Tónlistarskóli Kópavogs


	Úr aðalnámskrá tónlistarskóla: Mennta- og menningarhlutverk tónlistarskóla er að
	-	veita öllum, sem þess æskja, færi á að kynnast tónlistarnámi af eigin raun
	-	skapa nemendum tækifæri til tónlistarflutnings, jafnt innan skóla sem utan

FORSÍÐA

Fréttir 2016

28. desember 2016

Fyrsti kennsludagur eftir jólafrí

Starfsfólk Tónlistarskóla Kópavogs óskar nemendum, aðstandendum þeirra og velunnurum skólans farsældar á nýju ári og þakkar samstarfið á árinu 2016. Kennsla að loknu jólaleyfi hefst samkvæmt stundaskrá miðvikudaginn 4. janúar 2017.

12. desember 2016

Jólatónleikar í þessari viku

Í þessari viku verða eftirfarandi jólatónleikar. Allir tónleikarnir verða haldnir í Salnum nema tónleikarnir föstudaginn 16. desember sem fram fara í Fríkirkjunni Kefas. Aðgangur að tónleikunum er ókeypis og eru allir velkomnir:

Mánudaginn 12. desember kl. 18:15 munu strengjasveit I, fiðlusveit og þverflautusveit leika, auk þess sem nemendur leika einleiksverk.
Þriðjudaginn 13. desember kl. 18:00 leika blokkflautunemendur á ýmsum námsstigum og á tónleikum kl. 19:15 munu nemendur leika á ýmis hljóðfæri.
Miðvikudaginn 14. desember kl. 19:00 og 20:00 munu nemendur leika á ýmis hljóðfæri.
Föstudaginn 16. desember kl. 17:30 verða tónleikar Suzukinemenda og koma þar fram nemendur á fiðlu, víólu, selló, gítar, píanó og þverflautu. Áréttað skal að þessir tónleikar eru í nýju húsnæði skólans í Fríkirkjunni Kefas, Fagraþingi 2a.

5. desember 2016

Aðventutónleikar í Salnum

Skólatónleikar verða haldnir í Salnum þriðjudaginn 6. desember kl. 18:00. Aðgangur að tónleikunum er ókeypis og allir velkomnir.

3. desember 2016

Klara Margrét leikur einleik með Sinfóníuhljómsveit áhugamanna

Klara Margrét Ívarsdóttir, píanónemandi í Tónlistarskóla Kópavogs, mun leika einleik með Sinfóníuhljómsveit áhugamanna á tónleikum í Seltjarnarneskirkju á morgun, sunnudaginn 4. desember kl. 17. Klara er ein fjögurra tónlistarnema sem valdir voru á lokahátíð Nótunnar 2016 í Hörpu 10. apríl síðastliðinn til að koma fram með hljómsveitinni. Auk Klöru hlutu þessa viðurkenningu Anna Katrín Hálfdanardóttir, sem þá var nemandi í Tónlistarskóla Garðabæjar, og Jóhanna Brynja Ruminy og Jóhann Örn Thorarensen, nemendur í Tónskóla Sigursveins.

Klara Margrét mun leika einleik í 1. kafla píanókonsert í D-dúr eftir Joseph Haydn. Stjórnandi Sinfóníuhljómsveitar áhugamanna er Oliver Kentish.

Þessir tónleikar munu án efa vera bæði áhugaverðir og skemmtilegir. Verð aðgöngumiða á tónleikana er 2.000 kr. en frítt fyrir börn. Afsláttarverð er 1.000 kr. fyrir nemendur og eldri borgara.

28. nóvember 2016

Jólatónleikar forskóladeildar

Jólatónleikar forskóladeildar verða haldnir í Salnum laugardaginn 3. desember kl. 10:00 og 11:15. Allir forskólanemendur koma fram og fá þeir upplýsingar hjá kennurum sínum um það hvenær þeir eiga að mæta. Hvorir tónleikar eru rúmlega hálfrar klukkustundar langir. Aðgangur er ókeypis og eru allir velkomnir.

28. nóvember 2016

Aðventutónleikar í Salnum í dag

Tvennir skólatónleikar verða haldir í Salnum í kvöld, mánudaginn 28. nóvember. Fyrri tónleikarnir hefjast kl. 18:30. Þar mun strengjasveit eldri nemenda skólans, undir stjórn Unnar Pálsdóttur, leika nokkur lög, auk þess sem fiðlu- og þverflautunemendur leika einleik. Á seinni tónleikunum, sem hefjast kl 19:30, verður boðið upp á fjölbreytta efnisskrá, þar sem nemendur á ýmsum aldri koma fram. Aðgangur að tónleikunum er ókeypis og allir velkomnir.

