Tónlistarskóli Kópavogs


	Úr aðalnámskrá tónlistarskóla: Mennta- og menningarhlutverk tónlistarskóla er að
	-	veita öllum, sem þess æskja, færi á að kynnast tónlistarnámi af eigin raun
	-	skapa nemendum tækifæri til tónlistarflutnings, jafnt innan skóla sem utan

FORSÍÐA

Fréttir 2015

30. desember 2015

Fyrsti kennsludagur eftir jólafrí

Starfsfólk Tónlistarskóla Kópavogs óskar nemendum, aðstandendum þeirra og velunnurum skólans farsældar á nýju ári og þakkar samstarfið á árinu 2015. Kennsla að loknu jólaleyfi hefst samkvæmt stundaskrá mánudaginn 4. janúar 2016.

16. desember 2015

Jólatónleikar framundan

Í vikunni er mikið um að vera í skólanum. Ýmsir kennarar eru með jólasamspil eða tónleika með sínum nemendum. Auk þess eru eftirfarandi jólatónleikar á dagskrá þar sem hljóðfæra- og söngnemendur á ýmsum námsstigum koma fram.

Miðvikudaginn 16. desember kl. 18:00 í Hjallakirkju.

Fimmtudaginn 17. desember kl. 18:00 í Kópavogskirkju.

Aðgangur að tónleikunum er ókeypis og eru allir velkomnir:

14. desember 2015

Söngdeild flytur jólaóperuna Amahl og næturgestirnir

Barna- og jólaóperan Amahl og næturgestirnir eftir Gian Carlo Menotti verður sýnd þriðjudaginn 15. desember 2015 kl. 18.00 og fimmtudaginn 17. desember 2015 kl. 20.00 í Salnum undir leikstjórn Önnu Júlíönu Sveinsdóttur, söngkennara Tónlistarskóla Kópavogs. Uppfærslan tekur eina klukkustund og aðgangur er ókeypis á meðan húsrúm leyfir.

Sagan fjallar um fatlaða drenginn Amahl og fátæka móður hans. Hann er úti að spila á flautu og sér leiðarstjörnuna á björtum himni og segir mömmu sinni frá því en hún trúir honum ekki. Vitringarnir þrír með fullt af gulli og gjöfum knýja dyra og biðja um húsaskjól á leið þeirra til Betlehem að sjá nýfædda Jesúbarnið. Þegar allir eru sofnaðir undrast móðirin allt þetta gull á meðan hún og Amahl svelta og verða að betla. Hún freistast til að taka smá gull og þá vaknar þjónn vitringanna, ræðst á hana og kallar hana þjóf um leið og Amahl reynir að verja mömmu sína. Vitringarnar vakna og segja henni frá Jesúbarninu. Móðirin vill skila gullinu aftur og Amahl ætlar að gefa Jesú hækjuna sína. Þegar hann réttir vitringunum hækjuna læknast hann og fær mátt í fótinn, getur hoppað, hlaupið og dansað. Allir gleðjast yfir þessu kraftaverki og vitringarnir taka Amahl með til Betlehem til að hitta Jesúbarnið.

7. desember 2015

Kennsla fellur niður eftir hádegi vegna veðurs

Kennsla í Tónlistarskóla Kópavogs fellur niður eftir hádegi í dag vegna yfirvofandi óveðurs.

6. desember 2015

Aðventutónleikar í Salnum á miðvikudag

Aðventutónleikar verða haldnir í Salnum miðvikudaginn 9. desember nk. og hefjast þeir kl. 18:00. Á tónleikunum leikur strengjasveit yngri nemenda undir stjórn Unnar Pálsdóttur. Auk þess flytja nokkrir nemendur einleiks- og samleiksverk. Aðgangur að tónleikunum er ókeypis og eru allir velkomnir.

2. desember 2015

Tónleikar rytmískrar deildar á laugardag

Tónleikar rytmískrar deildar Tónlistarskólans verða haldnir í Salnum laugardaginn 5. desember kl. 14:00. Nemendur og kennarar bjóða áheyrendur velkomna á meðan húsrúm leyfir.

