Tónlistarskóli Kópavogs


	Úr aðalnámskrá tónlistarskóla: Mennta- og menningarhlutverk tónlistarskóla er að
	-	veita öllum, sem þess æskja, færi á að kynnast tónlistarnámi af eigin raun
	-	skapa nemendum tækifæri til tónlistarflutnings, jafnt innan skóla sem utan

FORSÍÐA

Fréttir 2005

16. desember 2005

Nýr semball vígður á tónleikum í Salnum á morgun

Á 40 ára afmæli Tónlistarskóla Kópavogs afhenti Gunnar Birgisson, þáverandi formaður bæjarráðs, skólanum gjafabréf frá bænum til kaupa á sembal sem verður sameign skólans og Salarins. Smíði hljóðfærisins er nú lokið og verður það vígt á TÍBRÁR tónleikum í Salnum á morgun, laugardaginn 17. desember, kl. 16.00 af Jory Vinikour, en hann er þekktur sem einn af fremstu semballeikurum sinnar kynslóðar.

[ Meira ]

11. desember 2005

Jólatónleikar í Salnum

Í þessari viku verða eftirfarandi jólatónleikar í Salnum. Aðgangur að tónleikunum er ókeypis og eru allir velkomnir:

Mánudaginn 12. desember kl. 18:15 leika strengjasveitir I og II undir stjórn Ásdísar H. Runólfsdóttur og Unnar Pálsdóttir, auk þess sem fleiri strokhljóðfæranemendur koma fram.
Þriðjudaginn 13. desember kl. 18:15 leikur málmblásarasveit undir stjórn Jóns Halldórs Finnssonar og flautusveit flytur nokkur lög, auk þess sem nokkrir nemendur skólans koma fram.
Miðvikudaginn 14. desember kl. 17 verða tónleikar Suzuki-fiðlunemenda undir stjórn Guðrúnar Þórarinsdóttur og Helgu Ragnheiðar Óskarsdóttur.
Miðvikudaginn 14. desember kl. 18:15 munu nemendur leika á ýmis hljóðfæri.
Fimmtudaginn 15. desember kl. 18:15 munu yngri og eldri nemendur syngja og leika á ýmis hljóðfæri.

29. nóvember 2005

Strengjasveitartónleikar í Salnum

Aðventutónleikar strengjasveitar III, sem skipuð er elstu strokhljóðfæranemendum skólans, verða haldnir í Salnum miðvikudaginn 30. nóvember kl. 19:30. Stjórnandi sveitarinnar er Unnur Pálsdóttir. Á efnisskrá eru verk eftir Joseph Haydn og Sergei Prokofiev, auk aðventu- og jólalaga. Auk þess munu þrír hljóðfæraleikarar úr strengjasveitinni koma fram á tónleikunum. Aðgangur að tónleikunum er ókeypis og allir velkomnir.

27. nóvember 2005

Skólatónleikar í Salnum

Skólatónleikar verða haldnir í Salnum mánudaginn 28. nóvember, kl. 19:30. Aðgangur að tónleikunum er ókeypis og allir velkomnir.

27. nóvember 2005

Ljósmyndir frá skólatónleikum í Salaskóla

Miðvikudaginn 23. nóvember síðastliðinn voru haldnir nemendatónleikar í Salaskóla undir stjórn Hannesar Þ. Guðrúnarsonar, gítarkennara, og Ragnheiðar Haraldsdóttur, blokkflautukennara. Ungir nemendur Tónlistarskólans léku þar á blokkflautu, gítar og píanó. Hér má sjá nokkrar ljósmyndir sem teknar voru á tónleikunum.

23. nóvember 2005

Tónleikaröð kennara: Kennt og numið

Aðrir tónleikar vetrarins í Tónleikaröð kennara Tónlistarskóla Kópavogs verða haldnir í Salnum laugardaginn 3. desember næstkomandi kl. 13:00. Flytjendur eru Guðrún Birgisdóttir flautuleikari og Kristinn Árnason gítarleikari ásamt leynigesti. Auk þess munu nemendur Tónlistarskólans koma fram á tónleikunum. Á efnisskrá eru verk eftir Praetorius, Pachelbel, J.S. Bach, Paganini og Harald Vigni Sveinbjörnsson. Tónleikunum lýkur með flutningi aðventulaga fyrir flautu og gítar.

[ Meira ]

23. nóvember 2005

Jólatónleikar forskóladeildar

Jólatónleikar forskóladeildar verða haldnir í Salnum laugardaginn 26. nóvember kl. 10:00, 11:00 og 12:00 og laugardaginn 3. desember kl. 10:00 og 11:00. Allir forskólanemendur koma fram þ.m.t. þeir nemendur Kársnesskóla, Lindaskóla, Salaskóla, Snælandsskóla og Vatnsendaskóla sem stunda fornám í samvinnu við Tónlistarskólann. Nemendur fá upplýsingar um það hvenær þeir eiga að mæta og hvar þeir eiga að sitja. Hverjir tónleikar eru um 30 mínútna langir. Aðgangur er ókeypis og allir velkomnir.