23. nóvember 2016

Skólatónleikar í Salnum í dag

Skólatónleikar verða haldnir í Salnum í dag, miðvikudaginn 23. nóvember, kl. 18:00. Efnisskrá tónleikanna er fjölbreytt og fram koma nemendur á ýmsum aldri. Aðgangur að tónleikunum er ókeypis og allir velkomnir.

14. nóvember 2016

Skólatónleikar í Salnum

Skólatónleikar verða haldnir í Salnum í dag, mánudaginn 14. nóvember, kl. 19:30 og verða þar flutt einleiks- og samleiksverk á ýmis hljóðfæri. Aðgangur að tónleikunum er ókeypis og allir velkomnir.

7. nóvember 2016

Skólatónleikar í Salnum á þriðjudag

Skólatónleikar verða haldnir í Salnum þriðjudaginn 8. nóvember, kl. 18:00. Aðgangur að tónleikunum er ókeypis og allir velkomnir.

7. nóvember 2016

Fræðslufundur fyrir alla Suzukiforeldra

Fræðslufundur fyrir alla Suzukiforeldra, bæði nýliða og reynslubolta, verður haldinn í skólanum í dag, mánudaginn 7. nóvember, kl. 20.

25. október 2016

Vetrarfrí á fimmtudag og föstudag

Vetrarfrí verður í Tónlistarskólanum fimmtudaginn 27. og föstudaginn 28. október nk. og fellur kennsla niður þá daga.

23. október 2016

Skólatónleikar á mánudag og miðvikudag

Á morgun, mánudaginn 24. október, munu nemendur rytmískrar deildar koma fram á tónleikum í Salnum og hefjast tónleikarnir kl. 19:30. Miðvikudaginn 26. október verða haldnir skólatónleikar í Salnum og hefjast þeir kl. 18:00. Aðgangur að tónleikunum er ókeypis og allir velkomnir.

9. október 2016

Tvennir skólatónleikar í Salnum í vikunni

Fyrstu skólatónleikar á þessu skólaári verða haldnir í Salnum mánudaginn 10. september kl. 19:30 og þriðjudaginn 11. október kl. 18:00. Aðgangur að tónleikunum er ókeypis og allir velkomnir.

26. september 2016

Kvartað til umboðsmanns Alþingis vegna listframhaldsskóla

Eins og fram kom í fjölmiðlum í sumar auglýsti mennta- og menningarmálaráðuneytið í vor eftir aðilum til að reka listframhaldsskóla á sviði tónlistar. Kunnugt hefur verið um hugmyndir ráðherra í þessa veru um nokkurt skeið og þá jafnframt að ráðherra hefði tvo tónlistarskóla í Reykjavík í huga til að annast verkefnið. Kom þetta meðal annars fram á fundi stjórnar Samtaka tónlistarskólastjóra með ráðherra 13. febrúar 2015. Margir stjórnendur tónlistarskóla mótmæltu þessum áformum með bréfi 8. maí 2015 til alþingismanna og fleiri aðila.

Eftir auglýsinguna í vor sóttu tveir hópar tónlistarskóla um að gerast rekstraraðilar listframhaldsskóla, annars vegar Tónlistarskólinn í Reykjavík og Tónlistarskóli FÍH (TR/FÍH) og hins vegar Tónlistarskóli Kópavogs og Tónskóli Sigursveins D. Kristinssonar (TK/TSDK). Umsókn TK/TSDK var mjög metnaðarfull. Tilboðið var alls um 570 bls. að lengd að fylgiskjölum meðtöldum. Staðhæfa má að tilboðið var mun ítarlegra en krafa var gerð um. Meðal annars voru lagðar fram útfærðar námsbrauta- og áfangalýsingar. Hér má sjá tilboðið ásamt glærukynningu sem skólarnir útbjuggu, þar sem m.a. má finna rekstraráætlun.

