Úr aðalnámskrá tónlistarskóla:

Mennta- og menningarhlutverk tónlistarskóla er að

14. nóvember 2004

Tónleikaröð kennara: Plokkað og blásið

Aðrir tónleikar vetrarins í Tónleikaröð kennara Tónlistarskóla Kópavogs verða haldnir í Salnum laugardaginn 20. nóvember 2004 kl. 13.00. Þá koma fram Kristinn Árnason og Hannes Guðrúnarson gítarleikarar, Guðrún Birgisdóttir flautuleikari og Elísabet Waage hörpuleikari. Á efnisskránni eru verk fyrir flautu, gítar og hörpu eftir Leo Brouwer, Agustin Barrios Mangore, Ferdinando Carulli, Vincent Persichetti, Jurriaan Andriessen, Manuel de Falla og Astor Piazzolla. Einnig taka nemendur úr Tónlistarskóla Kópavogs þátt í flutningi þriggja laga fyrir gítar, hörpu og þverflautu.

Efnisskrá

• Þjóðlag frá Paraguay: El Pajaro Campana fyrir plokk og blástur (Bjöllufuglinn)
  
• Leo Brouwer (f. 1939):
  Danza del Altiplano fyrir einleiksgítar
  Danza Caracteristica
  
• Agustin Barrios Mangore (1885-1944):
  Danza Paraguaya fyrir 2 gítara
  
• Ferdinando Carulli (1770-1841):
  Largo fyrir 2 gítara
  Rondo-Allegretto poco
  
• Vincent Persichetti (1915-1987)
  Serenade nr. 10 op. 79 fyrir flautu og hörpu
  1. Larghetto
  2. Allegro comodo
  3. Andante grazioso
  4. Andante cantabile
  5. Allegretto
  6. Scherzando
  7. Adagietto
  8. Vivo
  
• Jurriaan Andriessen (f. 1925)
  Ballade fyrir gítar og hörpu
  (frumflutningur á Íslandi)
  
• Manuel de Falla (1876-1946) (úts. David Watkins)
  Danse du Corregidor fyrir einleikshörpu
  
• Astor Piazzolla (1921-1992)
  Café 1930 fyrir gítar og þverflautu
  
• Þrjú lög fyrir gítar, hörpu og þverflautu 
  Fræ í frosti sefur - Franskt lag
  Ljósið kemur langt og mjótt - Íslenskt þjóðlag
  Snæfinnur Snjókarl - Steve Nelson/Jackie Rollins
  
  Nemendur úr Tónlistarskóla Kópavogs taka þátt í flutningnum

Flytjendur

Flytjendur eru öll kennarar við Tónlistarskóla Kópavogs og hafa samhliða kennslu haslað sér völl sem tónlistarmenn.

Guðrún Birgisdóttir lærði á flautu í Reykjavík, Osló og París. Hún hefur verið flautukennari við Tónlistaskóla Kópavogs síðastliðin tuttugu og tvö ár og er nú deildarstjóri við skólann en í upphafi vann hún einnig við kennslu tónfræðagreina. Hún hefur tekið þátt í tónlistarlífinu hérlendis með margvíslegum hætti, gert upptökur og gefið út diska, frumflutt flautuverk, lagt barokk-hreyfingunni lið með traversóleik, unnið í "Tónlist fyrir alla" frá upphafi og komið fram á margvíslegum kammertónleikum og einleikstónleikum erlendis og hér heima.

Elísabet Waage stundaði nám í píanó- og hörpuleik við Tónlistarskólann í Reykjavík og lauk píanókennaraprófi þar 1982. Þá hélt hún til Hollands og stundaði framhaldsnám í hörpuleik við Konunglega Tónlistarháskólann í den Haag. Að loknu námi bjó og starfaði Elísabet í Hollandi. Hún var þó tíður gestur hér á landi og hélt tónleika í báðum löndum, auk margra annarra Evrópulanda. Hún hefur spilað í kammermúsíkhópum s.s. Kammersveit Reykjavíkur., CAPUT-hópnum og verið gestur Cikada í Noregi. Eins hefur hún leikið í ýmsum Sinfóníuhljómsveitum, m.a. Sinfóníuhljómsveit Íslands og Noord-Nederlands Orkest í Hollandi, og komið fram sem einleikari. Elísabet hefur gert upptökur fyrir útvarp og sjónvarp og leikið inn á geisladiska. Sá nýjasti er með Gunnari Kvaran sellóleikara og kom út í september. Elísabet Waage hefur verið hörpukennari við Tónlistarskóla Kópavogs síðan haustið 2002.

Kristinn Árnason lauk burtfararprófi frá Tónskóla Sigursveins D. Kristinssonar árið 1983. Hann stundaði framhaldsnám í Bandaríkjunum, Bretlandi og á Spáni. Hann hefur komið fram á mörgum tónleikum hérlendis sem erlendis, gert upptökur fyrir hljóðvarp og sjónvarp og leikið inn á marga hljómdiska þ.á m. fjóra einleiksgítardiska. Hann hefur hlotið Íslensku tónlistarverðlaunin, verið tilnefndur til Menningarverðlauna DV, og fengið starfslaun listamanna.