1. desember 2015

Jólatónleikar forskóladeildar

Jólatónleikar forskóladeildar verða haldnir í Salnum laugardaginn 5. desember kl. 10:00 og 11:15. Allir forskólanemendur koma fram og fá þeir upplýsingar hjá kennurum sínum um það hvenær þeir eiga að mæta. Hvorir tónleikar eru rúmlega hálfrar klukkustundar langir. Aðgangur er ókeypis og eru allir velkomnir.

1. desember 2015

Jólatónleikar Suzukideildar

Jólatónleikar Suzukideildar skólans verða haldnir í Hjallakirkju á morgun, miðvikudaginn 2. desember, kl. 17:30. Á tónleikunum leika Suzukinemendur á fiðlu, gítar, píanó, selló, víólu og þverflautu. Aðgangur er ókeypis og allir velkomnir.

29. nóvember 2015

Aðventutónleikar á mánudag og þriðjudag

Fyrstu skólatónleikarnir á aðventunni verða haldnir í Salnum á morgun, mánudaginn 30. nóvember, kl. 18:15 og 19:30. Einnig verða haldnir tónleikar í Salnum þriðjudaginn 1. desember kl. 18:00. Efnisskrá allra tónleikanna er fjölbreytt og á fyrri mánudagstónleikunum leikur m.a. strengjasveit eldri nemenda undir stjórn Unnar Pálsdóttur. Aðgangur að tónleikunum er ókeypis og eru allir velkomnir.

22. nóvember 2015

Tvennir skólatónleikar í Salnum

Skólatónleikar verða haldnir í Salnum mánudaginn 23. nóvember kl. 19:30 og þriðjudaginn 24. nóvember kl. 18:00. Efnisskrá tónleikanna er fjölbreytt og fram koma nemendur á ýmsum aldri. Aðgangur að tónleikunum er ókeypis og allir velkomnir.

15. nóvember 2015

Framhaldsprófstónleikar Kristínar Þóru Pétursdóttur

Kristín Þóra Pétursdóttir, bassaklarínettunemandi, heldur framhaldsprófstónleika sína í Salnum miðvikudaginn 18. nóvember nk. kl. 20. Eru tónleikarnir lokahluti framhaldsprófs hennar við skólann. Á fjölbreyttri efnisskrá er að finna verk eftir David Bennett Thomas, Alfred Prinz, Rudolf Jettel, Wayne Siegel og Hróðmar I. Sigurbjörnsson. Meðleikarar Kristínar Þóru á tónleikunum eru Helga Bryndís Magnúsdóttir, píanóleikari, og Sigríður Hjördís Indriðadóttir, flautuleikari. Aðgangur að tónleikunum er ókeypis og allir eru velkomnir.

15. nóvember 2015

Tónleikar

Skólatónleikar verða haldnir í Salnum þriðjudaginn 17. nóvember kl. 18:00. Aðgangur að tónleikunum er ókeypis og allir eru velkomnir.

9. nóvember 2015

Tvennir skólatónleikar í Salnum í vikunni

Skólatónleikar verða haldnir í Salnum mánudaginn 9. nóvember kl. 19:30 og miðvikudaginn 11. nóvember kl. 18:00. Efnisskrá er fjölbreytt og allir eru velkomnir.

31. október 2015

Skólatónleikar í Salnum

Skólatónleikar verða haldnir í Salnum mánudaginn 2. nóvember kl. 19:30. Aðgangur að tónleikunum er ókeypis og allir velkomnir.

22. október 2015

Vetrarfrí

Vakin er athygli á því að vetrarfrí verður í Tónlistarskólanum mánudaginn 26. og þriðjudaginn 27. október næstkomandi.

20. október 2015

Skólatónleikar í Salnum í dag

Tvennir skólatónleikar verða haldnir í Salnum í dag, þriðjudaginn 20. október. Fyrri tónleikarnir hefjast kl. 18:00 en þeir seinni kl. 19:00. Efnisskrá er fjölbreytt og allir eru velkomnir.

