Úr aðalnámskrá tónlistarskóla:

Mennta- og menningarhlutverk tónlistarskóla er að

17. nóvember 2012

TKTK: Blóðheitar ástríður

Um verkin og höfundana

Efnisskráin er afar spennandi en hún samanstendur meistaraverkum fyrir flautu og gítar, hljóðfæri sem bæði eru þekkt fyrir fegurð, fágun og léttleika. 

Tónleikarnir hefjast á verkinu Sonatina Mexicana eftir ítalska tónskáldið og gítarleikarann C. Domeniconi (f. 1947) sem er þekktur bæði í heimi klassískrar og jazz tónlistar. Eftir tónlistarnámi og störf í Austur-Berlín ferðaðist hann til Tyrklands og varð heillaður af menningu landsins og fólkinu. Þar stofnar hann gítardeild við tónlistarháskólann í Istanbúl sem hefur að leiðarljósi að tengja tónlistarhefð Tyrklands við hefðbundna gítartónlist og gítarleik. Verkið Sonatina Mexicana samdi Domeniconi á Berlínarárunum, kvöld eitt þegar mikið partý var haldið af nágrönnum hans. Það má því ætla að áhrifa fjörs og veisluhalda gæti í verkinu. 

Annað verkið á efnisskránni, Trois Pieces, er eftir meistara blásaratónlistar, franska tónskáldið E. Bozza (1905-1991). Trois Pieces eða þrjú smáverk, sýna vel kunnáttu hans á flautunni. Í verkinu notar hann tæknilegamöguleika flautunnar út í það ítrasta og litar með fallegum gítareffektun s.s. yfirtónum og pizzicato.

Tónskáldið og gítarleikarinn Ernesto Cordero (f. 1946) á þriðja verkið á efnisskránni Fantasiu Mulata. Cordero fæddist í New York en ólst upp í Puerto Rico. Hann á glæstan feril bæði sem tónskáld og gítarleikari. Fremstu tónlistarmenn og hópar víða um heim leika verk hans, útgáfufyrirtækin keppast um útgáfuréttinn og sem gítarleikari hlaut hann m.a. frábæra dóma fyrir tónleika í Carnegie Recital Hall í New York. Í Fantasia Mulata leitast tónskáldið við að endurskapar hljóma frumskógarins í gegnum hljóðfærin. 

Tvö verk eftir hið vinsæla braselíska tónskáld Heitor Villa-Lobos (1887-1959) eru næst á efnisskránni. Fyrst hið þekkta verk Bachiana Brasileira nr. 5, einskonar ljóð án orða og svo er verkið Distribuição de Flôres, þar sem flautuleikarinn syngur fallegar línur nánast við áslátt gítarleikarans. 

Entr´acte, verk Frakkans vinsæla Jacques Ibert (1890-1962) er næst á efnisskránni. Tónlist hans getur verið hátíðleg og lífleg, ljóðræn og innblásin og á stundum lituð af fágaðri kímni, en í grunnin er tónlist hans einna helst skyld hinni klassísku hefð. Verkið, Entr´acte, fyrir flautu og gítar er samið 1937 þegar Ibert dvaldi í Róm sem skólastjóri menningarstofnunar Frakklands þar í borg. 

Í lokaverki tónleikanna er áheyrendum boðið upp í tangó með argentíska tónskáldinu Astor Piazzolla (1921-1992) í verki hans Tango Suite: Histoire du Tango. Tónverkið spannar þróun dansins með fjúkandi sveiflu og glæsilegum leik.

Um flytjendur

Pamela De Sensi lauk einleikaraprófi 1998 frá "Conservatorio di Musica L. Perosi” í Campobasso á Ítalíu og svo lokaprófi í kammertónlist frá "Conservatorio di Musica S.Cecilia" í Róm 2002 . Einnig hefur hún sótt tíma hjá heimskunnum flautuleikurum s.s. C. Klemm, M.Ziegler, F. Reengli, T. Wye, M. Larrieu. Hún hefur tekið þátt í mörgum keppnum sem sólisti og utan Ítalíu og alltaf orðið í efstu sætum. Pamela hefur spilað á fjölda tónleika víðs vegar bæði sem einleikari sem og í kammertónlist og má þar nefna í Frakklandi, Spáni, Englandi, Kasakstan, Mexíkó, Íslandi, Færeyjum, Finnlandi, í Bandaríkjunum og víðsvegar á Ítalíu. Hún er stofnandi tónleikaraðarinnar “Töfrahurð„ í Salnum, Kópavogi og meðhöfundur bókarinnar Karnival Dýranna sem Forlagið gefur út. Hún kennir við Tónlistarskóla Kópavogs, Tónskóla Sigursveins,Tónlistarskóla Árnes, Selfossi.

Páll Eyjólfsson lauk einleikaraprófi á gítar frá Gítarskólanum, Eyþóri Þorlákssyni og í hliðargreinum frá Tónlistarskólanum í Reykjavík. Páll fór í framhaldsnám til Alcoy á Spáni þar sem hann nam í einkatímum hjá José Luís González, sem var einn af nemendum Andrés Segovia. Fjölmargir tónlistarnemar hafa sótt gítartíma til Páls í ýmsum tónlistarskólum í Reykjavík, en hann hefur samhliða kennslunni haldið tónleika víðsvegar um landið og í nokkrum Evrópulöndum. Ríkisútvarpið hefur gert upptökur með leik hans, m.a. með Sinfóníuhljómsveit Íslands, gítarkonsert eftir John A. Speight, og áður hafa komið út geisladiskar þar sem Páll spilar með öðrum hljóðfæraleikurum. Árið 2009 kom út einleiksdiskur þar sem Páll leikur verk eftir spænska tónskáldið Tárrega og brasilíska tónskáldið Villa-Lobos.

Aðgangseyrir

• Almennt miðaverð: 1.000 kr.
• Nemendur TK og aðstandendur: Ókeypis.

Tónleikarnir eru styrktir af Kópavogsbæ og haldnir af kennurum Tónlistarskóla Kópavogs í samvinnu við Salinn og Tónlistarskóla Kópavogs.