21. júní 2020

Sumarlokun skrifstofu

Skrifstofa Tónlistarskóla Kópavogs verður opnuð eftir sumarleyfi mánudaginn 10. ágúst 2020.

25. maí 2020

Framhaldsprófstónleikar Rúnars Óskarssonar

Á morgun, þriðjudaginn 26. maí, kl. 20:00 mun Rúnar Óskarsson, nemandi í Tónverinu, halda tónleika í Salnum. Tónleikarnir eru lokahluti framhaldsprófs hans í raftónlist frá Tónlistarskóla Kópavogs. Á tónleikunum verða flutt fjölbreytt verk eftir Rúnar. Aðgangur að tónleikunum er ókeypis og eru allir velkomnir.

2. maí 2020

Um starfið til loka skólaársins

Mánudaginn 4. maí taka gildi breytingar á reglum um samkomubann og takmörkun skólahalds. Skólastarf í tónlistarskólanum færist þar með í eðlilegt horf, þó með frávikum sem af sérstökum aðstæðum leiðir.

Starfið til loka skólaársins verður í meginatriðum með þessum hætti:

1. Kennslan færist að nýju í húsnæði skólans, þ.e. skólahúsið eða Kefas, og í þá grunnskóla þar sem hljóðfærakennsla fór fram fyrir samkomubann. Kennsla verður í flestum tilvikum með sama hætti og fyrir samkomubann. Ef einhver frávik eru frá þessu verður það tilkynnt viðkomandi nemendum eða forráðamönnum sérstaklega.
2. Kennarar og nemendur eldri en 16 ára þurfa að virða reglu um 50 fullorðna einstaklinga í sama rými og um tveggja metra fjarlægð milli þeirra. Þessar reglur gilda ekki um börn á grunnskólaaldri.
3. Við beinum þeim tilmælum til foreldra að staldra mjög stutt við á göngum skólans þegar þeir fylgja sínum börnum í og úr skóla.
4. Nemendatónleikar verða haldnir í Salnum og í Kefas með fjöldatakmörkunum.
5. Árspróf falla niður í því formi sem verið hefur. Námsmat nemenda mun byggjast fyrst og fremst á umsögn kennara.
6. Áfangapróf í hljóðfæraleik, söng og tónfræðagreinum fara fram.
7. Maraþon fellur niður í ár.
8. Skólaslitaathöfn fellur niður. Síðasti kennsludagur verður miðvikudagur 27. maí.

27. mars 2020

Eingöngu fjarkennsla á næstunni

Ákveðið hefur verið að frá og með mánudeginum 30. mars nk. fari engin kennsla fram í húsnæði tónlistarskólans. Þess í stað verður eingöngu kennt í fjarkennslu. Þetta gildir þar til takmörkunum á skólastarfi verður aflétt.
 
Þessi ákvörðun er í samræmi við aðgerðir yfirvalda í baráttunni við COVID-19 þar sem hert hefur verið á samkomubanni og frekari takmarkanir settar á starfsemi þar sem nálægð er mikil.

16. mars 2020

Til foreldra og nemenda um skólastarfið næstu daga

Í dag hafa verið lagðar línur í skipulagi kennslunnar í Tónlistarskóla Kópavogs næstu vikurnar í framhaldi af þeim takmörkunum á starfseminni sem felast í tilskipun heilbrigðisráðherra frá 13. mars. Hér eru upplýsingar um helstu atriðin:

• Hljóðfærakennsla í húsnæði skólans fer einungis fram í einkatímum. Það á einnig við um kennslu í tónveri. Við munum fækka stofum í notkun og bjóða upp á kennsluna í stærri stofunum.
• Í hljóðfærakennslunni verða mismunandi leiðir í boði. Þar má nefna fjarkennslu í einhverju formi þar sem því verður við komið o.s.frv.
• Hóptímar í húsnæði skólans falla niður, þar er átt við kennslustundir þar sem fleiri en einn eru saman. Tónfræðakennarar munu vinna í því að halda virkni hjá nemendum með heimaverkefnum.
• Hljóðfærakennsla úti í grunnskólum fellur niður. Þeir kennarar sem kenna í grunnskólunum munu reyna að að koma til móts við sína nemendur með kennslu í tónlistarskólanum eða Kefas eftir því sem mögulegt er.
• Ef forráðamenn óska eftir að láta vera að senda börnin í tónlistarskólann og munum við að sjálfsögðu taka tillit til þess.
• Forráðamenn eru vinsamlegast beðnir um að senda ekki börnin í tónlistarskólann ef þau eru ekki frísk.
• Í því skyni að takmarka fjölda fólks á göngum skólans eru foreldrar vinsamlegast beðnir um að senda og /eða sækja krakkana í tónlistarskólann sem næst þeim tíma sem kennslustundir hefjast eða sem þeim lýkur.
• Mjög mikilvægt er að halda áfram að brýna fyrir börnunum mikilvægi handþvottar fyrir og eftir kennslustund. Handþvotturinn er besta vörnin gegn smiti!