16. október 2015

Hörputónleikar í Salnum

Hörpuleikararnir Edward Witsenburg og Elísabet Waage koma fram á tónleikum í Salnum mánudaginn 19. október kl. 18:00-19:00. Tónleikarnir eru haldnir í samstarfi Salarins og Tónlistarskóla Kópavogs og eru lokapunktur á masterklass Edward Witsenburg fyrir unga hörpuleikara dagana 17.-19. október á vegum skólans. Tónleikarnir eru öllum opnir.

Edward Witsenburg er mjög þekktur í hörpuheiminum sem einleikari og kennari. Hann hefur starfað í áratugi við Tónlistarháskólann í Den Haag og Mozarteum í Salzburg og hefur því alið upp nokkrar kynslóðir ungra hörpuleikara sem margir hverjir hafa náð langt í list sinni. Edward er þekktur fyrir fleira en einstaka kennsluhæfileika; sem hörpuleikari hefur hann auk tækni sinnar og túlkunar alltaf verið frægur fyrir kröftugan tón. Edward starfaði oftsinnis með hinum fræga stjórnanda Nikolaus Harnoncourt, m.a. í uppfærslun á óperum eftir Monteverdi. Hann hefur leikið inn á margar plötur og geisladiska, bæði einleik og kammertónlist.

Elísabet Waage stundaði píanó- og hörpunám við Tónlistarskólann í Reykjavík. Hún lauk einleikara- og kennaraprófi á hörpu frá Konunglega Tónlistarháskólanum í den Haag í Hollandi, hjá Edward Witsenburg. Elísabet leggur mikla stund á kammermúsík, mest í dúóformi en einnig í stærri hópum, s.s. Caput, en hefur auk þess starfað með ýmsum sinfóníuhljómsveitum. Elísabet er hörpukennari við Tónlistarskóla Kópavogs.

Á tónleikunum í Salnum munu þau Edward og Elísabet leika þjóðlög frá Skotlandi, Írlandi, Englandi og Wales í útsetningum Ann McDearmid fyrir tvær hörpur. Keltar hafa alltaf notað hörpuna mikið í sinni músík og Bretlandseyjar eru allar miklar hörpueyjar.

15. október 2015

Skólahúsið lokað á morgun, föstudag

Vegna vinnu við hreinsun á loftræstikerfi verður aðalhúsnæði tónlistarskólans í Tónlistarhúsi Kópavogs, Hamraborg 6, lokað á morgun, föstudaginn 16. október og fellur kennsla í skólahúsnæðinu því niður. Kennsla í safnaðarheimili Kópavogskirkju og á vegum skólans í grunnskólum verður samkvæmt stundaskrá.

12. október 2015

Skólatónleikar í Salnum

Fyrstu skólatónleikar starfsársins verða haldnir í Salnum í dag, mánudaginn 12. október, kl. 19:30. Aðgangur að tónleikunum er ókeypis og allir velkomnir.

4. september 2015

Fyrstu tímar í forskóladeild

Kennsla í forskóladeild hefst samkvæmt stundaskrá mánudaginn 7. september nk. Skólinn mun láta nemendur vita hvenær þeir eiga að mæta. Nánari upplýsingar má einnig fá á skrifstofu skólans.

4. september 2015

Fyrstu tímar í tónfræðagreinum

Kennsla í tónfræðagreinum í grunn- og miðnámi hefst samkvæmt stundaskrá mánudaginn 7. september nk. og verða nemendur látnir vita hvenær þeir eiga að mæta í tónfræðatíma. Nánari upplýsingar má einnig fá á skrifstofu skólans.

Kennsla í tónlistarsögu hefst þriðjudaginn 8. september kl. 17:00. Kennari er Kolbeinn Bjarnason. Kennsla í tónheyrn og hljómfræði hefst miðvikudaginn 9. september. Arnþór Jónsson kennir tónheyrn í vetur og Atli Ingólfsson kennir hljómfræði. Nánari upplýsingar um kennslutíma í þessum tveimur greinum eru veittar á skrifstofu skólans.

