Úr aðalnámskrá tónlistarskóla:

Mennta- og menningarhlutverk tónlistarskóla er að

30. nóvember 2006

Tónleikaröð kennara: Sellóið á 20. öld - Selló og píanó

Um tónleikaröðina TKTK

Tónleikaröð kennara Tónlistarskóla Kópavogs var hleypt af stokkunum af Kópavogsbæ í samvinnu við kennara skólans og Salinn haustið 2000 og hefur reynst dýrmætt tæki til símenntunar. Hér er kennurum búinn ákjósanlegur vettvangur til að vinna að þeirri frumsköpun, sem er svo mikilvægur þáttur í þjálfun hvers tónlistarmanns og um leið í starfi kennarans. Fimm tónleikar eru áformaðir í TKTK röðinni á starfsárinu, þar sem kennarar Tónlistarskóla Kópavogs kveða sér hljóðs. Á þessum vettvangi gefst nemendum og aðstandendum þeirra kostur á að hlusta á kennara skólans og kynnast þeim betur sem listamönnum, en tónleikarnir eru annars opnir öllum. Tónleikarnir eru klukkustundar langir án hlés.

Efnisskrá

• Claude Debussy
  Sónata fyrir selló og píanó (1915)
    Prologue
    Sérénade
    FinaleI
   
• Jón Nordal 
  Myndir á þili (1992)
    Brostin augu vatnanna
    Þegar íshjartað slær
    Skrifað í vindinn
    Allt með sykri og rjóma
   
• Dimitri Shostakovich
  Sónata fyrir selló og píanó op.40 (1934)
    Allegro non troppo
    Allegro
    Largo
    Allegro

Um flytjendur

Sigurður Bjarki Gunnarsson sellóleikari lauk einleikaraprófi frá Tónlistarskólanum í Reykjavík árið 1995 undir handleiðslu Gunnars Kvaran. Sigurður lauk Bachelors-prófi frá Manhattan School of Music árið 1998 þar sem kennari hans var David Soyer og Masters-prófi frá Juilliard-skólanum í New York árið 2000 sem nemandi Harvey Shapiro. Auk þess að starfa í Sinfóníuhljómsveit Íslands hefur Sigurður Bjarki komið fram með Kammersveit Reykjavíkur, Caput-hópnum, Tríói Reykjavíkur og Kasa-hópnum. Sigurður hefur einnig komið fram á sumartónleikum í Skálholti auk þess að taka þátt í sumartónleikum á Kirkjubæjarklaustri og tónlistarhátíðinni í Mývatnssveit. Sigurður Bjarki kennir við Tónlistarskólann í Reykjavík, Tónlistarskóla Kópavogs og Tónmenntaskóla Reykjavíkur.

Nína Margrét Grímsdóttir píanóleikari lauk einleikaraprófi frá Tónlistarskólanum í Reykjavík árið 1985 og stúdentsprófi frá Menntaskólanum við Hamrahlíð 1984. Hún hefur komið fram á fjölda einleiks- og kammertónleika á Íslandi, í Evrópu, í þrettán fylkjum Ameríku og fimm ríkjum Kanada og Japan. Fjölmargir þessara tónleika hafa verið haldnir í alþjóðlegum stórborgum á borð við New York, Washington D.C., Seattle, París, London, Tokyo, Toronto, Vancouver, Calgary og Kaupmannahöfn. Ennfremur má nefna þátttöku í tónlistarhátíðum og kennslu á tónlistarnámskeiðum, tónlistarflutning í sjónvarpi og útvarpi innanlands og erlendis, m.a. í ABC Classic FM í Ástralíu, WNYC, WPKT, WWFM og NPR í Bandaríkjunum, CBC Radio í Kanada, Kulturradio hr2 í Þýskalandi, Sveriges Radio í Svíþjóð, Danmarks National Radio í Danmörku og Faroese National Radio í Færeyjum. Nína Margrét hefur leikið einleik með ýmsum hljómsveitum m.a. Kammersveit Reykjavíkur og Royal Chamber Orchestra í Tokyo. Hún hefur einnig starfað með ýmsum kammerhópum t.a.m. KaSa hópnum, Blásarakvintett Reykjavíkur, Nomos Duo og Íslenska Tríóinu.

Nína Margrét hefur hljóðritað þrjá geisladiska fyrir BIS, NAXOS Classical og Skref sem allir hafa hlotið frábæra dóma í innlendum og erlendum fagtímaritum, m.a. í Gramophone, BBC Music Magazine, High Fidelity, Fanfare og American Record Guide. Hún hefur yfir tuttugu ára kennslureynslu í píanóleik og kammertónlist, og starfaði m.a. við Bloomingdale tónlistarskólann í New York í fimm ár. Hún er nú deildarstjóri við Tónlistarskóla Kópavogs, prófdómari fyrir Prófanefnd tónlistarskóla og kennir á námskeiðum fyrir píanónemendur Listaháskóla Íslands og við Tónlistarskólann í Reykjavík. Nína Margrét er ennfremur höfundur fyrstu rannsóknarritgerðar um íslenska píanótónlist: "Icelandic Piano Music - History and Development" (Department of Music, City University, London, 1989) og "Recognizing the value of music as an emotional and cognitive stimulus" (City University, London, 1989). Úrdrættir þessara ritgerða birtust í Morgunblaðinu 1998, í Ný Menntamál 1991, í Ríkisútvarpinu 1991 og í Íslensk píanótónlist 1992. Nína Margrét lauk LGSM performance diploma 1988 frá Guildhall School of Music and Drama í London, MA music performance gráðu frá City University of London 1989 og Professional Studies post-graduate diploma frá Mannes College of Music í New York 1993. Meðal kennara hennar má nefna Agustin Anievas, Diane Walsh, Philip Jenkins og Halldór Haraldsson.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

Nína Margrét 
Grímsdóttir

Sigurður Bjarki 
Gunnarsson