23. nóvember 2005

Skólatónleikar í Salnum

Skólatónleikar verða haldnir í Salnum föstudaginn 25. nóvember og hefjast kl. 18:15. Aðgangur að tónleikunum er ókeypis og eru allir velkomnir.

2. nóvember 2005

Tónleikaröð kennara: Snarað fram okkar stefjum

Fyrstu tónleikar vetrarins í Tónleikaröð kennara Tónlistarskóla Kópavogs verða haldnir í Salnum laugardaginn 5. nóvember 2005 kl. 13.00. Á tónleikunum leika Óskar Guðjónsson, saxófónleikari, Pétur Grétarsson, slagverksleikari, og Kjartan Valdemarsson, píanóleikari, og munu þeir flytja spuna við eigin stef. Aðgangur að tónleikunum er ókeypis fyrir nemendur Tónlistarskóla Kópavogs, foreldra og forráðamenn.

24. október 2005

Kvennafrídagur

Búast má við röskun á kennslu eftir kl. 14:08 í dag vegna þátttöku kennara í baráttuhátíð í tilefni 30 ára afmælis kvennafrídagsins.

24. október 2005

Vetrarfrí

Vakin er athygli á því að vetrarfrí verður í Tónlistarskólanum fimmtudaginn 27. og föstudaginn 28. október næstkomandi.

24. október 2005

Skólatónleikar í Salnum

Skólatónleikar verða haldnir í Salnum þriðjudaginn 25. október og hefjast kl. 18:15. Aðgangur að tónleikunum er ókeypis og eru allir velkomnir.

18. september 2005

Tónlistarnámskeið fyrir þriggja til fimm ára

Nú eru að hefjast tónlistarnámskeið sem Tónlistarskóli Kópavogs heldur fyrir þriggja til fimm ára börn. Námskeiðin hefjast laugardaginn 24. september næstkomandi og munu standa í ellefu vikur á haustönn og tólf vikur á vorönn. Örfá pláss eru enn laus í byrjendahópi.

Hliðstæð námskeið voru haldin síðastliðinn vetur og munu börn sem þá sóttu námskeiðin eiga þess kost að halda áfram í vetur í framhaldshópum.

Kennsla fer fram á laugardögum í húsnæði skólans. Kennsla í byrjendahópi er kl. 10:30 til 11:30, yngri framhaldshópi er kennt kl. 11:40 til 12:40 og eldri framhaldshópi kl. 13:00 til 14:15.

Námskeiðið er byggt upp á hugmyndafræði belgíska tónlistarfrömuðarins Edgar Willems (1890-1978). Gengið er út frá rödd og hreyfingu sem tjáningarmiðli barnsins og þessir þættir síðan tengdir markvisst mismunandi hljóðgjöfum og hljóðfærum.

Aðalkennari á námskeiðinu er Dagný Arnalds en Ólöf Arnalds er henni til aðstoðar. Dagný hefur sérhæft sig í Willems aðferðinni og lokið Diploma-próf frá Association Internationale d'Education Musicale Willems í Lyon, Frakklandi, auk þess að hafa píanókennarapróf frá Tónlistarskólanum í Reykjavík.

Skráning fer fram á skrifstofu skólans, í Tónlistarhúsinu, Hamraborg 6, og þar eru jafnframt veittar nánari upplýsingar í síma 570-0410.

6. september 2005

Fyrstu tímar í tónfræðagreinum

Kennsla í tónfræðagreinum í grunn- og miðnámi hefst samkvæmt stundaskrá fimmtudaginn 15. september nk. og munu hljóðfærakennarar láta nemendur vita hvenær þeir eiga að mæta í tónfræðatíma. Nánari upplýsingar má einnig fá á skrifstofu skólans.

Kennsla í tónlistarsögu hefst þriðjudaginn 13. september kl. 19:00. Kennari er Ríkharður H. Friðriksson. Kennsla í tónheyrn hefst miðvikudaginn 14. september og kennsla í hljómfræði föstudaginn 16. september. Arnþór Jónsson kennir tónheyrn í vetur og Þórður Magnússon kennir hljómfræði. Nánari upplýsingar um kennslutíma í þessum tveimur greinum eru veittar á skrifstofu skólans.