Hannes Guðrúnarson lauk burtfararprófi frá Tónskóla Sigursveins D. Kristinssonar vorið 1993. Hann stundaði framhaldsnám við Tónlistarháskólann í Bergen á árunum 1993-1997 og starfaði jafnframt sem kennari og tónlistarmaður í Vestur-Noregi á þeim árum. Hannes flutti til Akureyrar haustið 1997 og kenndi þar til ársins 2002 ásamt því að vera virkur tónlistarmaður. Hannes lék einleikstónleika í Salnum í Kópavogi haustið 2003.

Um tónskáldin og verkin

El pájaro campana er lag frá Paragvæ eftir F.P.Cardoso. Nafnið þýðir Bjöllufuglinn og má auðveldlega "heyra" í fuglinum

Kúbverjinn Leo Brouwer (f. 1939) þreytti frumraun sína sem gítarleikari 16 ára gamall og byrjaði að semja tónlist sama ár. Ári síðar voru fyrstu verk hans gefin út. Hann fékk styrk til framhaldsnáms í gítarleik og tónsmíðum í Bandaríkjunum tvítugur að aldri. Hann hóf að semja kvikmyndatónlist upp úr 1960 og hefur skrifað tónlist fyrir rúmlega 60 myndir. Brouwer hefur skrifað mikið af gítartónlist og kammermúsik.

Agustin Barrrios Mangore (1885-1944) gítarleikari og tónskáld frá Paraguay starfaði sem tónlistarmaður í Suður-Ameríku á árunum 1910-1934 en þá hélt hann til Evrópu. Barrios sneri aftur árið 1936 og kenndi við Konservatoríið í San Salvador til dauðadags. Hann var fyrsti gítarleikarinn sem eitthvað kvað að frá Suður-Ameríku sem kom fram í Evrópu. Barrios samdi yfir 300 verk fyrir gítar og gerði einnig fjölmargar upptökur.

Ferdinando Carulli (1770-1841) fæddist í Napolí á Ítalíu. Hann lærði fyrst á selló en snéri sér síðar að gítarleik. Hann flutti til Parísar og varð vinsæll gítarleikari þar og samdi mörg verk fyrir hljóðfærið þ.á.m. allnokkur verk fyrir tvo gítara. Hann telst eitt merkasta gítartónskálda Ítala á 19.öld. Verk hans eru almennt í Vínarklassískum anda með suðrænum ítölskum blæ.

Vincent Persichetti (1915-1987) samdi Serenade Nr.10 fyrir flautu og hörpu í átta stuttum köflum. Hver kafli er eins og lítil mynd, máluð af ýmsum litum flautunnar og hörpunnar. Sumar þeirra eru svolítið haustlegar, nokkrar mjög hægar þar sem litirnir blandast eins og vatnslitir; svona eins og renna saman. Svo eru mikil læti í síðasta kafla, kröftugur hauststormur.

Jurriaan Andriessen (1925-1996) var hollenskt tónskáld sem samdi bæði kammermúsík og sinfóníska tónlist. Verkið Ballade fyrir gítar og hörpu var skrifað 1989 fyrir þáverandi kærustupar og núverandi hjón, Julia Stegeman, hörpuleikara og Marc Lezwijn, gítarleikara. Þau voru samtíða Elísabetu Waage í námi við Tónlistarháskólann í Haag. Í ballöðunni nýtir tónskáldið hvað hljóðfærin eru á margan hátt skyld. Í fyrsta lagi eru bæði hljóðfærin plokkuð til að mynda tón, þótt að gítarinn hafi aðeins 6 strengi en (konsert)harpan 47. Andriessen lætur hljóðfærin skiptast á með laglínur í mjög líku formi. Síðan nýtir hann það sem kalla má mynsturhæfileika hljóðfæranna. Þá er átt við að sömu strengir eru plokkaðir en aðrir hljómar fengnir með því að skipta um grip á gítarnum eða pedala á hörpunni.

Manuel de Falla (1876-1946) var eitt merkasta tónskáld Spánar á öldinni sem leið. Þríhyrndi hatturinn er úr samnefndri ballettsvítu.

Fátækt knúði ítalska foreldra Astor Piazzolla ( 1921-1992) til að setjast að í vesturheimi og ólst hann upp bæði í Argentínu og New York. Eiginlega tókust líka á í tónsmíðum hans andstæð öfl, djazzinn sem hann heyrði ungur á Manhattan, tangóinn sem var alls ráðandi í Buenos Aires og löngun hans til því að verða "alvarlegt" vestrænt tónskáld. Undir handleiðslu Nadiu Boulanger í París má segja að hann hafi fundið sköpun sinni þann persónulega farveg sem hentaði tónlistargáfum hans. Verkið "Saga tangósins" er í fjórum þáttum. Sá fyrsti er leikandi léttur, ættaður frá árdögum formsins um 1900. Annar kaflinn er hægur, tregafullur og hér er jafnvel frekar setið og hlustað en að stiginn sé dans. Þriðji þátturinn er í 1960 - stíl þar sem bozza nova taktur blandar sér í leikinn en lokakaflinn er nútímalegur konsert tangó. Annar kafli verksins "Café 1930" er leikinn á tónleikunum.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs og aðstandendur nemenda: 500 kr.
• Nemendur Tónlistarskóla Kópavogs: Frítt.
• 12 ára og yngri: Frítt
• Tilboðsverð: Allir fimm tónleikar starfsársins á 5.000 kr.

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

[ Til baka á Fréttir 2004 ]