Úr aðalnámskrá tónlistarskóla:

Mennta- og menningarhlutverk tónlistarskóla er að

3. október 2007

Tónleikaröð kennara: Flauta og píanó

Efnisskrá

• Carl Czerny (1791-1857)
  Duo Concertant í G-dúr op. 129
    Allegro
    Scherzo
    Andantino grazioso
    Rondo
• Atli Heimir Sveinsson (1938)
  Intermezzo úr "Dimmalimm"
• Atli Ingólfsson (1962)
  Þrjár andrár
    1. Áður en hann flýgur
    2. Svangur aftur
    3. Áður en þau falla
• Robert Muczynski (1929)
  Sónata fyrir þverflautu og píanó op. 14
    Allegro diciso
    Scherzo
    Andante
    Allegro con moto

Um verkin

Carl Czerny (1791-1857) þekkja allir sem einhvern tíma hafa lært á píanó. Hann er þekktastur fyrir ógrynnin öll af píanóæfingum, sem hann samdi fyrir nemendur á öllum stigum enda sjálfur vandvirkur og eftirsóttur kennari. Þessar æfingar eru sumar áhugaverðar og glæsilegar en flestar eru þó fyrst og fremst tækniæfingar. Því er ekki alveg víst að allir sem lagt hafa stund á píanóleik, hugsi hlýlega til hans eða hafi áttað sig á því að hann samdi mikið af áheyrilegri tónlist af ýmsu tagi; hljómsveitarverk, kammertónlist og kórtónlist. Czerny útsetti einnig vinsæl verk jafnvel óperur fyrir píanó og stuðlaði þannig að útbreiðslu og hylli þeirra.

Á miðjum aldri snéri hann sér alfarið að tónsmíðum. Samtímamenn hans og seinni heimildir bera tónsmíðunum vel söguna en þau féllu í skugga af verkum hinna miklu tónskálda þess tíma. Eru verk hans enn sjaldséð á tónleikaefnisskrám.

Talið er að Duo concertant hafi verið samið 1825. Verkið hefur hefðbundna kaflaskiptingu klassískrar sónötu. Fyrsti þátturinn er í sónötuformi og næst kemur stutt og leikandi scherzo. Þriðji þátturinn er lýrískur með kraftmeiri miðkafla og svo erum við leidd mjúklega inn í lokakaflann sem er fjörugt rondo. Í verkinu skiptast á í báðum hljóðfærum glæsilegar runur og trillur og undurfagrar laglínur í bland við dunandi dansstef. Það er talsvert stórt í sniðum enda hálfgerður konsert fyrir bæði hljóðfærin eins og nafnið gefur til kynna.

Atli Heimir Sveinsson (1938) er eitt okkar þekktasta og virtasta tónskáld. Leikhústónlist hans hefur ratað beint í hjarta þeirra sem á hlýða. Eitt vinsælasta verk Atla Heimis er Intermezzo úr ballettinum Dimmalimm sem hann samdi árið 1970 við sögu Muggs um kóngsdótturina Dimmalimm og svaninn hennar. Upphaflega var þetta verk flutt af flautu og hörpu en var árið 1982 gefið út á nótum fyrir flautu og píanó.

Á meðan þessi litli þáttur er leikinn, líður ár í sögunni um Dimmalimm. Hún bíður döpur allan þann tíma eftir svaninum sínum, sem henni þykir svo vænt um. Hún veit ekki enn að hann hefur breyst í prins og það er ást hennar sem hefur frelsað hann úr álögum.

Atli Ingólfsson (1962) lauk námi í tónsmíðum frá Tónlistarskólanum í Reykjavík árið 1984 og stundaði síðan framhaldsnám í Frakklandi og á Ítalíu þar sem hann starfaði einnig um árabil. Hann er nú búsettur á Íslandi og stundar tónsmíðar og kennslu. Hann er hljómfræðkennari við Tónlistarskóla Kópavogs.

Atli samdi "þrjár andrár" fyrir flautu og píanó 1986 þegar hann var við nám í Mílanó. Verkið er eins og nafnið bendir til í þremur örstuttum þáttum. Þeir virðast næstum liðnir um leið og þeir hefjast en skilja þó eftir sig óm af glettni og blíðu.

Robert Muczynski fæddist árið 1929 í Bandaríkjunum og hefur verið mikilvirkur þar vestra sem píanóleikari og tónskáld og einnig sem prófessor við virta háskóla. Hann hefur samið verk af ýmsum toga og má telja sónötu hans op.14 eitt af mikilvægustu flautuverkum 20. aldarinnar. Hann samdi sónötuna árið 1960 og hún var frumflutt í Nice í Frakklandi ári seinna. Sama ár hlaut verkið 1. verðlaun í "Concours International de Composition" og hafa vinsældir þess meðal flautuleikara farið vaxandi æ síðan.
Muczynsky sagði sjálfur að hann vildi í þessu verki forðast klisjur, sem hann taldi einkenna mörg flautuverk frá fyrri hluta 20. aldar, til dæmis fossandi nótnaflóð og skrautlegar strófur eða ofur heiðríkar ljóðrænar línur. Hann vildi leggja áherslu á möguleika flautunnar til að leika á hvassan og snarpan hátt, tónlist sem væri að mörgu leyti samþjöppuð og ágeng.

Fyrstu tveir kaflar sónötunnar eru lýsandi dæmi um þetta, sá fyrri er þó þyngri á bárunni og alvarlegri en scherzóið sem er fullt ákefðar en þó með kæruleysissvip í bland. Þriðji þátturinn leitar inn á við í djúpa kyrrð sem er þó þrungin spennu á köflum. Verkinu lýkur á nokkurs konar rondói með hrynföstum krafti og snerpu, þar sem flautan fær einleikskadensu stuttu fyrir lokasprett beggja hljóðfæranna.

Um flytjendur

Margrét Stefánsdóttir hóf tónlistarnám við Tónlistarskólann á Akureyri og síðan við Tónlistarskólann í Reykjavík. Árið 1999 lauk hún Doktor of Musical Arts gráðu frá University of Illinois undir handleiðslu Alexander Murray. Doktorsritgerð Margrétar nefnist Pedagogical and Musical Aspects of Flute Duets. Margrét hefur víðtæka reynslu af tónlistarkennslu en hún hefur starfað bæði hér á landi og í Bandaríkjunum. Margrét er nú kennari við Tónlistarskóla Kópavogs.

Sólveig Anna Jónsdóttir stundaði píanónám við Tónlistarskólann á Akureyri, Tónlistarskólann í Reykjavík og University of Houston í Texas. Meðal kennara hennar voru Philip Jenkins, Halldór Haraldsson og Nancy Weems. Sólveig Anna hefur lengst af haft píanókennslu og meðleik með nemendum að aðalstarfi, nú í Tónlistarskóla Kópavogs þar sem hún er einnig deildarstjóri píanódeildar. Hún hefur auk þess starfað með einsöngvurum og kórum, einleikurum og kammerhópum og komið fram á tónleikum hérlendis og erlendis.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.