Tónlistarskóli Kópavogs


	Úr aðalnámskrá tónlistarskóla: Mennta- og menningarhlutverk tónlistarskóla er að
	-	veita öllum, sem þess æskja, færi á að kynnast tónlistarnámi af eigin raun
	-	skapa nemendum tækifæri til tónlistarflutnings, jafnt innan skóla sem utan

FRÉTTR 2007

Fréttir

21. maí 2007

Burtfarartónleikar Fjólu Kristínar Nikulásdóttur, sópran

Þriðjudaginn 22. maí nk. heldur Fjóla Kristín Nikulásdóttir, sópran, burtfarartónleika sína frá Tónlistarskóla Kópavogs sem jafnframt eru hluti framhaldsprófs hennar við skólann. Tónleikarnir verða í Salnum, Tónlistarhúsi Kópavogs og hefjast kl. 20.00. Meðleikarar Fjólu Kristínu á tónleikunum eru Krystyna Cortes, píanóleikari og Oddur Arnþór Jónsson, barítón. Á efnisskrá eru söngverk eftir John Dowland, Christoph Willibald Gluck, Wolfgang Amadeus Mozart, Sigvalda S. Kaldalóns, Karl O. Runólfsson, Hugo Wolf og Johann Strauss. Aðgangur að tónleikunum er ókeypis og eru allir velkomnir.

Fjóla Kristín hóf nám sjö ára gömul við forskóladeild Tónlistarskóla Kópavogs. Síðastliðin sex ár hefur hún lært söng við söngdeild skólans hjá Önnu Júlíönu Sveinsdóttur og Krystynu Cortes.

Fjóla Kristín hefur tekið þátt í ýmsum óperuuppfærslum á vegum skólans og hefur meðal annars sungið hlutverk Sperönzu í Orfeo eftir Montiverdi, Grétu í Hans og Grétu eftir Humperdinck, Bastíönu úr Bastían og Bastíana eftir Mozart, 1. meyju í Töfraflautunni eftir Mozart og nú síðast hlutverk Galateu í Acis and Galatea eftir Handel.

Fjóla lauk stúdentsprófi frá Menntaskólanum í Kópavogi árið 2004 og er nú að ljúka öðru ári í Kennaraháskóla Íslands og er hún á tónmenntakjörsviði. Í vetur hefur hún kennt öðru ári í forskóladeild tónlistarskólans. Fjóla söng í Skólakór Kársness frá sjö ára aldri undir stjórn Þórunnar Björnsdóttur en í vetur hefur hún verið félagi í Kór Langholtskirkju undir stjórn Jóns Stefánssonar.