Úr aðalnámskrá tónlistarskóla:

Mennta- og menningarhlutverk tónlistarskóla er að

16. desember 2005

Nýr semball vígður á tónleikum í Salnum á morgun

Á 40 ára afmæli Tónlistarskóla Kópavogs afhenti Gunnar Birgisson, þáverandi formaður bæjarráðs, skólanum gjafabréf frá bænum til kaupa á sembal sem verður sameign skólans og Salarins. Smíði hljóðfærisins er nú lokið og verður það vígt á TÍBRÁR tónleikum í Salnum á morgun, laugardaginn 17. desember, kl. 16.00 af Jory Vinikour, en hann er þekktur sem einn af fremstu semballeikurum sinnar kynslóðar.

Hljóðfærið, sem er af fransk-flæmskri gerð, var smíðað á vinnustofu Marc Ducornet í París. Myndin að ofan er tekin á vinnustofunni. Hljóðfærið hefur tvö hljómborð og spannar rúmar fimm áttundir, en slíkt hljóðfæri gefur möguleika á flutningi allra þeirra verka sem samin hafa verið fyrir sembal. Þessi gerð hefur því mikið notagildi og hefur verið valið af fjölmörgum tónleikasölum og hljómsveitum víða um heim, svo sem fílharmóníusveitum í Leningrad og Kiev, Japan, Finnlandi, Ítalíu og Bandaríkjunum, en einnig af fjölmörgum semballeikurum, tónlistarháskólum og öðrum stofnunum.

Jory Vinikour, sem vígir nýja sembalinn, er ekki ókunnur Salargestum, en hann kom síðst fram á TÍBRÁR tónleikum í Salnum ásamt Áshildi Haraldsdóttur flautuleikara í febrúar 2003 þegar þau saman fluttu allar flautusónötur J.S. Bachs á tvennum tónleikum sem síðar var útvarpað hér á landi og um alla Evrópu. Vinikour hefur nú í farteskinu glæsilega efnisskrá með verkum eftir William Byrd, John Bull, Johann Kaspar von Kerll, Harold Meltzer (nýtt verk), Jean Philippe Rameau og Domenico Scarlatti.

Nánari upplýsingar um flytjandann og efnisskrá er að finna á vef Salarins: www.salurinn.is

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika. Netsala á vef Salarins. 

[ Til baka á Fréttir 2005 ]