. Lamentoso
  • III. Allegro grazioso
  • IV. Presto ruvido
  • V. Béla Bartók in memorian. Adagio. Mesto
  • VI. Molto vivace. Capriccioso
• Francis Poulenc (1899-1963): Sextett fyrir blásarakvintett og píanó
  • I. Allegro vivace
  • II. Divertissement: Andantino
  • III. Finale: Prestissimo

Flytjendur

Berglind María Tómasdóttir, þverflauta og piccoloflauta
Eydís Franzdóttir, óbó
Ármann Helgason, klarínett
Anna Sigurbjörnsdóttir, horn
Kristín Mjöll Jakobsdóttir, fagott
Unnur Fadila Vilhelmsdóttir, píanó

Blásarakvintett er samsettur úr fjórum tréblásturhljóðfærum (þverflauta telst til tréblásturshljóðfæra þó hún hafi verið smíðuð úr málmi síðastliðin 150 ár) og horni sem telst til málmblásturshljóðfæra. Þessi hljóðfærasamsetning hefur verið afar vinsæl síðastliðin 100 ár eða svo og er dágott úrval af verkum til fyrir hana. Verkin á efnisskránni eru öll meðal helstu verka sem skrifuð hafa verið fyrir þessa hljóðfæraskipan, tvö þeirra eru frönsk, Ligeti er ungverskur og Þorkell einn af okkar ástsælustu tónskáldum.

Um tónskáldin og verkin

Franska tónskáldið Jacques Ibert lærði tónsmíðar við Tónlistarháskólann í París. Hann hlaut hin eftirsóttu Rómarverðlaun árið 1919 og markaði það upphaf að farsælum tónskáldarferli hans. Hann samdi fjölda verka; óperur, balletta, leikhús- og kvikmyndatónlist auk fjölda smærri kammerverka.

Trois pièces brèves (Þrjú stutt verk) eftir Jacques Ibert eru frá árinu 1930. Þetta eru léttar og leikandi tónsmíðar sem eru dæmigerðar fyrir tónskáldið.

Ungverska tónskáldið György Ligeti fæddist í Transylvaníu í Rúmeníu en foreldrar hans voru af ungversku bergi brotnir. Hann stundaði tónsmíðanám m.a. í Búdapest og bjó þar til ársins 1956 er hann fluttist til Vestur-Evrópu. Ligeti er meðal þekktustu núlifandi tónskálda og er mikilvægur hlekkur í tónlistarsögu 20. aldar. Þess má geta að tónlist hans gegnir stóru hlutverki í myndum Stanley Kubricks: 2001: A Space Odyssey, The Shining og Eyes Wide Shut.

Bagatellurnar sex eru frá árinu 1953 og eru byggðar á öðru verki tónskáldsins, Musica ricercata, fyrir píanó. Þetta eru sex smáverk og eru þau öll fremur einföld að gerð.

Þorkell Sigurbjörnsson stundaði nám í píanóleik við Tónlistarskólann í Reykjavík. Að loknu prófi hér heima fór Þorkell til Bandaríkjanna og stundaði framhaldsnám við Hamline-háskólann í St. Paul, Minnesota, þar sem hann lagði stund á tónsmíðar undir leiðsögn R.G. Harris. Að loknu B.A. prófi frá skólanum hélt Þorkell til frekara náms við Háskólann í Illinois, þar sem kennarar hans í tónsmíðum og raftónlist voru Kennteth Gaburo og Lejaren Hiller. Enn fremur sótti hann námskeið í tónsmíðum í Darmstadt og Nice. Þorkell er kennari í tónfræðum og tónsmíðum við Listaháskóla Íslands og Tónlistarskólann í Reykjavík.

Flestir þekkja eða hafa heyrt eitthvað af tónlist Þorkels, en fæstir gera sér þó grein fyrir því hve mikið framlag hans er til íslenskrar tónsköpunar. Auk þess að vera virkur sem tónskáld hefur Þorkell verið kennari allflestra íslenskra tónskálda og tónlistarmanna af yngri kynslóðinni. Á verkalista Þorkels kennir ýmissa grasa, enda er hann eitt afkastamesta tónskáld á Íslandi, þar má finna fjölda hljómsveitarverka, kammerverk fyrir flestar hugsanlegar samsetningar hljóðfæra, einleikskonserta, barnaóperu, kammeróperu, einleiksverk og raf- og tölvutónlist. Þorkell hefur einnig samið mikið fyrir kór bæði veraldlega og kirkjulega tónlist auk fjölda sönglaga.

Hræra (Scramble) var samin árið 1985 fyrir Blásarakvintett Reykjavíkur. Hún inniheldur íslensk þjóðlög sem tónskáldið hefur "hrært" saman.

Francis Poulenc (1899-1963) var franskur. Ungur sýndi hann mikla tónlistarhæfileika, bæði við píanóleik og tónsmíðar. Meðal fyrstu tónverka hans voru mjög flóknar prelúdíur fyrir píanó, þar sem sterkra áhrifa frá Debussy gætir, en Poulenc heillaðist mjög af honum. Poulenc samdi fjöldann allan af tónverkum sem hafa hlotið gífurlegar vinsældir bæði vegna þess hvað gaman er að spila verk hans og hlusta á þau flutt.

Francis Poulenc samdi Sextett fyrir píanó og blásarakvintett á áunum 1932-39. Verkið er án efa meðal vinsælustu verka fyrir þessa hljóðfæraskipan, enda frábærlega skrifað fyrir hljóðfærin. Það mætti í raun kalla Poulenc meistara fjörsins, því tónlist hans er full af glensi og gríni milli syngjandi fallegra laglína.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs og aðstandendur nemenda: 500 kr.
• Nemendur Tónlistarskóla Kópavogs: Frítt.
• 12 ára og yngri: Frítt
• Tilboðsverð: Allir fimm tónleikar starfsársins á 5.000 kr.

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

[ Til baka á Fréttir 2004 ]