Við erum meðvituð um að þetta skipulag þurfum við að endurmeta frá degi til dags. Þær línur sem við leggjum nú gilda þar til annað kemur í ljós!

15. mars 2020

Öll kennsla fellur niður á morgun, 16. mars

12. mars 2020

Skólatónleikar á morgun falla niður

11. mars 2020

Tónleikar falla niður

8. mars 2020

Þrennir skólatónleikar í vikunni

4. mars 2020

Vetrarfrí á fimmtudag og föstudag

28. febrúar 2020

Skólatónleikar í Salnum

30. janúar 2020

Tengsl tveggja tónlistarheima - Tónleikaveisla föstudag og laugardag

Boðið verður til tónlistarveislu á föstudag og laugardag í tengslum við tvö evrópsk samstarfsverkefni sem nemendur Tónlistarskóla Kópavogs taka þátt í ásamt nemendum tónlistarháskólans Santa Cecilia í Róm og tónlistardeildar Luleå Tekniska Universitet í Piteå í Svíþjóð.

Tónleikarnir verða föstudaginn 31. janúar kl. 18.00 í Kaldalóni, Hörpu, og laugardaginn 1. febrúar kl. 12.00 og 16.00 í Salnum, Kópavogi.

Aðgangur á alla tónleikana er ókeypis og allir velkomnir meðan húsrúm leyfir.

Tónleikarnir í Kaldalóni, Hörpu, föstudaginn 31. janúar kl. 18.00 bera yfirskriftina "Unga fólkið á Myrkum". Þar verða frumflutt ný tónverk eftir þrjá meistaranema í tónsmíðum við Luleå Tekniska Universitet. Einnig verður flutt ný útgáfa verksins Árnar renna eftir Elínu Gunnlaugsdóttur. Flutningurinn verður í höndum kammersveitar sem skipuð er ungum tónlistarmönnum frá tónlistarháskólanum Conservatorio di „Santa Cecilia“ og Tónlistarskóla Kópavogs, undir stjórn meistaranema í hljómsveitarstjórn, þeim Simon Percic og Andrew Hermon.

Tónleikarnir í Salnum laugardaginn 1. febrúar kl. 12.00 eru raftónleikar, þar sem heyra má afrakstur samstarfsverkefnis tónsmíðanema tónvers Tónlistarskóla Kópavogs og tónsmíðadeildar Luleå Tekniska Universitet. Verkefnið hefur verið unnið undir stjórn Haraldar Vignis Sveinbjörnssonar, Jespers Pedersen, Ríkharðar H. Friðrikssonar og Fredrik Högberg. Þátttakendur sem hér rugla saman reitum hafa mjög fjölbreyttan bakgrunn í tónlist og eru sumir hverjir með áralanga reynslu sem flytjendur. Eftir frábærar samvinnuvikur bæði hérlendis og í Svíþjóð hefur raftónlist hópsins þróast á nýjan og spennandi hátt. Hver veit hvað gerist næst? Framtíð raftónlistar er óráðin.

Þriðju tónleikarnir fara fram í Salnum, Kópavogi, laugardaginn 1. febrúar kl. 16.00. Þeir bera yfirskriftina "Á norrænum slóðum". Þetta eru kammertónleikar þar sem nemendur Tónlistarskóla Kópavogs og Conservatorio di Santa Cecilia flytja klassískar norrænar tónlistarperlur. Á efnisskrá er hin fræga Holberg svíta eftir Edvard Grieg, Allegro úr tríói fyrir fiðlu, selló og píanó eftir Sveinbjörn Sveinbjörnson, The Fog is lifting fyrir fiðlu og píanó eftir danska tónskáldið Carl Nielsen og Sinfónía eftir Johan Daniel Berlin fyrir flautur, klarínett, sembal og strengjasveit. Stjórnandi er Petter Sundkvist frá Svíþjóð.

21. janúar 2020

Tónleikar Sinfóníuhljómsveitar tónlistarskólanna

Laugardaginn 25. janúar nk. kl. 16:00 heldur Sinfóníuhljómsveit tónlistarskólanna tónleika í Langholtskirkju og eru nemendur og forráðamenn þeirra hvattir til að láta þennan viðburð ekki fram hjá sér fara.

Hljómsveitina skipa um 80 tónlistarnemar úr tónlistarskólum á höfuðborgarsvæðinu og nágrenni. Stjórnandi er Guðmundur Óli Gunnarsson. Einleikari með hljómsveitinni er Björgvin Brynjarsson sem stundar nám í saxófónleik hjá Braga Vilhjálmssyni í Tónlistarskóla Garðabæjar og mun ljúka framhaldsprófi frá skólanum í vor.

Á tónleikunum verða flutt verða eftirtalin verk:

• Arturo Márquez: Danzón nr. 2
• Pedro Iturralde: Czárdás
• Georges Bizet: Úrval úr Carmen svítum nr. 1 og 2.

Almennur aðgangseyrir er 3500 kr. en 2000 kr. fyrir nemendur og eldri borgara. Aðgöngumiðar verða seldir við innganginn.