Úr aðalnámskrá tónlistarskóla:

Mennta- og menningarhlutverk tónlistarskóla er að

24. nóvember 2008

Tónleikaröð kennara: Enga fiðlu takk! 

Þessum tónleikum er meðal annars ætlað að gefa tónleikagestum tækifæri á að upplifa dekkri lit strengjahljóðfæranna. Hér er engin fiðla með eins og yfirskrift tónleikanna vísar til. Öll fá hljóðfæri tækifærin til að láta ljós sín skína þó að flest þekkist þau sem einleikshljóðfæri (kontrabassinn þó síst).

Efnisskrá

• G. Rossini
  Duo fyrir selló og kontrabassa
  - Allegro
  - Andante molto
  - Allegro
  
• R. Gliere
  Svíta fyrir víólu og kontrabassa
  - Prelude
  - Gavotte
  - Wiegenlied
  - Intermezzo
  - Scherzo
  
• M. Haydn
  Divertimento fyrir víólu, selló og kontrabassa
  - Adagio con Variazioni
  - Menuetto
  - Presto

Um verkin og höfunda

Reinhold Gliere fæddist í Kiev 1875. Hann lærði tónsmíðar í konservatoríinu í Moskvu en átti sjálfur eftir að kenna tónskáldum eins og Prokofiev og Khachaturian. Eftir hann liggja meira en hundrað verk m.a. þrjár sinfóníur, sex óperur, hljómsveitarverk ýmiss konar o.fl. Hann samdi líka fjögur verk fyrir kontrabassa og píanó sem eru í miklum metum hjá bassaleikurum í dag. Verkið á efnisskránni er upphaflega samið fyrir selló og fiðlu og þá í átta köflum. Frank Proto hefur tekið fimm kafla og umskrifað þá fyrir víólu og kontrabassa.

Dúó fyrir selló og kontrabassa samdi Cioachino Antonio Rossini (1792-1868) árið 1824 í heimsókn til London fyrir sir David Salomons sem lék á selló og Domenico Dragonetti mesta kontrabassasnilling þess tíma. Ítölsk tónlist virtist vera í miklum metum á þessum árum í London og nutu þeir góðs af Rossini, Dragonetti og Paganini svo einhverjir séu nefndir. Rossini var ekki alls ókunnur möguleikum kontrabassans. Eitt af bernskubrekum var að semja sex strengjasónötur fyrir tvær fiðlur, selló og kontrabassa, þá aðeins tólf ára gamall. Hann samdi einnig lítið lag fyrir kontrabassa og píanó "Une larme pour basse". Eins og með sónöturnar er dúóið létt og leikandi en einnig "virtúósískt" og gerir miklar kröfur til hljóðfæraleikaranna.

Eins og stóri bróðir Joseph, var Michael Haydn mjög afkastamikið tónskáld. Hann fæddist árið 1737 í Rohrau í Austurríki og lést 1806 í Salzburg. Tvítugur var hann orðinn kapellmeister í Grosswardein. 1763 flutti hann til Salzburg þar sem hann bjó ævina á enda sem konsertmeistari, organisti og kennari meðal annars. Nemendur hans voru m.a. C.M. von Weber og Diabelli. Þetta Divertimento (skemmtitónlist) fannst á seinni hluta síðustu aldar inni í sellórödd sónötu eftir Francesco Saverio Richter í The Royal College of Music í London.

Um flytjendur

Svava Bernharðsdóttir víóluleikari, lauk DMA gráðu (Doctor of Musical Arts) frá Juilliard skólanum í New York 1989. Hún hefur unnið í Sviss, Þýskalandi, Slóveníu og síðan Íslandi sem hljómsveitarspilari, kammertónlistarmaður og kennari. Svava er fastráðin við Sinfóníuhljómsveit Íslands og kennir m.a. við Tónlistarskóla Kópavogs.

Pawel Panasiuk lauk meistaraprófi í sellóleik frá Chopin- Akademíunni í Varsjá og síðan Postgraduate Diploma frá Trinity College of Music í London. Frá árinu 1999 hefur Pawel búið á Íslandi. Hann er sellóleikari í Sinfóníuhljómsveit Norðurlands og hefur einnig leikið einleik með hljómsveitinni. Pawel kennir sellóleik við Tónlistarskóla Árnesinga og Tónlistarskóla Kópavogs.

Þórir Jóhannsson lauk Postgraduate Diploma frá the Royal Northern College of Music árið 1992 og er hann nú fastráðinn sem kontrabassaleikari hjá Sinfóníuhljómsveit Íslands. Þórir kennir í Tónlistarskóla Kópavogs og er virkur í kammertónlistarlífi Reykjavíkur. Frá og með haustinu 2008 hefur hann þegið laun úr Listasjóði til í sex mánaða.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs: 500 kr.
• Nemendur Tónlistarskóla Kópavogs og aðstandendur: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

[ Til baka á Fréttir 2008 ]