Úr aðalnámskrá tónlistarskóla:

Mennta- og menningarhlutverk tónlistarskóla er að

15. mars 2011

TKTK: Ferðalag á framandi slóðir

Efnisskrá

• Christine K. Brückner (1967)
  Tsetono, fyrir flautu og píanó
• Gloria Coates (1939)
  Phantom, fyrir flautu og píanó
• Giancarlo Scarvaglieri (1977)
  Sound as.....life, fyrir bassaflautu og bodypercussion. Frumflutningur.
• A. Cocomazzi (1975)
  ICELAND, fyrir flautu og slagverk
• Ernesto Cordero (1946)
  Concierto Borikién fyrir flautu, píanó og tvo slagverksleikara. Frumflutningur

Um verkin og höfundana

Christine Brückner er fædd í Hamborg 1967 og lærði tónsmíðar í tónlistarháskólanum þar í borg. Hún starfar sem listamaður, kennari og harmonikuleikari. Tónsmíðar hennar eru svo til eingöngu kammertónlist en einnig hefur Christine samið óperu, Diamond Way, sem frumsýnd var árið 1999. Christine kemur reglulega fram sem hljóðfæraleikari í leikhúsi, m.a. í kabarettum og alls kyns fjölbreytilegum leiksýningum.

Gloria Coates er fædd í Wisconsin árið 1938. Hún hóf snemma sinn tónsmíðaferil og vann til verðlauna 14 ára gömul. Gloria lauk mastersprófi í tónsmíðum frá Columbia University þar sem hún lærði m.a. hjá Alexander Tcherepnin og Otto Luening. Gloria flutti til Þýskalands 1969 og hafa verk hennar verið flutt víða í Evrópu og einnig verið gefin út á hljómdiskum. Tónlist Gloriu er af fjölbreyttum toga, 15 sinfóníur, 8 strengjakvartettar, kammertónlist sem og leikhústónlist.

Ítalinn og gítarleikarinn Giancarlo Scarvaglieri er fæddur árið 1977. Hann lærði gítarleik hjá Marco Cappelli í tónlistarháskólanum í Palermo en hefur einnig stundað nám við háskólann í Bologna. Verk Scarvaglieri hafa verið flutt víða og hefur hann unnið til ýmissa verðlauna fyrir tónsmíðar sínar. Hann semur fyrir hljóðfæri sitt, gítarinn, en einnig kammertónlist af ýmsu tagi. Í ágúst 2008 var verk hans "IOR" valið fyrir alþjóðlega hátíð ungra tónskálda sem haldin var í Riga í Lettlandi. Scarvaglieri starfar sem gítarkennari og stundar einnig tónsmíðanám við Vincenzo Bellini tónlistarháskólann í Palermo á Ítalíu.

Antonio Cocomazzi lærði tónsmíðar og píanóleik í tónlistarháskólum Foggia og Pescara á Ítalíu. Hann hefur hlotið fjölda verðlauna fyrir flutning á eigin verkum. Verk hans eru um 180 talsins, þar af kammertónlist, hljómsveitartónlist, einleiksverk fyrir píanó og kórverk. Erfitt er að lýsa hans persónulega stíl. Cocomazzi smakkar á velflestum stíltegundum og blandar jafnvel saman straumum og stefnum tónlistarinnar, kannski má tala um "Crossover" tónlist. Hans hugsjón er fyrst og fremst að tónlistin sjálf heilli áheyrandann og fái hann til að láta sig dreyma, burtséð frá því hvaða stíl tónlistin tilheyrir.

Ernesto Cordero (1946) er fæddur í New York en ólst upp í Puerto Rico. Hann hóf gítarnám hjá Jorge Rubiano árið 1961 og innritaðist í tónlistarháskólanum í Puerto Rico og stundaði framhaldsnám í konunglega tónlistarháskólanum í Madrid 1972-1974 og hjá Julian Orbón í New York 1977-1978. Cordero er prófessor bæði í gítar- og tónsmíðadeild háskólans í Puerto Rico og hefur verið virkur sem tónskáld, hljóðfæraleikari og kennari. Þá var hann tónlistarstjóri International Guitar Festival of Puerto Rico 1980-1997. Hann hefur samið fjölda fjölbreytilegra verka sem m.a. eru undir áhrifum frá karabískri tónlist. Einnig hefur hann samið nokkur hljómsveitarverk, m.a. með gítareinleik, sem hefur t.a.m. verið flutt af gítarleikaranum Angel Romero og Puerto Rico Symphony Orchestra. Þá hefur hann samið kammerverk og einleiksverk, mörg þeirra fyrir gítar. Um verk hans hefur verið sagt að þau; "often evokes nostalgic feelings of longing for the island of Puerto Rico, through such works as the romantic "Bacetos Sonoras" or the "Vineta Criolla" with its clave rhythm". Verk hans hafa verið hljóðrituð og flutt, m.a. í Frakklandi og Þýskalandi, undir stjórn þekkta tónlistarmanna svo sem Leo Brower. Cordero er þekktastur sem tónskáld en er jafnframt viðurkenndur hljóðfæraleikari. Hann þreytti frumraun sína í Carnegie Hall í New York árið 1978 og hefur síðan leikið á fjölda tónleika víðs vegar um heiminn. Concierto Borikién er upphaflega samið fyrir flautu og hljómsveit en Cordero gerði sjálfur þessa útsetningu fyrir flautu, píanó og tvo slagverksleikara.