Til að leggja mat á þessar tvær tillögur setti mennta- og menningarmálaráðherra á fót sérstaka matsnefnd. Niðurstaða fjögurra nefndarmanna af fimm var að tillaga TR/FÍH væri lítillega betri en tillaga TK/TSDK. Einn nefndarmanna gaf TK/TSDK hærri einkunn. Í heild fengu TR/FÍH 207 stig af 275 mögulegum en TK/TSDK fengu 202 stig. Í framhaldi af þessu ákvað ráðuneytið að ganga til samninga við TR/FÍH.

Skemmst er frá því að segja að við afgreiðslu mennta- og menningarmálaráðuneytisins á tillögunum var að mati TK/TSDK brotið gegn mörgum grundvallarreglum stjórnsýslulaga. Í fyrsta lagi var beiðnum TK/TSDK um að fá aðgang að gögnum málsins mætt með þögninni einni, að því frátöldu að skólarnir fengu eftir mikinn eftirgang afrit af greinargerð matsnefndarinnar. Með þessu móti var andmælaréttur TK/TSDK virtur að vettugi við meðferð málsins. Í öðru lagi hefur ráðherra ekki látið skólunum í té rökstuðning fyrir ákvörðun sinni, þrátt fyrir lagaskyldu þar um. Í þriðja lagi gera skólarnir athugasemdir við skipan matsnefndarinnar.

TK/TSDK telja einnig að ráðherra hafi ekki valið betri tillöguna. Að mati skólanna hefur ekki verið sýnt fram á að tillaga TR/FÍH feli í sér faglega betri niðurstöðu - eða með orðum matsnefndarinnar að sú tillaga feli í sér "mun meiri sérhæfingu í tónlistarnámi á framhaldsstigi" en tillaga TK/TSDK. Á hinn bóginn er alveg ljóst að tillaga TK/TSDK er mun hagstæðari fjárhagslega fyrir hið opinbera. Munar þar tugum milljóna króna á hverju ári. Var gerð grein fyrir þessu í bréfi skólanna til ráðuneytisins 12. ágúst 2016 sem hér má sjá.

Vegna málsmeðferðar ráðuneytisins og efnislegrar niðurstöðu hafa TK/TSDK nú lagt fram kvörtun til umboðsmanns Alþingis.

Eins og fram kemur í bréfinu frá 8. maí 2015 hafa margir tónlistarmenn lýst yfir áhyggjum sínum vegna þeirrar hugmyndafræði sem felst í tillögunni um sérstakan listframhaldsskóla í tónlist. Stofnun slíks skóla, með þeim formerkjum sem virðist í bígerð, felur í sér að útvöldum tónlistarskólum er veitt sérstök aðstaða og fjármagn til kennslu á efsta stigi tónlistarnáms. Þrátt fyrir að TK/TSDK hafi lýst yfir áhuga sínum á því að taka að sér rekstur slíks skóla, telja fyrirsvarsmenn skólanna að vel megi taka undir þessar áhyggjur. Tekið skal fram að hugmyndir TK/TSDK, sem lagðar voru fyrir ráðuneytið, gerðu ráð fyrir því að nemendur utan Reykjavíkur gætu stundað tónlistarnám í heimabyggð. Fól það í sér að reiknað var með samstarfi allra viðkomandi tónlistarskóla um námið.

5. september 2016

Fyrstu tímar í tónfræðagreinum

Kennsla í tónfræðagreinum í grunn- og miðnámi hefst samkvæmt stundaskrá fimmtudaginn 8. september nk. og munu nemendur fá tölvupóst um það hvenær þeir eiga að mæta í tónfræðatíma. Nánari upplýsingar má einnig fá á skrifstofu skólans.

Kennsla í tónlistarsögu hefst þriðjudaginn 6. september kl. 17:00. Kennari er Ríkharður H. Friðriksson. Kennsla í hljómfræði og tónheyrn hefst miðvikudaginn 9. september. Arnþór Jónsson kennir tónheyrn í vetur og Atli Ingólfsson kennir hljómfræði. Nánari upplýsingar um kennslutíma í þessum tveimur greinum eru veittar á skrifstofu skólans.

21. ágúst 2016

Skólasetning

Tónlistarskóli Kópavogs verður settur í Salnum miðvikudaginn 24. ágúst kl. 17:00.

Nemendur eru beðnir um að skila stundaskrám sínum úr grunnskólum eða framhaldsskólum á skrifstofu skólans í síðasta lagi 24. ágúst.

