Úr aðalnámskrá tónlistarskóla:

Mennta- og menningarhlutverk tónlistarskóla er að

30. janúar 2008

Tónleikaröð kennara: Pétur og úlfurinn 

Sögumaður á tónleikunum er Sigurþór Heimisson leikari.

Tónlistin er leikin í útsetningum fyrir blásarakvintett af Pamelu De Sensi flautuleikara, Eydísi Franzdóttur óbóleikara, Rúnari Óskarssyni klarínettuleikara, Kristínu Mjöll Jakobsdóttur fagottleikara og Emil Friðfinnssyni hornleikara.

Efnisskrá

• Modest Mussorgsky
  Þættir úr Myndum á sýningu
    
• Sergej Prokofiev 
  Pétur og úlfurinn

Um verkin

Pétur og úlfurinn er ævintýri fyrir leiklestur og hljómsveit og er bæði sagan og tónlistin eftir rússneska tónskáldið Prokofiev. Hann hafði farið með syni sína tvo í tónleikhús barna í Moskvu og þar datt honum í hug að semja tónverk af þessu tagi. Sagan segir frá Pétri sem stelst út á engið í óþökk afa síns, þar glímir hann við ógnvættinn ógurlega, úlfinn, með hjálp fuglsins og kattarins, en úlfurinn hefur þá þegar gleypt veslings öndina sem hafði synt í makindum á tjörninni. Verk var samið til að kynna fyrir börnum hljóðfæri sinfóníuhljómsveitarinnar. Flautan er fuglinn, óbóið öndin, klarínettan kötturinn, fagottið afinn, hornið úlfurinn og hér skiptast öll hljóðfærin á að leika stef Péturs í stað strokhljóðfæranna. Hin mikla athygli og vinsældir sem verkið fékk kom meira að segja höfundinum sjálfum á óvart.

Rússneska tónskáldið Modest Mussorgsky samdi verkið Myndir á sýningu árið 1874 í tengslum við sýningu náins vinar síns, myndlistarmannsins Victors Hartmanns. Verkið er samsett af fjórtán þáttum, tíu sem eru um myndir en fimm um gönguleiðir frá einni mynd til annarrar. Gönguleiðirnar eru alltaf með sama þema en samt með tilbrigðum sem lýsa hughrifum tónskáldsins eftir að hafa séð ákveðnar myndir. Á tónleikunum verða fluttir átta þættir úr verkinu. Sá fyrsti lýsir myndinni "gamli kastalinn" þar er farandtónlistarmaður sem syngur söng sinn fyrir framan miðaldakastala í hrörlegu umhverfi. Önnur myndin "Tuileries" sýnir nokkur börn sem leika sér glöð í garðinum undir vökulu auga fóstranna sem eru á spjalli. Þriðja myndin "Dans hænsnaunganna í skurninu" sýnir dansara klædda sem hænsnaunga koma út úr eggi. Á fjórðu myndinni "Limoges" eru konur á spjalli á markaðstorginu í franska bænum Limoges, smátt og smátt breytist spjallið í mikið rifrildi. Í "Kofinn á fuglafótum" er norninni Baba Yaga lýst, hræðilegri veru sem er sett upp sem kofi með fuglsfætur og lítur út eins og gauksklukka. Tónlistin lýsir hræðslu tónskáldsins er hann kemur í hræðilega hellinn hennar. Hartmann sem arkitekt hafði skipulagt mikið hlið inn í Kiev í endurreisnarstíl Rússa og varð það Musorgsky innblástur fyrir síðasta hluta tónverksins. Takturinn er hátíðlegur og aðalstefið endurtekið.

Um flytjendur

Pamela De Sensi er fædd árið 1975 í Róm en uppalin í Lamezia Terme á Suður Ítalíu. Hún útskrifaðist 1998 í "Conservatorio di Musica L. Perosi" í Campobasso á Ítalíu og í kammertónlist í " Conservatorio di Musica S. Cecilia " í Róm 2002. Á sama tíma sótti hún tíma hjá heimskunnum flautuleikurum s.s. C. Klemm, M. Ziegler, F. Reengli, T. Wye, M. Larrieu og M. Ancillotti. Hefur tekið þátt í fjölda tónleika bæði sem einleikari sem og í kammertónlist: t.d. Kasakstan, Frakklandi, Spáni, Suður-Ameríkur og Ísland og víðsvegar á Ítaliu. Frá árinu 1997 hefur hún spilað með flautakvartettnum "Horus Ensemble" og frá ´98 með tríóinu "Shéhérazade". Á Íslandi hefur hún starfað sem tónlistarkennari við Tónlistarskóla Árnesinga og Tónlistarkóla Kópavogs .