Um flytjendur

Frank Aarnink stundaði nám í Hilversum og Amsterdam. Hann hefur spilað með mörgum sinfóníuhljómsveitum í Hollandi og tekið þátt í óperu- og söngleikjauppfærslum. Frá árinu 2001 hefur Frank verið fastráðinn sem slagverks- og pákuleikari við Sinfóníuhljómsveit Íslands.

Ingunn Hildur Hauksdóttir stundaði nám við Tónlistarskóla Hafnarfjarðar og Tónlistarskólann í Reykjavík. Hún lauk píanókennara- og einleikaraprófi vorið 1993 og hefur sótt námskeið m.a. hjá György Sebök, Dalton Baldwin og Nelitu True. Einnig hefur hún sótt einkatíma hjá Roger Vignoles með áherslu á meðleik. Ingunn hefur tekið þátt í ýmiss konar kammertónlist meðfram starfi sínu sem píanókennari og meðleikari við Tónlistarskóla Hafnarfjarðar, Tónlistarskóla Kópavogs og Tónlistarskólann í Reykjavík. Hún gaf nýverið út geisladisk ásamt Gretu Guðnadóttur, fiðluleikara, með tónlist eftir Helga Pálsson.

Pamela De Sensi er fædd árið 1975 í Róm en uppalin í Lamezia Terme á Suður-Ítalíu. Hún lauk einleikaraprófi 1998 frá "Conservatorio di Musica L. Perosi" í Campobasso á Ítalíu og svo lokaprófi í kammertónlist frá "Conservatorio di Musica S. Cecilia" í Róm 2002 . Einnig hefur hún sótt tíma hjá heimskunnum flautuleikurum, svo sem C. Klemm, M. Ziegler, F. Reengli, T. Wye og M. Larrieu. Hún hefur tekið þátt í mörgum keppnum sem einleikari og alltaf orðið í efstu sætum. Pamela hefur spilað á fjölda tónleika víðs vegar, bæði sem einleikari og í kammertónlist, og má þar nefna í Kasakstan, Mexíkó, á Íslandi, Færeyjum, Finnlandi, í Bandaríkjunum og víðs vegar á Ítalíu. Frá árinu 2008 hefur hún tekið virkan þátt í að skipuleggja tónleika fyrir börn þar sem m.a. hafa verið flutt verkin Pétur og úlfurinn eftir Prokofiev og Karnival dýranna eftir Saint Saëns: Auk þess hefur hún séð um Tónlist fyrir alla í Kópavogi 2008 og 2009. Í september 2010 sá hún um útgáfu bókarinnar Karnival dýranna, ásamt geisladiski sem út kom á vegum Forlagsins. Nú um stundir kennir Pamela við Tónlistarskóla Kópavogs, Tónskóla Sigursveins og Tónlistarskóla Árnesinga, en einnig er stýrir hún barnatónleikaröðinni "Töfrahurð" í Kópavogi og er framkvæmdastjóri Sumartónleika í Skálholti".

Steef van Oosterhout lauk einleikaraprófi frá Sweelinck Conservatorium í Amsterdam 1987. Starfaði í Hollandi m.a. með ASKO ensemble, Schönberg ensemble og Nederlands blazers ensemble. Einnig lék hann með flestum sinfóníuhljómsveitum í Hollandi, þ.á m. Concertgebouwhljómsveitinni í Amsterdam. 1991 var hann ráðinn sem slagverks- og pákuleikari í Sinfóníuhljómsveit Íslands, hefur að auki leikið með ýmsum kammertónlistarhópum, þ.á m. CAPUT og Contrasti, og er meðlimur í slagverkshópnum Bendu.

Aðgangseyrir

• Almennt miðaverð: 1.000 kr.
• Tónleikapassi, gildir á alla tónleika: 2.000 kr.
• Nemendur TK og aðstandendur: Ókeypis.