25. júní 2016

Sumarleyfi

Skrifstofa skólans verður lokuð vegna sumarleyfa frá 27. júní til 10. ágúst 2016.

29. maí 2016

Skólaslit þriðjudaginn 31. maí

Skólaslit og afhending einkunna verða þriðjudaginn 31. maí nk. og hefst athöfnin í Salnum kl. 17:00.

28. maí 2016

Framhaldsprófstónleikar tónversnemanda í Salnum

Á morgun, mánudaginn 30. maí kl. 20:00 mun Einar Rafn Þórhallsson, sem er að ljúka námi sínu úr Tónveri tónlistarskólans, halda framhaldsprófstónleika í Salnum. Á tónleikunum verða flutt fjölbreytt rafverk eftir Einar. Aðgangur að tónleikunum er ókeypis og eru allir velkomnir.

23. maí 2016

Vortónleikar Tónversins

Tónver Tónlistarskóla Kópavogs heldur vortónleika sína í Salnum mánudagskvöldið 23. maí kl. 20:00. Fluttar verða fjölbreyttar tónsmíðar eftir nemendur Tónversins. Aðgangur er ókeypis og eru allir velkomnir.

17. maí 2016

Skólatónleikar í Salnum

Skólatónleikar verða haldnir í Salnum í dag, þriðjudaginn 17. maí, kl. 18:00 og 19:15. Aðgangur að tónleikunum er ókeypis og allir velkomnir.

11. maí 2016

Framhaldstónleikar Tinnu Jóhönnu Magnusson

Tinna Jóhanna Magnusson, söngnemandi, heldur framhaldsprófstónleika sína í Salnum í kvöld, miðvikudaginn 11. maí kl. 20:00. Efnisskrá er fjölbreytt og er þar bæði að finna aríur og sönglög, meðal annars eftir Purcell, Mozart, Elgar, Arne, Mahler, Rossini og Þórarin Guðmundsson. Meðleikarar Tinnu Jóhönnu eru Selma Guðmundsdóttir, píanóleikari og Hannes Þ. Guðrúnarson, gítarleikari. Aðgangur að tónleikunum er ókeypis og eru allir velkomnir.

7. maí 2016

Tvennir skólatónleikar í Salnum á mánudag

Mánudaginn 9. maí verða tvennir skólatónleikar í Salnum. Fyrri tónleikarnir hefjast kl. 18:15. Þar leikur yngri strengjasveit skólans, undir stjórn Unnar Pálsdóttur, ýmis verk sem æfð hafa verið í vetur. Auk þess munu nokkrir hljóðfæranemendur flytja einleiks- og samleiksverk. Seinni tónleikarnir hefjast kl. 19:30 og verður þar meðal annars leikið á píanó og sembal. Aðgangur að tónleikunum er ókeypis og eru allir velkomnir.

7. maí 2016

Vortónleikar forskóla vorið 2016

Vortónleikar forskóladeildar verða haldnir í Salnum á morgun, sunnudaginn 8. maí. Tónleikarnir eru tvískiptir og verða fyrri tónleikarnir haldnir kl. 10:00 og þeir seinni kl. 11:15. Nemendur hafa fengið nánari upplýsingar um tímasetningu sinna tónleika.

1. maí 2016

Framhaldsprófstónleikar Sigurjóns Arnar Böðvarssonar

Sigurjón Örn Böðvarsson, söngnemandi, heldur framhaldsprófstónleika sína í Salnum þriðjudaginn 3. maí nk. kl. 20:00. Á fjölbreyttri efnisskrá er að finna óperuaríur og sönglög eftir íslensk og erlend tónskáld. Meðleikari Sigurjóns á tónleikunum er Selma Guðmundsdóttir, píanóleikari. Einnig kemur Tinna Jóhanna Magnusson, söngnemandi, fram með Sigurjóni. Aðgangur að tónleikunum er ókeypis og allir eru velkomnir.

25. apríl 2016

Þjóðlagahópur á ferð og flugi

Þjóðlagahópur Tónlistarskóla Kópavogs kom fram á þremur stöðum á sumardaginn fyrsta. Fyrst lék hópurinn í Kópavogskirkju á Ormadögum, barnamenningarhátíð Kópavogs, en að því búnu var haldið á sumargleði Rótarý í Sunnuhlíð. Loks kom hópurinn fram í Ráðhúsi Reykjavíkur ásamt Strengjasveitum Tónskóla Sigursveins í tilefni af Barnamenningarhátíð í Reykjavík. Laugardaginn 23. apríl var þjóðlagahópurinn með sér viðburð á Barnamenningarhátíð í Ráðhúsi Reykjavíkur.