Anna Júlíana Sveinsdóttir mun kenna sögu ítalska sönglagsins á mánudögum kl. 18:00-19:00 og hefst kennsla mánudaginn 14. september. Raftónlistarsaga verður kennd á þriðjudags- og miðvikudagskvöldum á vorönn. Nemendum í framhaldsnámi gefst auk þess kostur á valgrein í tónveri. Nánari upplýsingar um valgreinar eru veittar á skrifstofu skólans.

18. ágúst 2015

Skólasetning

Tónlistarskóli Kópavogs verður settur í Salnum mánudaginn 24. ágúst kl. 17:00.

Nemendur eru beðnir um að skila stundaskrám sínum úr grunnskólum eða framhaldsskólum á skrifstofu skólans í síðasta lagi 24. ágúst.

22. júní 2015

Sumarleyfi

Skrifstofa Tónlistarskóla Kópavogs verður lokuð frá 22. júní til 10. ágúst 2015.

4. júní 2015

Frá skólaslitum 2015

Tónlistarskóla Kópavogs var slitið mánudaginn 1. júní sl. og lauk þar með 52. starfsári skólans. Að þessu sinni luku fjórir nemendur framhaldsprófi í hljóðfæraleik, þau Bryndís Guðjónsdóttir, söngvari, Heiður Lára Bjarnadóttir, sellóleikari, Sigurrós Halldórsdóttir, fiðluleikari, og Sóley María Nótt Hafþórsdóttir, sellóleikari. Á myndinni má sjá útskriftarnemana, f.v. Sóley María, Sigurrós, Heiður Lára og Bryndís.

Eftirtaldir nemendur fengu viðurkenningar fyrir framúrskarandi árangur á áfangaprófum:

Fyrir ágætiseinkunn á grunnprófi í hljóðfæraleik:

Unnur Hlíf Rúnarsdóttir, píanó
Hrafnhildur Davíðsdóttir, píanó
Bergdís Rúnarsdóttir, fiðla
Helena Rós Jónsdóttir, píanó
Ingibjörg Ásta Guðmundsdóttir, píanó
Snæfríður María Björnsdóttir, einsöngur
Anna Pálsdóttir, píanó
Díana Snædís Matchett, píanó
Katla Rut Robertsdóttir Kluvers, píanó
Þórhildur Anna Traustadóttir, píanó
Arndís Ósk Einarsdóttir, fiðla
Atli Mar Baldursson, klarínetta
Brynja Finsen, píanó

Fyrir ágætiseinkunn á miðprófi í hljóðfæraleik:

Ástráður Sigurðsson, píanó
Dagur Bjarnason, kontrabassi

Fyrir hæstu einkunn á grunnprófi í tónfræðagreinum:

Andrea Ósk Jónsdóttir

Fyrir ágætiseinkunn á miðprófi í tónfræðagreinum:

Gústaf Darrason

29. maí 2015

Skólaslit

Skólaslit og afhending einkunna verða mánudaginn 1. júní nk. og hefst athöfnin í Salnum kl. 17:00.

25. maí 2015

Blásaramaraþon

Miðvikudaginn 27. maí fer fram blásaramaraþon Tónlistarskóla Kópavogs í fyrsta sinn. Maraþonið fer fram í húsnæði Tónlistarskólans á jarðhæð Safnaðarheimilis Kópavogskirkju við Hábraut. Blásturinn hefst kl. 15:00 og er áætlað að spila til kl. 18:00. Áheyrendur eru velkomnir meðan húsrúm leyfir.

25. maí 2015

Síðustu skólatónleikar skólaársins

Á morgun, þriðjudaginn 26. maí, verða haldir þrennir skólatónleikar í Salnum, kl. 18:00, 19:00 og 20:00 og eru þetta síðustu almennu nemendatónleikar skólaársins. Efnisskrá tónleikanna er fjölbreytt og allir eru velkomnir.

25. maí 2015

Píanómaraþon

Á morgun, þriðjudaginn 26. maí fer fram árlegt píanómaraþon Tónlistarskóla Kópavogs. Eins og undanfarin ár fer maraþonið fram í húsnæði Tónlistarskólans á jarðhæð Safnaðarheimilis Kópavogskirkju við Hábraut. Píanóleikurinn hefst kl. 13 og er áætlað að spila til kl. 19:00. Áheyrendur eru velkomnir meðan húsrúm leyfir.

