Úr aðalnámskrá tónlistarskóla:

Mennta- og menningarhlutverk tónlistarskóla er að

23. mars 2006

Tónleikaröð kennara: Bassaklarínetta

Fjórðu tónleikar vetrarins í Tónleikaröð kennara Tónlistarskóla Kópavogs verða haldnir í Salnum laugardaginn 1. apríl næstkomandi kl. 13:00. Flytjandi er Rúnar Óskarsson, klarínettuleikari. Á efnisskránni eru verk eftir Gerard Brophy, Þórólf Eiríksson, Tryggva M. Baldvinsson, Hilmar Þórðarson og Wayne Siegel, en allir eru þeir fæddir á síðari hluta 20. aldar. Elsta tónverkið á efnisskránni er frá árinu 1987 en nýjasta verkið, Sonoscopic Ocean eftir Hilmar Þórðarson, verður frumflutt á tónleikunum. 

Efnisskrá

• Gerard Brophy (1953) Twist fyrir einleiksbassaklarínettu (1993)
  
• Þórólfur Eiríksson (1959) Mar fyrir bassaklarínettu og segulband (1987)
  
• Tryggvi M. Baldvinsson (1965) Af gleri fyrir einleiksbassaklarínettu (2004)
  
• Hilmar Þórðarson (1960) Sonoscopic Ocean fyrir bassaklarínettu og lifandi tölvuunnin hljóð (frumflutningur)
  
• Wayne Siegel (1953) Jackdaw! Fyrir bassaklarínettu og segulband (1995)

Flytjandi

Rúnar Óskarsson lauk einleikara- og kennaraprófi frá Tónlistarskólanum í Reykjavík árið 1993 þar sem hann naut handleiðslu Sigurðar I. Snorrasonar. Hann stundaði framhaldsnám hjá George Pieterson við Sweelinck Conservatorium í Amsterdam og lauk einleikaraprófi á klarínettu frá skólanum árið 1996. Samhliða klarínettunáminu lagði hann stund á bassaklarínettuleik hjá Harry Sparnaay og lauk einleikaraprófi á bassaklarínettu árið 1998. Rúnar sótti og tíma hjá Walter Boeykens í Rotterdam.
Að námi loknu starfaði hann við kennslu og hljóðfæraleik í Hollandi í þrjú ár. Eftir heimkomu árið 2001 hefur Rúnar leikið með ýmsum hópum svo sem Kammersveit Reykjavíkur, hljómsveit Íslensku óperunnar og CAPUT, verið fastráðinn við Sinfóníuhljómsveit Íslands og komið fram á fjölmörgum kammer- og einleikstónleikum.

Um tónskáldin og verkin

Gerard Brophy er fæddur í Ástralíu 1953. Hann byrjaði ekki að læra á hljóðfæri fyrr en hann var orðinn 22 ára og lærði þá á klassískan gítar. Hann hóf tónsmíðanám stuttu síðar og lærði bæði í Ástralíu og á Ítalíu. Síðustu ár hafa verk hans náð mikilli útbreiðslu og hefur hann unnið til fjölda verðlauna. Verkið Twist var samið fyrir hollenska bassaklarínettusnillinginn Harry Sparnaay.

Verk Þórólfs Eiríkssonar, Mar, er upphaflega skrifað fyrir klarínettu. Á þessum tónleikum verður það hins vegar leikið á bassaklarínettu sem hljómar einni áttund neðar en klarínettan. Hljóðfærið fer í könnunarleiðangur um undirdjúpin og hittir þar m.a. félaga sína, hvalina.

Einleiksverk Tryggva M. Baldvinssonar fyrir bassaklarínettu var frumflutt í Skálholtskirkju 2. ágúst árið 2003 og tónskáldið kveður raunar birtuna sem leikur um glugga Gerðar Helgadóttur í þessari fallegu íslensku dómkirkju tengjast heiti verksins Af gleri. Titillinn á einnig býsna vel við upphaf verksins, afar brothætt og gegnsætt. Nóta sem byrjar úr engu og er nánast ógreinanleg, minnir þegar á líður eilítið á hljóðið sem framkallast þegar kampavínsglas er nuddað með rökum fingri. Hið friðsæla Af gleri býr annars yfir fjölbreytilegu litrófi. "Rúnar hafði sýnt mér ýmsa möguleika á bassaklarínettið, yfirtóna, blaðsmelli og fleira sem ég nýtti mér í tónsmíðinni" segir Tryggvi M. Baldvinsson um þetta fyrsta og eina einleiksverk sitt fyrir bassaklarínettu til þessa.

Hilmar Þórðarson samdi verkið Sonoscopic Oceans að beiðni Rúnars Óskarssonar með styrk frá Musica Nova. Verkið er fyrir bassaklarínettu og lifandi tölvuunnin hljóð, þ.e. tónar bassaklarínettunnar eru hljóðritaðir á tölvu jafnóðum og þeir eru spilaðir, og tölvan býr til ýmis önnur hljóð úr þeim eftir forskrift tónskáldsins.

Ameríkaninn Wayne Siegel samdi verkið Jackdaw! fyrir bassaklarínettu og segulband. Verkið er nefnt eftir lítilli evrópskri kráku, en tónskáldið er með eina slíka tamda í garðinum hjá sér þar sem hann býr í Danmörku. Auk ýmissa tölvuhljóða má heyra kráku- og bassaklarínettuhljóð - bæði venjuleg og einnig sem búið er að teygja og toga í tölvu. Svo vitnað sé í tónskáldið sjálft: "Eftir því sem verkinu miðaði áfram varð það skýrara og skýrara, bassaklarínettan og krákan eru skyld!"

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.