Úr aðalnámskrá tónlistarskóla:

Mennta- og menningarhlutverk tónlistarskóla er að

1. mars 2006

Tónleikaröð kennara: Rafstrengleikar

Þriðju tónleikar vetrarins í Tónleikaröð kennara Tónlistarskóla Kópavogs verða haldnir í Salnum laugardaginn 4. mars næstkomandi kl. 13:00. Flytjendur eru Ríkharður H. Friðriksson og Úlfar Haraldsson. Flutt verður raftónlist eftir Ríkharð H. Friðriksson, annars vegar fyrirfram samin verk á þrívíðu "surround" formi og hins vegar lifandi rafspunar fluttir af Ríkharði og Úlfari Haraldssyni á rafgítar og rafbassa, með góðri hjálp tölvutækninnar.

Efnisskrá

• Ríkharður H. Friðriksson: Brons (fyrir fjórar hljóðrásir - Surround)
  
• Ríkharður H. Friðriksson og Úlfar Haraldsson: 04.03.06 (fyrir rafgítar og rafbassa)
  
• Ríkharður H. Friðriksson: Líðan III (fyrir fimm hljóðrásir - Surround)
  
• Ríkharður H. Friðriksson: Fletir (fyrir rafmandólín og gagnvirkt tölvukerfi)

Flytjendur

Ríkharður H. Friðriksson (f. 1960) hóf ferilinn sem rokktónlistarmaður, en lærði síðan tónsmíðar við Tónlistarskólann í Reykjavík, Manhattan School of Music, New York; Accademia Chigiana, Siena; og Konunglega Tónlistarháskólann í Haag. Einnig skartar hann prófskírteinum í sagnfræði frá Háskóla Íslands og klassískum gítarleik frá Tónskóla Sigursveins D. Kristinssonar. Hann nam einnig tölvutónlist við hollensku Hljóðrannsóknarstofnunina (Instituut voor Sonologie) í Haag, auk þess að sækja námskeið í tölvutónsmíðum við Sweelinck tónlistarháskólann í Amsterdam og sumarskólanum í Darmstadt.

Eftir hann liggja bæði hljóðfæra- og tölvutónsmíðar sem hafa verið fluttar á Íslandi, Norðurlöndunum, Bandaríkjunum, Þýskalandi, Austurríki, Hollandi, Sviss, Kína og Singapore, auk þess sem þeim hefur verið útvarpað í fleiri löndum í Evrópu og Asíu.

Tónlist Ríkharðs stefnir í grundvallaratriðum í tvær áttir. Annars vegar gerir hann hreina raftónlist þar sem mest er lagt upp úr ummyndunum á náttúruhljóðum og hreyfingu þeirra í þrívíðu rými (surround). Má þar m.a. nefna verkaröðina "Líðan" sem byggir á vel- eða vanlíðunarhljóðum mannsraddarinnar. Hins vegar er lifandi spunatónlist þar sem hann leikur á rafgítar eða ýmis tölvuhljóðfæri. Þar kemur hann annað hvort fram einn eða með hljómsveitinni Icelandic Sound Company (ásamt Gunnari Kristinssyni).

Heimasíða Ríkharðs er: www.ismennt.is/not/rhf/

Úlfar Ingi Haraldsson (f. 1966) stundaði fyrst nám í kontrabassaleik og djassfræðum við Tónlistarskóla F.Í.H. og lauk síðar burtfararprófi í tónfræðum og tónsmíðum við Tónlistarskólann í Reykjavík 1990. Úlfar stundaði framhaldsnám í tónsmíðum og tónfræðum við University of California, San Diego á tímabilinu 1992-99 og lauk doktorsprófi 2000.

Úlfar hefur starfað sem tónskáld, tónlistarkennari, kontrabassaleikari og stjórnandi fyrst á Íslandi og síðar í Kaliforníu í Bandaríkjunum. Hann hefur samið hljómsveitar-, kammer-, og einleiksverk sem flutt hafa verið á Norðurlöndunum, Ítalíu og í Bandaríkjunum og Mexíkó.

Um verkin

Brons (2004) er unnið algerlega upp úr hljóðum úr gong- og tam-tam safni Gunnars Kristinssonar. Með því að spila á hljóðfærin á mismunandi hátt og á mismunandi stöðum er hægt að ná fram ótrúlega fjölbreyttum og heillandi hljóðheimi. Síðan var unnið áfram með hljóðin í tölvu á margvíslegan hátt, aðallega þó með kerfum samsettum úr fjölbreytlegum taflínum (delay-lines). Verkið var samið að mestu í Tónveri Tónlistarskóla Kópavogs í desember 2003 og janúar 2004.

04.03.06 (2006) er spuni fyrir rafgítar og rafbassa. Tveir gamlir popparar taka fram fornaldarhljóðfærin sín og finna á þeim nýja fleti í bland við þá gömlu og góðu, oftar en ekki með góðri hjálp tölvutækninnar.

Líðan III (2005) er byggt á hljóðum sem tengjast vellíðan og gleði á beinan eða óbeinan hátt. Ekki er verið að verið að reyna að segja neina sérstaka gleðisögu, heldur er unnið með hljóðin samkvæmt hreinum tónlistarlögmálum. Á meðan á smíði verksins stóð, lést Magnús Blöndal Jóhannsson og fannst höfundi við hæfi að heiðra minningu meistarans með því að skjóta inn nokkrum tilvísunum í verk Magnúsar. Líðan III var unnið alfarið í Tónveri Tónlistarskóla Kópavogs í mesta skammdeginu veturinn 2004-05. Öll hljóðin tilheyrðu upphaflega Eygló Harðardóttur.

Fletir (2006) er spuni fyrir rafmandólín og gagnvirkt tölvukerfi. Yfirleitt er litið á mandólín sem hálfgert hallærishljóðfæri sem á helst heima í rómantískum leik undir væmnum ítölskum ástarsöngvum. Margt býr þó meira í þessu ágætis hljóðfæri. Höfundur fjárfesti t.d. í mandólíni fyrir mörgum árum til þess að spila þjóðlagatónlist. Fyrir nokkru síðan var hljóðfærið grafið upp úr glatkistunni og farið að setja það í samhengi við þá hljóðhugsun sem eigandi þess hefur iðkað undanfarin ár. Þá komu í ljós alls kyns nýir fletir á gamla hljóðfærinu. Gamli jálkurinn kom aldeilis á óvart og hefur síðan verið mikið notaður í samstarfi við slagverksleikarann Gunnar Kristinsson í sveitinni Icelandic Sound Company ( www.isc.is/ ). Verkið Fletir er eins konar samantekt á þessum pælingum.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.