20. maí 2015

Skólatónleikar í Salnum

Nemendatónleikar verða í Salnum fimmtudaginn 21. maí kl. 17:45. Aðgangur að tónleikunum er ókeypis og allir velkomnir.

17. maí 2015

Framhaldsprófstónleikar í sellóleik

Á morgun, mánudaginn 18. maí, mun Sóley María Nótt Hafþórsdóttir, sellóleikari, halda framhaldsprófstónleika sína frá Tónlistarskóla Kópavogs. Eru tónleikarnir hluti framhaldsprófs hennar við skólann.Tónleikarnir verða í Salnum, Tónlistarhúsi Kópavogs og hefjast kl. 20:00. Á tónleikunum verða flutt verk eftir J.S. Bach, L.v. Beethoven, J. Brahms, C. Saint-Saëns og D. Shostakovitch. Meðleikarar á tónleikunum eru Helga Bryndís Magnúsdóttir, píanóleikari, Nanna Óttarsdóttir, fiðluleikari, Silja Sigrún Ólafsdóttir, fiðluleikari og Elín Pálsdóttir, víóluleikari. Aðgangur að tónleikunum er ókeypis og allir eru velkomnir.

17. maí 2015

Píanótónleikar í Safnaðarheimilinu

Mánudaginn 18. maí kl. 18.00 mun Ingibjörg Helga Steingrímsdóttir, píanónemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru verk eftir Leif Þórarinsson, J.S. Bach, D. Shostakovich og F. Chopin. Auk þess frumflytur Ingibjörg Helga eigið verk, Öldugang. Aðgangur að tónleikunum, sem eru um 30 mínútna langir, er ókeypis og allir eru velkomnir.

15. maí 2015

Raftónlist í Tónlistarsafni Íslands

Nemendur í tölvutónsmíðum við Tónver Tónlistarskóla Kópavogs hafa undanfarin mánuð átt við upptökur Tónlistarsafns Íslands af viðtölum við frumbyggja Kópavogs. Upptökurnar nota þeir á skapandi hátt í hljóðverk sem flutt verða á hádegistónleikum í Tónlistarsafninu á morgun, laugardaginn 16. maí, kl. 12. Aðgangur er ókeypis og allir velkomnir.

11. maí 2015

Píanótónleikar í Safnaðarheimilinu

Miðvikudaginn 13. maí kl. 20.00 mun Kristín Nanna Einarsdóttir, píanónemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru Impromptu op. 142 nr. 2 í As-dúr eftir Franz Schubert, Sónata í E-dúr op. 14 nr. 1 eftir Ludwig van Beethoven og Næturljóð í cís-moll, op. posth. eftir Frédérik Chopin. Aðgangur að tónleikunum, sem eru um 30 mínútna langir, er ókeypis og allir eru velkomnir.

10. maí 2015

Skólatónleikar í Salnum á morgun

Skólatónleikar verða haldnir í Salnum mánudaginn 11. maí kl. 18:00 og kl. 19:00. Aðgangur að tónleikunum er ókeypis og allir velkomnir.

5. maí 2015

Tvennir skólatónleikar í Salnum á miðvikudag

Skólatónleikar verða haldnir í Salnum á morgun, miðvikudaginn 6. maí kl. 18:00 og 19:00. Aðgangur að tónleikunum er ókeypis og allir velkomnir.

3. maí 2015

Tvennir skólatónleikar á morgun

Tvennir skólatónleikar verða haldnir í Salnum á morgun, mánudaginn 4. maí. Fyrri tónleikarnir hefjast kl. 18:00 og þeir síðari kl. 19:15. Á tónleikunum flytja nemendur á ýmsum aldri fjölbreytta tónlist. Aðgangur að tónleikunum er ókeypis og eru allir velkomnir.

