Úr aðalnámskrá tónlistarskóla:

Mennta- og menningarhlutverk tónlistarskóla er að

28. febrúar 2010

Tónleikaröð kennara: Ekki er allt sem sýnist

Flytjendur eru Pamela De Sensi, þverflauta, Ingunn Hildur Hauksdóttir, píanó, og Ásdís Hildur Runólfsdóttir, víóla.

Efnisskrá

• Giovanni Paolo Simonetti
  Sónata op.10 nr.2
    Preludio Largetto
    Allegro non troppo
    La Tomba del Sig.S. -Tempo di Sarabanda
    Conclusio. Cantabile e sostenuto
• Mel Bonis (1858-1937)
  Scenes de la foret (1927)
    1. Nocturne
    2. A l´aube
    3. Invocation
    4. "Pour Artémis"
• Théodore Dubois (1837-1924)
  Terzettino
• Daniele Zanettovich (1950-)
  Sei Canzoni Andaluse (1995)
    1. Malaguena
    2. Fandanguillo
    3. Villancico
    4. Sevillana
    5. Petenera
    6. Tanguillo

Um verkin og höfundana

Hinn þýski Winfried Michel er fæddur 1948 og starfar sem blokkflautuleikari, tónskáld og útgefandi. Hann kennir einnig við Tónlistarháskólann í Münster og Tónlistarakademíuna í Kassel. Michel lærði sjálfur í Freiburg og Den Haag. Hann hefur haldið tónleika víða um Evrópu og einnig verið gestafyrirlesari í Berlín, Frankfurt og Den Haag. Sem tónskáld hefur hann nokkur andlit. Hann semur og gefur út tónlist sína undir eigin nafni en einnig hefur Michel samið tónlist í 18. aldar stíl undir höfundarheitinu Giovanni Paolo Simonetti. Winfried hefur greinilega yndi af því að leika sér að stílbrögðum og virðist nokkuð leikinn í að smeygja sér í klæði mismunandi tónskálda. Undir eigin nafni er tónlist Michel í meirihluta kammerverk í anda samtímans fyrir hin hefðbundnu blásturshljóðfæri, strengi og hljómborðshljóðfæri en einnig hefur hann samið verk fyrir t.d. blokkflautu og taktmæli.

Mel Bonis. Mélanie Bonis (1858-1937) fæddist í París. Fjölskylda hennar hafði lítinn skilning á miklum tónlistaráhuga stúlkunnar og eftir talsverðan tíma við sjálfsnám á píanó komst Mélanie óvænt í kynni við tónskáldið og organistann César Franck sem hreifst af hæfileikum hennar. Þar með lá leiðin í Konservatoríuna í París þar sem hin unga tónlistarkona vann til ýmissa verðlauna. Eftir Mel Bonis liggja u.þ.b. 300 verk, bæði kórverk, kammertónlist og einleiksverk fyrir píanó og orgel. Forest Scenes er samið árið 1927. Verk hennar litu dagsins ljós fyrir alvöru upp úr 1960 þegar sagnfræðingar rannsökuðu kventónskáld fyrri tíma. Tónlist hennar myndar brú á milli rómantískra strauma og impressionismans og hafa verk hennar talsvert verið hljóðrituð.

Théodore Dubois (1837-1924) var franskur organisti, tónskáld og kennari. Hann lærði hjá Louis Fanart og síðar í Konservatoríunni í París. Dubois starfaði sem organisti við Madeleine kirkjuna í Paris frá 1868 en tók síðan við af César Franck við Sainte-Clotilde kirkjuna. Hann sneri aftur til Madeleine kirkjunnar árið 1877 og tók þar við af Camille Saint-Säens. Dubois kenndi við Parísar konservatoríuna og á meðal nemenda hans þar voru m.a. Paul Dukas og Florent Schmitt. Tónskáldið Dubois skilur eftir sig óperur, óratoríur og 3 sinfóníur. Einnig samdi Dubois tónlist fyrir hljóðfæri sitt orgelið og var mikilvirkur hljóðfæraleikari og fræðimaður.

