Úr aðalnámskrá tónlistarskóla:

Mennta- og menningarhlutverk tónlistarskóla er að

29. apríl 2004

Söngdeild flytur gamanóperuna Amelía fer á ball

Flytjendur

Söguþráður

Sagan gerist í íbúð Amelíu í Mílanó á öndverðri tuttugustu öld. Í upphafi verksins er Amelía með hjálp þerna að búa sig til að fara á ball ásamt eiginmanni sínum og vinkonu. Þegar Amelía er loks tilbúin kemur eiginmaður hennar askvaðandi með ástarbréf sem hann hefur fundið í fórum hennar og vill vita hver elskhugi hennar sé. Amelía kannast fyrst ekki við neitt en fellst síðan á að segja honum það ef hann komi með sér á ballið. Það verður að samkomulagi, en eftir að Amelía hefur sagt honum að ástmaðurinn búi á hæðinni fyrir ofan þau, ákveður eiginmaðurinn að myrða keppinautinn. Amelía óttast nú að hún muni missa af glæsilegasta balli ársins! Eftir nokkra umhugsun fer hún út á svalir og aðvarar elskhugann sem kemur niður á reipi. Amelía hvetur hann til að flýja, en hann vill að hún fylgi sér og verður sár þegar hún vill fresta því til að missa ekki af ballinu. En brátt birtist eiginmaðurinn aftur og ástmaðurinn felur sig undir sófa. Eftir að hafa séð reipið á svölunum uppgötvar eiginmaðurinn felustaðinn, miðar byssu á elskhugann, en skotið hleypur ekki úr henni. Það kemur til handalögmála og eftir að elskhuginn hefur nánast yfirbugað eiginmanninn stillist leikurinn og þeir fara að ræða um framhjáhald og réttmæti þess. Ástmaðurinn syngur ástríðufulla aríu um tilfinningar sínar og á eftir sameinast þau í þrísöng um siðferði. Eiginmaðurinn lítilsvirðir hina ballsjúku Amelíu og loks missir hún þolinmæðina og rotar hann. Hún örvilnast svo, hrópar á hjálp og nokkrir vegfarendur og lögreglustjórinn birtast. Amelía segir að elskhuginn sé innbrjótsþjófur sem rotað hafi eiginmanninn. Lögreglustjórinn sendir ástmanninn í fangelsi og eiginmanninn á sjúkrahús og Amelía tekur síðan feginsamlega boði lögreglustjórans um að fylgja henni á ballið.

Um höfundinn

Gian Carlo Menotti fæddist árið 1911 í Cadegliano á Ítalíu. Sjö ára gamal hóf hann að semja sönglög undir handleiðslu móður sinnar og árið 1923 varð hann nemandi við Verdi-tónlistarskólann í Mílanó. Menotti fluttist ásamt móður sinni til Ameríku eftir lát föðurins og þar lærði hann tónsmíðar hjá Rosario Scalero við Curtis-tónlistarskólann í Fíladelfíu.

Gamanóperan og einþáttungurinn Amelía fer á ball, sem er fyrsta fullmótaða ópera Menottis, var frumsýnd árið 1937 við svo mikinn fögnuð að upp frá því varð ferill hans í óperuheiminum samfelld sigurganga. Menotti semur sjálfur texta við óperur sínar. Nemendur Tónlistarskóla Kópavogs hafa áður flutt óperu eftir hann.

[ Til baka á Fréttir 2004 ]