19. apríl 2016

Afmælistónleikar Tónversins

Í tilefni þess að rúm 20 ár eru síðan Tónver Tónlistarskóla Kópavogs tók til starfa munu Salurinn í Kópavogi og Tónlistarskóli Kópavogs efna til afmælistónleika á morgun, 20. apríl (síðasta vetrardag) kl. 20:00.
Aðgangur er ókeypis.

Í fararbroddi í yfir 20 ár

Árið 1995 var Tónver Tónlistarskóla Kópavogs opnað í kjallara húsnæðis TK í Hamraborg 11. Þar gafst nemendum tækifæri að semja og flytja raftónlist með aðstoð tölva og hljóðgervla. Frumkvæði að stofnun tónversins höfðu þeir Hilmar Þórðarson og Ríkharður H. Friðriksson, og nutu þeir hvatningar og velvilja skólastjóra tónlistarskólans, Fjölnis Stefánssonar.

Tónver Tónlistarskóla Kópavogs hefur svo vaxið og dafnað og er í dag fullkomið hljóðver útbúið öflugasta og besta hljóðbúnaði sem völ er á - og hefur frá upphafi verið eitt best búna kennsluhljóðver landsins. Kennt er á öll vinsælustu tónlistarforrit dagsins í dag og auk þess fræðast nemendur um sögu raftónlistar, læra upptökutækni, hljóðgervlaforritun og margt fleira. Markmið með náminu er að þjálfa nemendur í að nota tölvu sem aðalhljóðfæri og leggja öflugan grunn að námi á háskólastigi og starfi þeirra sem tölvutónlistarmenn". Námið er á framhaldsnámsstigi í samræmi við aðalnámskrá tónlistarskóla. Nemendur tónversins hafa frá upphafi komið úr ólíkum áttum - og eftir nám hafa þeir jafnframt dreift sér vítt og breitt um jarðir tónlistarsenunnar og margir hverjir gert það afar gott.

Fyrrum nemendur banka upp á

Það eru einmitt margir af fyrrum nemendum tónversins sem eiga verk á tónleikunum. Má þar nefna Curver Thoroddsen (Ghostdigital), Kiru Kiru, Ragnar Ólafsson (Árstíðir, Ask the Slave), Þórð Kára Steinþórsson (Samaris), Hilmar Bjarnason og Hlyn Aðils Vilmarsson tónskáld. Núverandi nemendur tónversins eiga líka verk á tónleikunum. Útskriftarnemendurnir Einar Indra og Stefán Ólafur Ólafsson eru með sitt verkið hvor og einnig hljóma tónsmíðar Elínar Drafnar Jónsdóttur, Sigrúnar Sifjar Jóelsdóttur og Jóns Friðgeirs Sigurðssonar. Að lokum munu þrír kennarar tónversins, þeir Hilmar Þórðarson, Ríkharður H. Friðriksson og Jesper Pedersen koma fram á tónleikunum með nýjar tónsmíðar.

12. apríl 2016

Strengjasveit á leið til Færeyja

Eldri strengjasveit skólans mun halda tvenna tónleika í Færeyjum um næstu helgi, annars vegar í Tórshavn og hins vegar í Klaksvík en sá bær er vinabær Kópavogs. Á fyrri tónleikunum mun sveitin leika með strengjasveit tónlistarskólans í Tórshavn undir stjórn Bernharðs Wilkinssonar. Auk þess mun strengjasveitin flytja fjölbreytta efnisskrá sem undirbúin hefur verið á undanförnum mánuðum undir stjórn Unnar Pálsdóttur. Strengjasveitin heldur tónleika í Salnum á morgun, miðvikudaginn 13. apríl, kl. 18:00. Á efnisskrá tónleikanna eru verk eftir Schubert, Mancini, Moore, Offenbach, Mononen, Corelli, Vivaldi og Rameau. Einleikarar eru fiðluleikararnir Anna Margrét Jónudóttir, Sigrún Þorsteinsdóttir, Jón Logi Pálmason og Hekla Martinsdóttir Kollmar, Hrafnkell Karlsson, sellóleikari, og Jóhann Gísli Ólafsson, semballeikari. Aðgangur að tónleikunum er ókeypis og eru allir velkomnir.

