Úr aðalnámskrá tónlistarskóla:

Mennta- og menningarhlutverk tónlistarskóla er að

30. mars 2004

Velheppnuð ferð strengjasveitar til Færeyja

Strengjasveit skólans, skipuð nemendum á aldrinum 12-17 ára, kom í gær heim úr stuttri tónleikaferð til Klakksvíkur og Þórshafnar í Færeyjum. Með í för voru einnig tveir þverflautunemendur, þær Hlín Finnsdóttir og Soffía Sigurðardóttir. Ferðin, sem var skipulögð í samstarfi við tónlistarskólana í Klakksvík og Þórshöfn, tókst einstaklega vel, Hópurinn hélt til Færeyja föstudaginn 26. mars og var fyrst farið til Klakksvíkur, þar sem gist var á einkaheimilum í tvær nætur. Haldnir voru tónleikar í Christianskirkjunni í Klakksvík laugardaginn 27. mars og var aðsókn mjög góð. Að morgni sunnudags lá leiðin til Þórshafnar og þann dag voru haldnir tónleikar í Norðurlandahúsinu. Þeir tónleikar voru einnig vel sóttir.

Á efnisskrá beggja tónleikanna voru einleiks- og samleiksverk, auk tónverka fyrir strengjasveit. Hlín Finnsdóttir og Páll Palomares léku einleik á þverflautu og fiðlu og Skúli Þór Jónasson, sellóleikari, Viktor Orri Árnason, fiðluleikari, Soffía Sigurðardóttir, þverflautuleikari, og Páll Palomares, fiðluleikari, léku hvert um sig ásamt Sólveigu Önnu Jónsdóttur, píanóleikara. Í Klakksvík tóku ungir heimamenn þátt í flutningi strengjasveitarinnar og léku á leikföng í Leikfangasinfóníu Leopolds Mozarts og ungur færeyskur fiðluleikari lék með í hluta efnisskrárinnar. Á tónleikunum í Norðurlandahúsinu léku strengjasveitir Tónlistarskóla Kópavogs og tónlistarskólans í Þórshöfn saman "Veturinn" úr Árstíðunum eftir Vivaldi og fyrsta þátt úr "Eine kleine Nachtmusik" eftir W. A. Mozart.

Hópurinn fékk alls staðar höfðinglegar móttökur og tókst þetta samstarfsverkefni Tónlistarskóla Kópavogs og tónlistarskólanna í Klakksvík og Þórshöfn einstaklega vel. 

[ Til baka á Fréttir 2004 ]