23. apríl 2015

Söngdeild flytur Töfraflautuna

Það er orðin rík hefð fyrir þvi að Tónlistarskóli Kópavogs setji óperur á svið. Í þetta sinn verður Töfraflautan eftir W.A. Mozart frumsýnd sunnudaginn 25. apríl kl. 17.00 í Salnum. Önnnur sýning verður sunnudaginn 26. apríl kl. 20.00. Papageno mun rekja söguþráðinn á milli söngatriða til að auðvelda börnum að átta sig á ævintýrinu um egypska prinsinn Tamino sem er villtur í ókunnu landi og verður ástfanginn af Paminu, dóttur næturdrottningarinnar. Papageno þarf einnig að leggja ýmislegt á sig en hreppir loks sína eigin Papagenu. Þessi opera er tilvalin fjölskylduskemmtun og aðgangur er ókeypis.

Leikstjórn: Anna Júlíana Sveinsdóttir, söngkennari skólans
Píanóleikur: Selma Guðmundsdóttir
Flautuleikur Sólveig Magnúsdóttir
Klukkuspil: Helgi Þorleiksson
Hönnun og gerð leikmuna: Jón Pétur Friðriksson
Íslensk þýðing: Þrándur Thoroddsen, Bövar Guðmundsson og Þorsteinn Gylfason.

Papageno og sögumaður: Jón Pétur Friðriksson
Næturdrottningin: Bryndís Guðjónsdóttir
Tamino: Dagur Þorgrímsson (nemandi Þóru Einarsdóttur í Listaháskóla Íslands)
Pamina: Hugrún Hanna Stefánsdóttir
Sarastro: Sigurjón Örn Böðvarsson
Papagena: Tinna Jóhanna Magnusson
Meyjar næturdrottningarinnar: Una Björg Jóhannsdóttir, Heiðrún Ösp Hauksdóttir, Sigrún Gyða Sveinsdóttir
Drengir: Snæfríður María Björnsdóttir, Andri Páll Guðmundsson, María Sigríður Halldórsdóttir, Arna Björk Einarsdóttir

19. apríl 2015

Framhaldsprófstónleikar Bryndísar Guðjónsdóttur

Bryndís Guðjónsdóttir, söngnemandi, heldur framhaldsprófstónleika sína í Salnum mánudaginn 20. apríl nk. kl. 20. Á fjölbreyttri efnisskrá er að finna verk eftir Giovanni Paisello, Georg Friedrich Händel, Franz Schubert, Robert Schumann, Edvard Grieg, Johann Strauss og Wolfgang Amadeus Mozart. Meðleikari Bryndísar á tónleikunum er Selma Guðmundsdóttir, píanóleikari. Einnig koma Stefán Ólafur Ólafsson, klarinettleikari og Tinna Jóhanna Magnusson, söngnemandi, fram með Bryndísi. Aðgangur að tónleikunum er ókeypis og allir eru velkomnir.

16. apríl 2015

Framhaldsprófstónleikar Heiðar Láru Bjarnadóttur

Í dag, miðvikudaginn 16. apríl, mun Heiður Lára Bjarnadóttir, sellóleikari, halda framhaldsprófstónleika sína frá Tónlistarskóla Kópavogs. Eru tónleikarnir hluti framhaldsprófs hennar við skólann.Tónleikarnir verða í Salnum, Tónlistarhúsi Kópavogs og hefjast kl. 20:00. Á tónleikunum verða flutt verk eftir Ingvar Lidholm, Johann Sebastian Bach, Franz Joseph Haydn, Bohuslav Martinu og Astor Piazzolla. Meðleikarar á tónleikunum eru Helga Bryndís Magnúsdóttir, píanóleikari, Agnes Eyja Gunnarsdóttir, fiðluleikari og Lilja María Ásmundsdóttir, píanóleikari. Aðgangur að tónleikunum er ókeypis og allir eru velkomnir.

10. apríl 2015

Hörputónleikar í Safnaðarheimilinu

Laugardaginn 11. apríl kl. 14.00 munu Fríða Rún Frostadóttir og Hannah Rós Jónasdóttir, hörpunemendur í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru verk eftir D. Scarlatti, B. Andrés, F.J. Naderman, S. Natra, A. Hasselmans, C. Debussy og E. Granados, auk þjóðlaga frá Skotlandi og Japan. Aðgangur að tónleikunum er ókeypis og allir eru velkomnir.