12. apríl 2016

Frábær frammistaða á Nótunni

Tveir nemenda skólans, þær Brynhildur Erla Finnbjörnsdóttir, þverflautuleikari, og Klara Margrét Ívarsdóttir, píanóleikari, unnu til verðlauna á lokahátíð Nótunnar sem fram fór í Eldborgarsal Hörpu sunnudaginn 10. apríl. Báðar hlutu þær verðlaunagripinn Nótuna en auk þess fékk Brynhildur Erla hvatningarverðlaun Töfrahurðar og Klara Margrét fékk viðurkenningu í formi þátttöku á tónleikum Sinfóníuhljómsveitar áhugamanna í haust. Skólinn óskar þeim báðum og keunnurum þeirra hjartanlega til hamingju með þennan glæsilega árangur.

11. apríl 2016

Skólatónleikar í Salnum í dag

Skólatónleikar verða haldnir í Salnum dag, mánudaginn 11. apríl, kl. 19:30. Aðgangur að tónleikunum er ókeypis og allir velkomnir.

5. apríl 2016

Nemendur Tónlistarskóla Kópavogs á lokahátíð Nótunnar

Lokahátíð Nótunnar 2016, uppskeruhátíðar tónlistarskóla, fer fram í Hörpu sunnudaginn 10. apríl. Nótan er samstarfsverkefni tónlistarskólanna og Félags kennara og stjórnenda í tónlistarskólum og hefur verið haldin frá árinu 2010.

Á lokahátíðinni í Hörpu kemur fram úrval ungs fólks úr öllum landshlutum sem stundar tónlistarnám í tónlistarskólum landsins. Það hefur verið tilnefnt af sínum skólum til þátttöku á sérstökum svæðishátíðum, þar sem valinn hópur hlýtur þann heiður að koma fram í Eldborgarsal Hörpu og keppa um verðlaun í hinum ýmsu þátttökuflokkum fyrir framúrskarandi árangur.
Þrjú tónlistaratriði frá Tónlistarskóla Kópavogs verða á dagskránni í Hörpu að þessu sinni. Brynhildur Erla Finnbjörnsdóttir, nemandi í grunnnámi, leikur einleik á flautu, Klara Margét Ívarsdóttir, nemandi í miðnámi, leikur einleikhlutverkið í píanókonsert, og Þjóðlagahópur Tónlistarskóla Kópavogs, sem er blandaður hópur, leikur syrpu af íslenskum þjóðlögum

21. mars 2016

Kennsla að loknu páskaleyfi

Tónlistarskóli Kópavogs óskar nemendum, forráðamönnum, kennurum og velunnurum skólans gleðilegra páska. Þriðjudaginn 29. mars er skipulagsdagur kennara en kennsla að loknu páskaleyfi hefst samkvæmt stundaskrá miðvikudaginn 30. mars.

13. mars 2016

Skólatónleikar á mánudag og þriðjudag

Tvennir skólatónleikar verða haldnir í Salnum í vikunni. Fyrri tónleikarnir verða á morgun, mánudaginn 14. mars, og hefjast kl. 19:30 en seinni tónleikarnir verða á þriðjudaginn 15. mars kl. 18:00. Fram koma nemendur á ýmsum námsstigum og er efnisskráin fjölbreytt. Aðgangur að tónleikunum er ókeypis og allir velkomnir.

12. mars 2016

Framhaldsprófstónleikar í píanóleik

Í dag, laugardaginn 12. mars mun Marinella Ragnheiður Sigurðardóttir, píanóleikari, halda framhaldsprófstónleika sína frá Tónlistarskóla Kópavogs. Eru tónleikarnir hluti framhaldsprófs hennar við skólann.Tónleikarnir verða í sal Tónlistarskóla Garðabæjar og hefjast kl. 17:00. Á tónleikunum verða flutt verk eftir W.A. Mozart, F. Schubert, C. Debussy, P. Glass og D. Shostakovitch. Meðleikari á tónleikunum er Guðríður St. Sigurðardóttir, píanóleikari. Aðgangur að tónleikunum er ókeypis og allir eru velkomnir.

7. mars 2016

Skólatónleikar í Salnum

Skólatónleikar verða haldnir í Salnum miðvikudaginn 9. mars kl. 18:00. Aðgangur að tónleikunum er ókeypis og allir velkomnir.

