Úr aðalnámskrá tónlistarskóla:

Mennta- og menningarhlutverk tónlistarskóla er að

23. nóvember 2005

Tónleikaröð kennara: Kennt og numið

Aðrir tónleikar vetrarins í Tónleikaröð kennara Tónlistarskóla Kópavogs verða haldnir í Salnum laugardaginn 3. desember næstkomandi kl. 13:00. Flytjendur eru Guðrún Birgisdóttir flautuleikari og Kristinn Árnason gítarleikari ásamt leynigesti. Auk þess munu nemendur Tónlistarskólans koma fram á tónleikunum. Á efnisskrá eru verk eftir Praetorius, Pachelbel, J.S. Bach, Paganini og Harald Vigni Sveinbjörnsson. Tónleikunum lýkur með flutningi aðventulaga fyrir flautu og gítar.

Efnisskrá

• Michael Praetorius (1511-1621)
  Ballet og La Volta
  
• Johann Pachelbel (1635-1706) 
  Bill Holmboe útsetti fyrir flautuhljómsveit
  Kanon
  
• Johann Sebastian Bach (1685-1750)
  Jean Maurice Mourat útsetti fyrir flautu og gítar
  Sónata í C-dúr
  1. Andante-presto
  2. Allegro
  3. Adagio
  4. Menuetto I & II
  
• Nicolai Paganini (1782-1840)
  Jean Maurice Mourat útsetti fyrir flautu og gítar
  Sonata I úr Centon di sonate
  1. Larghetto
  2. Allegro maestoso
  3. Allegro
  
• Haraldur Vignir Sveinbjörnsson
  Dútl fyrir flautur, gítara og rafhljóð
  
• Aðventulög með nemendum á flautu og gítar

Flytjendur

Guðrún Birgisdóttir stundaði nám í flautuleik við Tónlistarskólann í Reykjavík hjá Jóni H. Sigurbjörnssyni og Manuelu Wiesler og menntaðist svo áfram við Musikkhögskolen i Oslo og í Frakklandi. Að loknum prófum frá Ecole Normale de Musique í París (m.a. Diplome d´éxécution í flautuleik og Diplome superieur í kammermúsík) stundaði hún framhaldsnám í einkatímum í þrjú ár með styrk frá franska ríkinu. Hún hóf svo störf á Íslandi árið 1982 sem "freelance" flautuleikari og sem kennari við Tónlistarskóla Kópavogs og er svo enn. Hún er nú deildarstjóri við skólann og hefur útskrifað nemendur en kennir á öllum stigum námsins.

Kristinn Árnason lauk burtfararprófi frá Tónskóla Sigursveins D. Kristinssonar árið 1983. Hann stundaði framhaldsnám í Bandaríkjunum, Bretlandi og á Spáni. Hann hefur komið fram á mörgum tónleikum hérlendis sem erlendis, gert upptökur fyrir hljóðvarp og sjónvarp og leikið inn á marga hljómdiska þ.á m. fjóra einleiksgítardiska. Hann hefur hlotið Íslensku tónlistarverðlaunin, verið tilnefndur til Menningarverðlauna DV, og fengið starfslaun listamanna.

Haraldur Vignir Sveinbjörnsson lauk burtfararprófi í píanóleik frá Tónlistarskóla Kópavogs árið 1997, tónsmíðanámi frá tónfræðibraut Tónlistarskólans í Reykjavík árið 2001 og MA-námi í tónsmíðum frá Tónlistarháskólanum í Malmö, Svíþjóð árið 2004. Haraldur hefur komið víða við í tónlistarlífinu í gegnum tíðina og samið allt frá framsækinni rokktónlist til hefðbundinna tónsmíða.

Um tónskáldin og verkin

Praetorius var organisti og kantor við ýmsar kirkjur í Norður-Þýskalandi, m.a. Dresden. Líf hans spannar lok endurreisnartímans og upphaf barokks. Lögin eru úr safni dansa sem hann kallaði Terpsichore og var gefið fyrst út árið 1612. Praetorius samdi jöfnum höndum veraldlega danstónlist, orgelverk og verk fyrir kór, bæði veraldleg og trúarleg. (ká)

Canon, Kanón (á grísku regla) eða keðjusöngur eftir þýska tónskáldið og organistann Johann Pachelbel var saminn árið 1690 og er heillandi viðfangsefni fyrir unga samspilsnemendur, en þetta verk hefur verið gefið út og leikið í óteljandi útgáfum. Það er grunnbassastefið sem setur tóninn í byrjun og ljær verkinu dáleiðandi eiginleika þegar það kemur aftur og aftur en efri raddirnar tínast inn ein og ein og vefurinn þykknar en einfaldast svo aftur fyrir lokin. (gb)

Sónöturnar sex fyrir flautu og sembal eignaðar J.S. Bach eru meðal ástsælustu verka flautunnar og þegar ég hóf nám voru þær með fyrstu nótnaheftunum sem ég eignaðist. Á þeima tíma var t.d. algengt að kenna krökkum einfalda og tvöfalda tungutækni með 2. kaflanum í C-dúr sónötunni Ég lærði að stauta mig í gegnum þessa frábæru tónlist líkt og börn í Íslandi urðu fyrr á öldum læs á Biblíuna. Fullvíst þykir í dag að Adagio þátturinn í þessari sónötu sé allur eftir Johann Sebastian en margt annað í verkinu er álitið eftir Carl Philip son hans. Getum hefur verið leitt að því að Bach heimilið hafi verið nokkurs konar tónsmíðaverkstæði þar sem stef og útsetningar gengu stundum frjálslega milli manna. (gb)

Paganini er frægastur fyrir fiðlusnilli sína og fiðluverk. Sjaldnar er talað um það að hann lenti í vandræðum með sig á unglingsárunum vegna spila- og drykkjufíknar, kannski var það frægðin sem spillti honum. Ónefnd gæðakona er sögð hafa tekið hann til sín og hjálpað honum að ná sér og undir hennar vernd æfði hann sig og samdi sónötur og kvartetta. Sónata I er úr Centone di sonate fyrir fiðlu og gítar frá þessu tímabili. Þetta er því æskuverk en Paganini var gítar- og madólínleikari auk þeirra meistarataka sem hann hafði á fiðlunni. (gb)

Verkið Dútl er samstarfsverkefni Haraldar, Guðrúnar og Kristins. Öll hljóð í rafhluta verksins eru upphaflega spiluð af Guðrúnu og Kristni, en ganga svo í gegnum ýmsar "lagfæringar" í tölvu Tónvers TK. (hvs)

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

[ Til baka á Forsíðu ]