 Laugardaginn
12. mars 2005 kl. 13:00 verða
haldnir tónleikar í Salnum í tónleikaröð kennara Tónlistarskóla
Kópavogs. Í þetta sinn verða flutt gagnvirk verk eftir Hilmar
Þórðarson fyrir klassísk hljóðfæri og tölvu.
Flytjendur auk Hilmars eru Kristinn H. Árnason,
gítarleikari, Áki Ásgeirsson, trompetleikari, og Þórunn
Ósk Marinósdóttir, víóluleikari. Einnig mun Haraldur
Karlsson fremja sjónlist, en Ríkharður H. Friðriksson
annast hljóðstjórn.
Skólinn vill eindregið hvetja nemendur til að mæta á þessa
tónleika, enda er aðgangur ókeypis fyrir þá og ekki spillir að sjá
aðstandendur og velunnara skólans með í för.
Efnisskrá
- Sononymus fyrir Rafgítar og Tölvu
Kristinn H. Árnason, rafgítar
Hilmar Þórðarson, tölva
- Sononymus fyrir Trompet og Tölvu
Áki Ásgeirsson, trompet og tölva
- Sononymus fyrir Víólu og Tölvu
Þórunn Ósk Marinósdóttir, víóla
Hilmar Þórðarson, tölva
- Sononymus fyrir Líkama og Tölvu
Hilmar Þórðarson, líkami og tölva
Haraldur Karlsson (Halli Kalli), myndband
Um höfundinn og verkin
Hilmar Þórðarson er fæddur á Akureyri 9. apríl
1960. Árið 1985 útskrifaðist Hilmar frá
tónsmíðadeild Tónlistarskólans í Reykjavík og skömmu
síðar hélt hann til Bandaríkjanna þar sem hann lauk
meistaraprófum í tónsmíðum frá California Institute of
the Arts (MFA) árið 1989 og Yale tónlistarháskólanum
(MA) 1991. Að loknu námi hélt Hilmar til Stanford
háskóla þar sem hann var gestafræðimaður 1991-1992 og
á árunum 1992-1995 starfaði Hilmar sem gestatónskáld
við hljóðver tónlistarháskólans í Berkeley í
Kaliforníu. Á þeim tíma gafst Hilmari gott tækifæri
til þess að læra og gera tilraunir með allskonar
aðferðir til þess að nota tölvutækni til tónsmíða
og tónlistarflutnings. Árangur þessara tilrauna kemur vel
fram í verki hans "Verur frá landi ísa",
gagnvirku margmiðlunarverki byggðu á þjóðsögunum af
íslensku jólasveinunum. Verkið er samið fyrir bandarísk-japanska
dansflokkinn Harupin Ha og var sýnt víðs vegar um
Kaliforníu og Frakkland. Gagnvirkt margmiðlunarverk
þýðir að unnið er með fleiri listmiðla en einn, þ.e.
tónlist, danslist og myndbandalist, og gagnvirkt er það
þessi listform bregðast við skilaboðum frá hvoru
öðru. Þannig var það í þessu verki þar sem
dansararnir auk þess að dansa stýrðu þeir hljóði sem
og myndbandi með hreyfingum sínum.
Árið 1995 flutti Hilmar aftur heim til Íslands og sama
ár stofnaði hann ásamt Ríkharði H. Friðrikssyni
tónskáldi, tónver Tónlistarskóla Kópavogs. Tónverið
var fyrsta tónver við tónlistarskóla á Íslandi sem
bauð upp á sérstakt tölvutónlistarnám og er nú án
efa fullkomnasta tónver við tónlistarskóla á Íslandi.
Það var snemma mjög vinsælt og árlega komast færri
nemendur að en vilja.
Árið 2000 hélt tónverið stóra alþjóðlega raf- og
tölvutónlistarhátíð sem hlaut nafnið ART2000 þar sem
boðið var tónskáldum, hljóðfæraleikurum og
fræðimönnum víðs vegar að úr veröldinni. Hátíðin
stóð yfir í ellefu daga og vakti mikla athygli,
sérstaklega þótti setningarathöfnin mikilfengleg, en
þar var flutt tónverk fyrir flugeldasýningu og
rafhljóð. Tónlistin og flugeldarnir voru svo mikilfengleg
að símalínur lögreglunnar glóðu af dauðhræddum
íbúum Kópavogs sem varð heldur bylt við af þessu
óvænta kryddi í tilveruna. ART2000 hátíðin þótti
takast svo vel að hún hlaut menningarverðlaun DV.