28. febrúar 2016

Skólatónleikar Nótunnar á þriðjudag

Skólatónleikar verða haldnir í Salnum þriðjudaginn 1. mars kl. 18:00 og koma þar fram nemendur sem valdir hafa verið til þátttöku í skólatónleikum Nótunnar, uppskeruhátíðar tónlistarskóla 2016. Eftir tónleikana verða síðan valin atriði til þátttöku í svæðishátíð Nótunnar sem fram fer í Salnum sunnudaginn 13. mars næstkomandi. Aðgangur að tónleikunum er ókeypis og allir velkomnir.

28. febrúar 2016

Skólatónleikar á mánudag

Skólatónleikar verða haldnir í Salnum mánudaginn 29. febrúar kl. 19:30. Á dagskrá eru fjölbreytt einleiks- og samleiksverk nemenda á ýmsum námsstigum. Aðgangur að tónleikunum er ókeypis og eru allir velkomnir.

24. febrúar 2016

Vetrarfrí

Vakin er athygli á því að vetrarfrí verður í Tónlistarskólanum á fimmtudag og föstudag, 25. og 26. febrúar.

21. febrúar 2016

Skólatónleikar í Salnum á mánudag

Skólatónleikar verða haldnir í Salnum mánudaginn 22. febrúar og hefjast þeir kl. 19:30. Aðgangur að tónleikunum er ókeypis og eru allir velkomnir.

14. febrúar 2016

Skólatónleikar í Salnum á þriðjudag og miðvikudag

Tvennir skólatónleikar verða haldnir í Salnum þriðjudaginn 16. febrúar nk. og hefjast fyrri tónleikarnir kl. 18:00 en þeir síðari kl. 19:00. Skólatónleikar verða einnig haldnir í Salnum miðvikudaginn 17. febrúar nk. kl. 18:00. Aðgangur að öllum tónleikunum er ókeypis og eru allir velkomnir.

9. febrúar 2016

Skipulagsdagur á öskudag

Kennsla í Tónlistarskóla Kópavogs fellur niður miðvikudaginn 10. febrúar vegna skipulagsdags kennara.

7. febrúar 2016

Hljóðfærakynning fyrir forskólanemendur

Hljóðfærakynning fyrir nemendur sem ljúka forskólanámi í vor og aðstandendur þeirra fer fram í Salnum fimmtudaginn 11. febrúar kl. 17.15. Í tali, tónum og myndum verða kynnt þau hljóðfæri sem kennt er á í skólanum. Forráðamenn eru hvattir til að fjölmenna með börnum sínum.

7. febrúar 2016

Skólatónleikar í Salnum

Skólatónleikar verða haldnir í Salnum á morgun, mánudaginn 8. febrúar kl. 19:30. Aðgangur að tónleikunum er ókeypis og allir velkomnir.

27. janúar 2016

Tónleikar Sinfóníuhljómsveitar tónlistarskólanna

Laugardaginn 30. janúar nk. kl. 16:00 heldur Sinfóníuhljómsveit tónlistarskólanna tónleika í Langholtskirkju og eru nemendur og forráðamenn þeirra hvattir til að láta þennan viðburð ekki fram hjá sér fara.

Hljómsveitina skipa um 80 tónlistarnemar úr tónlistarskólum á höfuðborgarsvæðinu og nágrenni. Stjórnandi er Guðmundur Óli Gunnarsson. Einleikarar með hljómsveitinni eru Árni Halldórsson, Hugrún Britta Kjartansdóttir og Rebekka Friðriksdóttir sem öll stunda nám í píanóleik í Tónskóla Sigursveins.

Á tónleikunum verða flutt verða eftirtalin verk:

Jón Ásgeirsson: Fornir dansar
Dmitri Shostakovitsj: Píanókonsert nr. 2
Robert Schumann: Sinfónía nr. 4

Almennur aðgangseyrir er 3000 kr. en 1500 kr. fyrir nemendur og eldri borgara. Aðgöngumiðar verða seldir við innganginn.

4. janúar 2016

Nýr skólaritari

Nýr skólaritari, Þrúður Gísladóttir, hefur verið ráðin til starfa á skrifstofu skólans. Er hún boðin velkomin til starfa. Skrifstofan er opin milli kl. 12 og 16 alla virka daga.