Eydís Franzdóttir óbóleikari lauk burtfararprófi frá Tónlistarskólanum í Reykjavík 1987 og stundaði framhaldsnám í London. Hún lék um skeið með samevrópsku hljómsveitinni Acadya, en var svo ráðin 1. óbóleikari tékknesku útvarpshljóm-sveitarinnar í Pilzen 1992 þar sem hún lék um tveggja ára skeið. Eydís hefur komið fram sem einleikari, með kammerhópum og hljómsveitum víða um Evrópu, Norður-Ameríku og á Íslandi. Hún er m.a. meðlimur í Caput-hópnum, skipuleggjandi og óbóleikari Poulenc-hópsins og kennari við Tónlistarskóla Kópavogs.

Emil Friðfinnsson fæddist á Akureyri og hóf þar tónlistarnám hjá Roar Kvam. Hann stundaði framhaldsnám við Tónlistarskólann í Reykjavík hjá Joseph Ognibene og síðan við tónlistarháskólann í Essen í Þýskaland hjá prófessor Hermann Baumann. Eftir að hafa starfað í hljómsveitum í Þýskalandi um nokkura ára skeið sneri Emil heim og hefur síðan verið fastráðin í Sinfóníuhljómsveit Íslands auk þess að leika með ýmsum kammerhópum s.s. kvintett Coretto og Kammersveit Reykjavíkur. Emil hefur verið hornleikari CAPUT-hópsins frá 1987

Rúnar Óskarsson lauk útskrifaðist með kennara- og einleikarapróf á klarínettu frá Tónlistarskólanum í Reykjavík vorið 1993 og stundaði framhaldsnám hjá George Pieterson við Sweelinck Conservatorium Amsterdam. Hann lauk prófi frá skólanum 1996 og einleikaraprófi á bassaklarínettu tveimur árum síðar undir handleiðslu Harry Sparnaay. Einnig sótti Rúnar tíma hjá Walter Boeykens. Eftir heimkomu 2001 hefur Rúnar leikið með m.a. Caput, hljómsveit íslensku óperunnar, Atón, Kammersveit Reykjavíkur og fleiri hópum. Hann er núna fastráðinn við Sinfóníuhljómsveit Íslands. Rúnar hefur gefið út 3 geisladiska með leik sínum. Sá nýjasti, Monologues-Dialogues hefur að ný íslensk verk fyrir bassaklarínettu og var diskurinn tilnefndur til íslensku tónlistarverðlaunanna 2006.

Kristín Mjöll Jakobsdóttir nam við Tónlistarskólann í Reykjavík og lauk Mastersprófi frá Yale School of Music vorið 1989. Ennfremur stundaði hún nám við Sweelinck Conservatorium í Amsterdam og í Cincinnati, Ohio. Veturinn 1991-92 starfaði Kristín með Fílharmóníuhljómsveitinni í Hong Kong og var búsett þar til 1998. Hún hefur síðan leikið með Sinfóníuhljómsveit Íslands, Kammersveit Reykjavíkur, Sinfóníuhljómsveit Norðurlands, Íslensku óperunni og fjölmörgum kammerhópum. Hún hefur m.a. stofnað Blásaraoktettinn Hnúkaþey sem hefur verið starfandi frá árinu 2003 og Fagottkvartettinn Fagotterí.

Sigurþór Heimisson er útskrifaður leikari frá Leiklistarskóla Íslands og hefur leikið fjölda hlutverka í atvinnuleikhúsum landsins. Núna er hann að leika í tveimur verkum sem flakka á milli grunn- og framhaldsskóla. Hann kennir framsögn og raddbeitingu í Háskólanum í Reykjavík.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

[ Til baka á Fréttir 2008 ]