Úr aðalnámskrá tónlistarskóla:

Mennta- og menningarhlutverk tónlistarskóla er að

9. apríl 2007

Tónleikaröð kennara: Austur og vestur

Um tónleikaröðina TKTK

Tónleikaröð kennara Tónlistarskóla Kópavogs var hleypt af stokkunum af Kópavogsbæ í samvinnu við kennara skólans og Salinn haustið 2000 og hefur reynst dýrmætt tæki til símenntunar. Hér er kennurum búinn ákjósanlegur vettvangur til að vinna að þeirri frumsköpun, sem er svo mikilvægur þáttur í þjálfun hvers tónlistarmanns og um leið í starfi kennarans. Fimm tónleikar eru áformaðir í TKTK röðinni á starfsárinu, þar sem kennarar Tónlistarskóla Kópavogs kveða sér hljóðs. Á þessum vettvangi gefst nemendum og aðstandendum þeirra kostur á að hlusta á kennara skólans og kynnast þeim betur sem listamönnum, en tónleikarnir eru annars opnir öllum. Tónleikarnir eru klukkustundar langir án hlés.

Efnisskrá

• Oliver Kentish
  Toccata fyrir óbó, klarinett, fiðlu, víólu og kontrabassa
  frumflutningur
  
• William Sydeman
  Dúó fyrir klarinett og kontrabassa
    Adagio, Allegro, Adagio
    Vivace
    Adagio
    Somber and sad
    Allegro molto
   
• Reinhold Gliere
  Dúó fyrir fiðlu og kontrabassa
    Prelude
    Gavotte
    Wiegenlied
    Intermezzo
    Scherzo
   
• Sergei Prokofiev
  Kvintett fyrir óbó, klarinett, fiðlu, víólu og kontrabassa (1924)
    Tema con variazione
    Andante energico
    Allegro sostenuto ma con brio
    Adagio pesante
    Allegro precipitato, ma non troppo presto
    Andantino

Um verk og höfunda

Toccata eftir Oliver Kentish var upphaflega samið fyrir strengjasveit og frumflutt í maí 2005. Útgáfa fyrir óbó, klarinett, fiðlu, víólu og kontrabassa var gerð að tilstuðlan Þóris Jóhannessonar, kontrabassaleikara. Vegna nýrrar hljóðfæraskipunar voru gerðar ýmsar breytingar á verkinu og því er hér í reynd um að ræða nýtt verk, en ekki bara umritun, sem nú er flutt.

Reinhold Gliere fæddist í Kiev 1875. Hann lærði tónsmíðar í konseratoríinu í Moskvu en átti sjálfur eftir að kenna tónskáldum eins og Prokofiev og Khachaturian. Eftir hann liggja meira en hundrað verk m.a. þrjár sinfóníur, sex óperur, hljómsveitarverk ýmis konar o.fl. Hann samdi líka þrjú verk fyrir kontrabassa og píanó sem eru í miklum metum hjá bassaleikurum í dag. Verkið á efnisskránni er upphaflega samið fyrir selló og fiðlu og þá í átta köflum. Frank Proto hefur tekið fimm kafla og umskrifað þá fyrir fiðlu og kontrabassa.

William Sydeman er bandarískt tónskáld sem fæddist árið 1928 í New York. Hann hefur komið víða við, numið heimspeki og trúarbrögð um víða veröld og kenndi um tíma við Rudolf Steiner skóla sem hann hefur tryggð við. Frá honum hafa verið pöntuð verk t.d. frá sinfóníuhljómsveit Boston, kammerklubb Lincoln Centre og og fleirum. Tónlist Sydemans hefur þróast úr því að vera atónal, raðtækni yfir í "aðgengilegri" en engu að síður margslungin sem áður. Eftir hann liggja næstum 200 fyrir hin ýmsu hljóðfærasamsetningar söngvara, og kóra.

Sergei Prokofiev var fæddur í Úkraínu 1891 og lést í Moskvu 1953. Kvintettinn op. 39 er skrifaður fyrir óvenjulega hljóðfærasamsetningu, óbó, klarinett, fiðlu, víólu og kontrabassa og kom hugmyndin að þessari hljóðfæraskipan frá balletthópnum Russian émigre árið 1924, en upphaflega var tónlistin samin fyrir ballettinn Trapeze. Verkið var frumflutt í Moskvu 1927.