Í tónsmíðum sínum vinnur Hilmar jafnt með
hefðbundin akústísk hljóðfæri sem og raf- og
tölvuhljóðfæri. Hann blandar þeim gjarnan saman og er
sú blöndun hvergi eins skýr eins og í röð tónsmíða
sem allar bera samheitið Sononymus. Á tónleikunum þann
12. mars verða fjögur nýjustu Sononymus verkin flutt, en
þau eru samin á síðustu tveimur árum. Elst þeirra er
Sononymus fyirir trompet og gagnvirk tölvuhljóð sem ber
undirtitilinn "Bitin eyru". Verkið er samið
fyrir trompetleikarann og tónskáldið Áka Ásgeirsson
árið 2003 og var frumflutt í ágúst það ár á Gauki
á Stöng. Áki hefur sjálfur útbúið trompetinn sinn
þannig að hann getur "fjarstýrt"
tölvuhljóðum gegnum svonefnd MIDI skilaboð og þannig
getur hann með því að ýta á nokkra aukatakka breytt
hljóðunum úr tölvunni og með því að halla trompetnum
á ýmsa vegu getur hann hreyft hljóðið á milli
fjögurra hátalara þannig að það sveiflast fram og
aftur. Nafnið "Bitin eyru" er einfaldlega
tilkomið vegna þess að meðan Hilmar var að skrifa
verkið þá var hann staddur úti í sveit og varð fyrir
óvæginni árás mýflugna með þeim afleiðingum að eyru
hans urðu útbitin.
Verkið Sononymus fyrir "Mannslíkama og gagnvirk
tölvuhljóð" var samið seint á síðasta ári
og lokið í byrjun þessa árs. Þar eru hreyfingar
mannslíkamans notaðar til að framkalla hljóð og með
bendingum handa og fingra er hljóðunum blandað saman og
þau látin ferðast milli fjögurra hátalara sem eru
fremst og aftast í Salnum. Á sama tíma og flytjandinn,
sem í þessu tilviki er höfundurinn sjálfur, stjórnar
verkinu, er myndbandi, sem gert er af Haraldi Karlssyni
sjónskáldi, skotið á hann, þannig að myndbandið og
flytjandinn mynda eina heild, þ.e. flytjandinn er jafnframt
hluti af myndbandinu.
Sononymus fyrir Lágfiðlu og gagnvirk tölvuunnin
hljóð var samið í upphafi þessa árs og er flutt af
Þórunni Ósk Marinósdóttur. Í þessu verki gengur
Hilmar út frá nótunum ACEH en þessir stafir mynda
jafnframt nafn Aceh héraðs í Indónesíu, þess héraðs
sem verst varð úti í flóðbylgjunni sem fylgdi
jarðskjálftanum sem þar varð undir sjávarmáli. Verkið
er tileinkað minningu fórnarlamba þessara gífurlegu
náttúruhamfara þar sem á nokkrum klukkutímum létust
fleiri en allir íbúar Íslands.
Nýjasta verkið sem flutt verður á tónleikunum heitir
Sononymus fyrir Rafgítar og gagnvirk tölvuunnin
hljlóð. Þar mun Kristinn H. Árnason sýna listir
sýnar á rafgítar, en með honum mun Hilmar stjórna
tölvuhljóðum og vinna með tónana sem berast frá
rafgítarnum. Þetta verk er svo glænýtt að það er ekki
búið að klára það enn og verður það örugglega ekki
fyrr en rétt fyrir tónleika eða jafnvel á tónleikunum
sjálfum.
Aðgangseyrir
- Almennt miðaverð: 1.500 kr.
- Eldri borgarar, öryrkjar og námsmenn: 1.200 kr.
- Kennarar Tónlistarskóla Kópavogs og aðstandendur
nemenda: 500 kr.
- Nemendur Tónlistarskóla Kópavogs: Frítt.
- 12 ára og yngri: Frítt
Sími í miðasölu er 5 700 400 og er opið virka daga
kl. 9.00-16.00 og klst. fyrir tónleika.
|