9. apríl 2015

Tónleikaröð kennara: Eva Þyri og Birna spila á tvö píanó

Næstkomandi þriðjudag, þann 14. apríl, munu píanóleikararnir Birna Hallgrímsdóttir og Eva Þyri Hilmarsdóttir leika verk fyrir tvö píanó í Salnum í Kópavogi. Á efniskrá verða verk eftir Debussy, Milhaud, Arvo Pärt og Lutoslawski.

Tónleikarnir hefjast kl. 19 og munu standa í tæpa klukkustund. Almennur aðgangseyrir er 2000 kr. en frítt er fyrir nemendur Tónlistarskóla Kópavogs og aðstandendur.

22. mars 2015

Skólatónleikar í Salnum

Skólatónleikar verða haldnir í Salnum mánudaginn 23. mars kl. 19:30. Aðgangur að tónleikunum er ókeypis og allir velkomnir.

22. mars 2015

Vel heppnaðir tónleikar rytmískrar deildar

Fyrstu tónleikar nýrrar rytmískrar deildar Tónlistarskólans voru haldnir í Salnum í gær, laugardaginn 21. mars. Auk nemenda skólans voru gestaflytjendur á tónleikunum nemendur og kennarar úr rytmískri deild Tónlistarskóla Hafnarfjarðar. Voru tónleikarnir vel sóttir og fóru áheyrendum glaðir heim að loknum stórskemmtilegum tónleikum.

15. mars 2015

Tónleikaröð kennara: Fjórar á ferðalagi

Þriðjudaginn 17. mars nk. kl. 19:00 verða haldnir tónleikar í tónleikaröð kennara Tónlistarskólans undir yfirskriftinni "Fjórar á ferðalagi". Flytjendur eru Ásdís Hildur Runólfsdóttir, víóluleikari, Gunnhildur Halla Guðmundsdóttir, sellóleikari, Margrét Stefánsdóttir, flautuleikari, og Sigurlaug Eðvaldsdóttir, fiðluleikari. Á tónleikunum verða flutt verða eftirtalin verk:

W.A. Mozart; Kvartett í D-dúr KV 285
Volkmar Andreae; Kvartett op.43
Aaron Copland; Threnodies 1 og 2
Astor Piazzolla; Oblivion

Almennur aðgangseyrir er 2000 kr. en ókeypis er fyrir nemendur og aðstandendur þeirra.

8. mars 2015

Skólatónleikar í Salnum

Skólatónleikar verða haldnir í Salnum mánudaginn 9. mars kl. 19:30. Efnisskrá er fjölbreytt og allir eru velkomnir.

1. mars 2015

Hljóðfærakynning fyrir forskólanemendur

Hljóðfærakynning fyrir nemendur sem ljúka forskólanámi í vor og aðstandendur þeirra fer fram í Salnum fimmtudaginn 5. mars kl. 17.15. Í tali, tónum og myndum verða kynnt þau hljóðfæri sem kennt er á í skólanum. Forráðamenn eru hvattir til að fjölmenna með börnum sínum.

1. mars 2015

Tvennir skólatónleikar í Salnum

Tvennir skólatónleikar verða haldnir í Salnum miðvikudaginn 4. mars. Fyrri tónleikarnir hefjast kl. 18:00 og þeir seinni kl. 19:00. Efnisskrá er fjölbreytt og allir eru velkomnir.

19. febrúar 2015

Vetrarfrí

Vakin er athygli á því að vetrarfrí verður í Tónlistarskólanum mánudaginn 23. og þriðjudaginn 24. febrúar næstkomandi.

15. febrúar 2015

Skólatónleikar í Salnum

Skólatónleikar verða haldnir í Salnum mánudaginn 16. febrúar, kl. 19:30. Aðgangur að tónleikunum er ókeypis og allir velkomnir.

