Úr aðalnámskrá tónlistarskóla:

Mennta- og menningarhlutverk tónlistarskóla er að

5. mars 2008

Tónleikaröð kennara: Meistari Mozart

Flytjendur eru fiðluleikararnir Bryndís Pálsdóttir og Sigurlaug Eðvaldsdóttir, víóluleikararnir Ásdís H. Runólfsdóttir og Svava Bernharðsdóttir, sellóleikarinn Pawel Panasiuk og píanóleikarinn Agnieszka Panasiuk. 

Efnisskrá

• W.A. Mozart
  Strengjakvintett í g-moll KV 516
• W.A. Mozart
  Píanókvartett í g-moll KV 478

Um verkin

Árið 1785 bað nótnaútgefandinn og tónskáldið Anton Hoffmeister Mozart um að semja fyrir sig þrjá píanókvartetta til útgáfu, en þeir Mozart voru góðir vinir. Píanókvartettar höfðu fram að því ekki verið samdir og var þetta því nýtt tónlistarform. Gerðu þeir samning um þetta og kom fyrsti kvartettinn út í árslok 1785 hjá forlagi Hoffmeisters. Var sá kvartett í g-moll og verður fluttur hér í dag. Viðtökur verksins voru ekki góðar því hann var of erfiður fyrir allan almenning til flutnings í heimahúsum, en þannig var kammertónlist yfirleitt flutt þá. Mozart losaði því Hoffmeister undan útgáfusamningnum en annar píanókvartett, sem hann var byrjaður að semja, kom út hjá öðru forlagi ári seinna. Fleiri urðu píanókvartettar Mozarts ekki. Kvartettinn í g-moll er númer KV 478 í verkaskrá Mozarts og er í hefðbundnum þrem köflum. Fyrst er magnþrungið og dramatiskt allegro, þá fremur dapurt og þungbúið andante og að lokum hratt rondo sem léttara er yfir. Píanóið gegnir miklu hlutverki í verkinu, næstum eins og um lítinn pínókonsert sé að ræða og ekki á færi nema vel þjálfaðs píanista.

Í apríl 1788 birtist í Wiener Zeitung auglýsing frá "Kapellmeister" Mozart þar sem hann býður fólki að gerast áskrifendur að þrem strengjakvintettum sem hann hyggist gefa út. Undirtektir voru dræmar og frestaðist útgáfan til 1. janúar 1789. Einn þessara kvintetta var í g-moll og verður hann leikinn hér í dag. Er hann með númerið KV 516 í verkaskrá Mozarts. Þetta verk er einn af hátindunum meðal verka Mozarts og þýska tónskáldið Richard Strauss gekk svo langt að segja að verkið væri meðal bestu tónverka sem yfirleitt hefðu verið samin. Í strengjakvintettum sínum hefur Mozart tvær víólur gagnstætt t.d. Schubert og Boccherini sem nota tvö selló. Blær verkanna verður því ekki eins dökkur. Kvintettinn er í fjórum köflum: fyrst hraður upphafskafli, þá meðalhraður menúett, svo hægur kafli (andante) og að lokum hraður lokakafli með hægum inngangi. Í verkinu kristallast blær andlegrar angistar sem snilligáfa Mozarts gerir að ódauðlegu listaverki.

Runólfur Þórðarson

Um flytjendur

Bryndís Pálsdóttir hóf fiðlunám í Barnamúsíkskóla Reykjavíkur, en lauk einleikaraprófi frá Tónlistarskólanum í Reykjavík vorið 1984. Hún hélt þá til frekara náms í New York, þar sem hún lauk M.M. prófi frá Juilliard-skólanum vorið 1988. Árið eftir stundaði hún nám í Amsterdam. Frá 1989 hefur hún verið fastráðinn fiðluleikari í Sinfóníuhljómsveit Íslands, kennari við Tónlistarskólann í Reykjavík og leikið kammertónlist af ýmsu tagi.

Sigurlaug Eðvaldsdóttir stundaði nám í fiðluleik við Tónlistarskólann í Reykjavík undir handleiðslu Guðnýjar Guðmundsdóttur og útskrifaðist þaðan árið 1983. Framhaldsnám stundaði hún í Manhattan School of Music í New York hjá Ani Kavafian. Eftir námið starfaði hún í fimm ár við Sinfóníuhljómsveit í Mexico. Frá haustinu 1994 hefur Sigurlaug starfað í Sinfóníuhljómsveit Íslands. Hún kennir við Tónlistarskóla Seltjarnarness. Auk þess er hún meðlimur í ýmsum tónlistarhópum eins og Kammersveit Reykjavíkur, CAPUT og Cammerarctica. Einnig spilar hún reglulega á vegum Kammermúsíkklúbbsins og í Íslensku óperunni.

Ásdís Hildur Runólfsdóttir lauk fiðlukennaraprófi frá Tónlistarskólanum í Reykjavík og stundaði svo nám í víóluleik í Þýskalandi og Hollandi hjá Unni Sveinbjarnardóttur, Misha Geller og Prunellu Pacey. Hún hefur síðan 1987 kennt fiðlu- og víóluleik við Tónlistarskóla Kópavogs og starfað sem víóluleikari, aðallega með Sinfóníuhljómsveit Íslands, hljómsveit Íslensku óperunnar og Sinfóníuhljómsveit Norðurlands.

Svava Bernharðsdóttir víóluleikari, hóf fiðlunám á Selfossi hjá núverandi vígslubiskupi í Skálholti, Sigurði Sigurðssyni. Næsti kennari hennar var Diddi fiðla, Sigurður Rúnar Jónsson, sem einnig er þekktur fyrir að spila á íslenska fiðlu. Gígja Jóhannsdóttir og Rut Ingólfsdóttir tóku svo við þar sem Svava flutti til Reykjavíkur. Næstu árin nam Svava í Eþíópíu, Illinois, Hollandi og New York, en þar lauk hún doktorsprófi við Juilliard skólann. Lokaverkefni hennar þar fjallaði um sögu og þróun íslensks fiðlu- og víóluleiks. Svava var næstu árin í Sviss og Þýskalandi og Slóveníu, en er nú búsett hér og kennir og starfar með Sinfóníuhljómsveit Íslands og tekur virkan þátt í flutningi kammertónlistar.

Aðgangseyrir

• Almennt miðaverð: 1.500 kr.

• Eldri borgarar, öryrkjar og námsmenn: 1.200 kr.

• Kennarar Tónlistarskóla Kópavogs: 500 kr.

• Nemendur Tónlistarskóla Kópavogs og aðstandendur: Frítt.

• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.