Hinn ítalski Daniele Zanettovich fæddist 1950 í Trieste inn í tónlistarfjölskyldu. Hann lauk námi frá Tónlistarháskólanum í Trieste, þar sem hann lagði stund á tónsmíðar, kórstjórn, píanó- og slagverksleik. Zanettovich hefur nær eingöngu helgað sig tónsmíðum og vann meðal annars til verðlauna á þeim vettvangi á sjöunda áratug síðustu aldar. Hann hefur einnig gefið út hljómfræðirit sem mikið er notað við kennslu í tónsmíðum. Zanettovich hefur víða starfað sem hljómsveitarstjóri, m.a. hjá Óperuhljómsveitunum í Montecarlo, Trieste og Arena di Verona. Zanettovich var prófessor í tónsmíðum við tónlistarháskólann í Udine til loka árs 2009, er hann fór á eftirlaun.

Um flytjendur

Ásdís Hildur Runólfsdóttir útskrifaðist sem fiðlukennari frá Tónlistarskólanum í Reykjavík. Hún fór í framhaldsnám í víóluleik, fyrst til Þýskalands og svo til Hollands. Ásdís hefur frá 1987 verið fastráðinn kennari við Tónlistarskóla Kópavogs og auk þess starfað sem víóluleikari og leikið með Sinfóníuhljómsveit Íslands, Sinfóníuhljómsveit Norðurlands, Hljómsveit Íslensku Óperunnar, Bachsveitinni í Skálholti og ýmum minni hópum.

Ingunn Hildur Hauksdóttir stundaði nám við Tónlistarskóla Hafnarfjarðar og Tónlistarskólann í Reykjavík. Hún lauk píanókennara- og einleikaraprófi vorið 1993 og hefur sótt námskeið m.a. hjá György Sebök, Dalton Baldwin og Nelitu True. Á árunum 2002-2004 sótti hún einkatíma hjá Roger Vignoles með áherslu á meðleik. Ingunn hefur tekið þátt í ýmiss konar kammertónlist meðfram starfi sínu sem píanókennari og meðleikari við Tónlistarskóla Hafnarfjarðar og Tónlistarskóla Kópavogs. Hún gaf nýverið út geisladisk ásamt Gretu Guðnadóttur, fiðluleikara, með tónlist eftir Helga Pálsson.

Pamela De Sensi er fædd árið 1975 í Róm en uppalin í Lamezia Terme á Suður Ítalíu. Hún lauk einleikaraprófi 1998 frá "Conservatorio di Musica L. Perosi" í Campobasso á Ítalíu og svo lokaprófi í kammertónlist frá "Conservatorio di Musica S. Cecilia" í Róm 2002. Á sama tíma sótti hún tíma hjá heimskunnum flautuleikurum svo sem C. Klemm, M. Ziegler, F. Reengli, T. Wye og M. Larrieu. Hún hefur tekið þátt í mörgum keppnum sem sólisti innan og utan Ítalíu og alltaf orðið í efstu sætum. Pamela hefur tekið þátt í fjölda tónleika bæði sem einleikari sem og í kammertónlist t.d. í Kasakstan, Mexíkó, á Íslandi, í Færeyjum, Finnlandi, Bandaríkjunum og víðsvegar á Ítalíu. Á Íslandi hefur hún starfað sem tónlistarkennari við Tónlistarskóla Árnesinga, Tónskóla Sigursveins og Tónlistarkóla Kópavogs. Hún hefur víðvegar komið fram á tónleikum. Árin 2008-2009 tók hún virkan þátt í að skipuleggja tónleika fyrir börn og setti á fót Pétur og úlfinn eftir Prokofiev og Karnival dýranna eftir Saint Saëns. Nýlega var Pamela skipuð listrænn stjórnandi tónleikaraðar fyrir börn í Salnum, Kópavogi, sem ber heitið "Töfrahurð".

Aðgangseyrir

• Almennt miðaverð: 1.000 kr.
• Nemendur Tónlistarskóla Kópavogs og aðstandendur: Frítt.
• 16 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.