Um flytjendur

Þórir Jóhannsson lauk burtfararprófi frá Tónlistarskólanum í Reykjavík og síðar Postgraduate Diploma frá the Royal Northern College of Music í Manchester. Hann er fastráðinn við Sinfóníuhljómsveit Íslands jafnframt sem hann kennir í Tónlistarskóla Kópavogs og er virkur í kammertónlistarlífi. Hann hefur frumflutt tvö einleiksverk sem voru samin sérstaklega fyrir hann, "Gradus ad Profundum" eftir Karólínu Eiríksdóttur og "Bagatelle" eftir Óliver Kentish. Árið 2006 kom hann fram sem einleikari fyrir hönd Félags íslenskra tónlistarmanna á ársfundi Nordisk Solistråd í Osló.

Guðrún Þórarinsdóttir lauk burtfararprófi á víólu við Tónlistarskólann á Akureyri 1981 og hóf síðan nám við Tónlistarskólann í Reykjavík. Þaðan útskrifaðist hún sem fiðlukennari 1983 og lauk einleikaraprófi á víólu ári síðar. Hún stundaði síðan framhaldsnám við Tónlistarháskólans í Aachen í Þýskalandi, auk þess sem hún kenndi á fiðlu og víólu við "Musikschule der Stadt Bonn". Guðrún hefur leikið með hljómsveitum bæði erlendis og á Íslandi, auk þess að spila kammertónlist. Hún kenndi við Tónlistarskólann á Akureyri 1987-1997 og hefur spilað með Sinfóníuhljómsveit Norðurlands frá stofnun hennar. Hún er nú fastráðin við Sinfóníuhljómsveit Íslands og kennir við Tónlistarskóla Kópavogs.

Hlíf Sigurjónsdóttir lauk einleikaraprófi frá Tónlistarskólanum í Reykjavík hjá Birni Ólafssyni. Hún stundaði framhaldsnám vestan hafs, hjá Franco Gulli við Háskólann í Indiana, hjá Lorand Fenyves í Toronto og var styrkþegi í nokkur ár við hið þekkta listasetur í Banff í Kanada. Hlíf kynntist og vann með mörgum merkustu hljóðfæraleikurum síðustu aldar, þar á meðal William Primrose, Zoltan Szekely, Gyorgy Sebok, Rucciero Ricci og Igor Oistrach. Frá Ameríku lá leið Hlífar til Evrópu og var hún um skeið fastráðin hjá Kammersveitinni í Zürich. Á árunum 1999 til 2002 sótti hún tíma hjá Gerald Beal í New York, en hann var fyrrum nemandi Jascha Heifetz.

Hlíf hefur frumflutt mörg tónverk, þar á meðal verk sérstaklega samin fyrir hana. Hún er eftirsóttur kennari, hefur haldið námskeið hérlendis og á Spáni og kennir einkanemum í New York borg og Reykjavík. Helstu tónleikar liðinna ára voru í Weill sal Carnegie Hall og í Washington borg, í röðinni The Embassy Series.

Eydís Franzdóttir óbóleikari lauk burtfararprófi frá Tónlistarskólanum í Reykjavík 1987 og stundaði framhaldsnám í London. Hún lék um skeið með samevrópsku hljómsveitinni Acadya, en var svo ráðin 1. óbóleikari tékknesku útvarpshljóm-sveitarinnar í Pilzen 1992 þar sem hún lék um tveggja ára skeið. Eydís hefur komið fram sem einleikari, með kammerhópum og hljómsveitum víða um Evrópu, Norður-Ameríku og á Íslandi. Hún er m.a. meðlimur í Caput-hópnum, skipuleggjandi og óbóleikari Poulenc-hópsins og kennari við Tónlistarskóla Kópavogs.

Rúnar Óskarsson lauk einleikara- og kennaraprófi frá Tónlistarskólanum í Reykjavík vorið 1993. Þaðan lá leiðin til Amsterdam þar sem Rúnar lauk prófum með láði á klarínettu og bassaklarínettu frá Sweelinck tónlistarháskólanum. Eftir heimkomu 2001 hefur Rúnar leikið m.a. með Kammersveit Reykjavíkur, Caput, Atón, hljómsveit Íslensku Óperunnar og fleirum. Rúnar hefur gefið út þrjá geisladiska með íslenskri og erlendri klarínettutónlist og var geisladiskur hans Monologues-Dialogues tilnefndur til íslensku tónlistarverðlaunanna á síðasta ári. Hann er nú fastráðinn við Sinfóníuhljómsveit Íslands, kennir við Tónlistarskóla Kópavogs og Tónlistarskóla Hafnarfjarðar auk þess að stjórna Lúðrasveitinni Svani í Reykjavík.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.