8. febrúar 2015

Masterklass-námskeið og tónleikar í Salnum

Næstkomandi þriðjudag 10. febrúar mun píanóleikarinn Julia Mustonen-Dahlkvist heimsækja tónlistarskólann ásamt tveimur nemendum sínum, þeim Per Olsson og Ernst Erlansson en Julia er yfirmaður píanódeildar tónlistarháskólans í Ingesund í Svíþjóð. Nokkrum píanónemendum Tónlistarskólans gefst kostur á að njóta leiðsagnar hennar á masterklass-námskeiði í Salnum. Að því búnu munu Per Olsson og Ernst Erlansson munu flytja píanóverk eftir Roman, Stenhammar og Chopin. Dagskráin fer fram í Salnum milli kl. 18 og 20 og eru nemendur og aðstandendur hvattir til að láta þennan viðburð ekki fram hjá sér fara.

8. febrúar 2015

Skólatónleikar á mánudag

Skólatónleikar verða haldnir í Salnum á morgun, mánudaginn 9. febrúar kl. 19:30. Aðgangur að tónleikunum er ókeypis og eru allir velkomnir:

1. febrúar 2015

Tvennir skólatónleikar í Salnum

Tvennir skólatónleikar verða haldnir í Salnum í vikunni, fyrri tónleikarnir verða þriðjudaginn 3. febrúar kl. 18:00 og þeir síðari miðvikudaginn 4. febrúar kl.18:30. Fram koma nemendur á ýmsum námsstigum og fjölbreytt tónlist er á efnisskránni. Aðgangur að tónleikunum er ókeypis og allir velkomnir.

28. janúar 2015

Tónleikar Sinfóníuhljómsveitar tónlistarskólanna

Laugardaginn 31. janúar nk. kl. 16:00 heldur Sinfóníuhljómsveit tónlistarskólanna tónleika í Langholtskirkju og eru nemendur og forráðamenn þeirra hvattir til að láta þennan viðburð ekki fram hjá sér fara.

Hljómsveitina skipa rúmlega 80 tónlistarnemar úr tónlistarskólum á höfuðborgarsvæðinu og nágrenni. Stjórnandi er Guðmundur Óli Gunnarsson. Einleikari með hljómsveitinni er Helgi Þorleiksson sem stundar nám í slagverksleik hjá Steef van Oosterhout í Tónlistarskóla Garðabæjar og mun ljúka framhaldsprófi frá skólanum í vor. Helgi hefur meðal annars leikið með Ungsveit Sinfóníuhljómsveitar Íslands, Sinfóníuhljómsveit unga fólksins, Sinfóníuhljómsveit tónlistarskólana ásamt fjölmörgum lúðrasveitum, djass-samspilum og í stórsveitum tónlistarskóla Garðabæjar og Hafnarfjarðar.

Á tónleikunum verða flutt verða eftirtalin verk:

Arturo Márquez: Conga del Fuego Nuevo
Áskell Másson: Konsertþáttur fyrir litla trommu og hljómsveit
Antonin Dvorák: Sinfónía nr. 8 í G-dúr

Almennur aðgangseyrir er 2500 kr. en 1000 kr. fyrir nemendur og eldri borgara. Aðgöngumiðar verða seldir við innganginn.

25. janúar 2015

Skólatónleikar í Salnum

Skólatónleikar verða haldnir í Salnum á morgun, mánudaginn 26. janúar, kl. 19:30. Aðgangur að tónleikunum er ókeypis og allir velkomnir.

4. janúar 2015

Framhaldsprófstónleikar Sigurrósar Halldórsdóttur

Mánudaginn 5. janúar nk. mun Sigurrós Halldórsdóttir, fiðluleikari, halda framhaldsprófstónleika sína frá Tónlistarskóla Kópavogs. Eru tónleikarnir hluti framhaldsprófs hennar við skólann. Tónleikarnir verða í Salnum, Tónlistarhúsi Kópavogs og hefjast kl. 20:00.

Á tónleikunum verða flutt verk eftir Pietro Mascagni, Johann Sebastian Bach, Wolfgang Amadeus Mozart, Jón Nordal og Robert Schumann. Meðleikari á tónleikunum er Richard Simm, píanóleikari.

Aðgangur að tónleikunum er ókeypis og allir eru velkomnir.