6. september 2005

Nýir kennarar

Nokkrir nýir kennarar bætast í kennarahópinn á þessu skólaári. Það eru Hafsteinn Guðmundsson, sem kennir á fagott, klarínettu og saxófón, Haraldur Vignir Sveinbjörnsson, sem kennir tölvutónlist, Ingunn Hildur Hauksdóttir, píanókennari og meðleikari, Kormákur Þráinn Bragason, forskólakennari, Sigurður Bjarki Gunnarsson, sem kennir sellóleik, og Þórður Magnússon, hljómfræðikennari. Eru þau öll boðin velkomin til starfa!

6. september 2005

Fyrstu æfingar strengjasveita

Í vetur verða æfingar strengjasveita skólans sem hér segir:

Strengjasveit I (stjórnandi Ásdís H. Runólfsdóttir): Þriðjudagar kl. 17:00-18:00.
Strengjasveit II (stjórnandi Unnur Pálsdóttir): Miðvikudagar kl. 18:00-19:00.
Strengjasveit III (stjórnandi Unnur Pálsdóttir): Mánudagar kl. 17:15-19:00.

17. ágúst 2005

Skólasetning

Tónlistarskóli Kópavogs verður settur í Salnum mánudaginn 22. ágúst kl. 17:00. Kennsla hefst þriðjudaginn 23. ágúst og munu kennarar boða nemendur til kennslu. Athygli skal vakin á því að kennsla verður óregluleg fyrstu dagana meðan gengið er frá stundaskrá skólans. Kennsla í forskóladeild hefst 7. september.

Nemendur eru beðnir um að skila stundaskrám sínum úr grunnskólum eða framhaldsskólum á skrifstofu skólans hið fyrsta.

14. ágúst 2005

Skólagjöld óbreytt frá fyrra ári

Stjórn Tónlistarskóla Kópavogs hefur ákveðið að skólagjöld fyrir skólaárið 2005-2006 verði hin sömu og á fyrra ári.

14. ágúst 2005

Viðurkenningar við skólaslit 2005

Við skólaslit Tónlistarskóla Kópavogs 6. júní síðastliðinn var þremur nemendum veitt sérstök viðurkenning fyrir framúrskarandi námsárangur í vetur. Tveir þeirra eru á sínu fyrsta námsári í hljóðfæraleik og hafa sýnt sérstaklega mikinn dugnað við námið. Eftirtaldir hlutu viðurkenningar:

Marta Jónsdóttir, nemandi á 1. ári í píanóleik.
Marína Herdís Jónsdóttir, nemandi á 1. ári í sellóleik.
Össur Ingi Jónsson, nemandi í framhaldsnámi í óbóleik.

Fyrir hæstu einkunn á grunn- og miðprófum hlutu eftirtaldir nemendur viðurkenningu:

Michael Pétur Máté, grunnpróf í píanóleik.
Þorri Hauksson, grunnpróf í trompetleik.
Þuríður Helga Ingadóttir, grunnpróf í fiðluleik.
Elín Ásta Ólafsdóttir, miðpróf í píanóleik.

14. ágúst 2005

Anna Hansen lætur af störfum

Við skólaslit 6. júní síðastliðinn lét Anna Hansen, gítarkennari, af störfum eftir áratuga farsælt og giftudrjúgt starf við skólann. Var henni af því tilefni færð gjöf sem þakklætisvottur frá skólanum.

Enginn hefur starfað jafn lengi við Tónlistarskóla Kópavogs og Anna Hansen, enda kom hún til starfa þegar skólinn var stofnaður árið 1963 og hefur, með örstuttum hléum, verið kennari við skólann síðan. Það er með eftirsjá og söknuði sem við kveðjum jafn yndislega og jákvæða manneskju. Anna hefur skilað af sér drjúgu ævistarfi í þágu ungs fólks á tónlistarbrautinni og henni fylgja hugheilar óskir frá starfsfólki Tónlistarskóla Kópavogs.

14. ágúst 2005

Töfraflautan

Nú hafa verið settar á myndasíðu vefsins nokkrar ljósmyndir frá uppfærslu söngdeildar á óperunni "Töfraflautan" eftir W.A. Mozart.

3. júní 2005

Skólaslit í Salnum mánudaginn 6. júní

Nemendur og aðstandendur þeirra eru minntir á að skólaslit og afhending einkunna verða mánudaginn 6. júní nk. og hefst athöfnin í Salnum kl. 17:00.

3. júní 2005

Nýtt efni

Nú hafa verið settar á myndasíðu vefsins nokkrar ljósmyndir frá burtfarartónleikum Unnars Geirs Unnarssonar, einsöngvara, og Ingunnar Loftsdóttur, flautuleikara.

27. maí 2005

Burtfarartónleikar Ingunnar Loftsdóttur, flautuleikara

Mánudaginn 30. maí nk. kl. 20.00 heldur Ingunn Loftsdóttir, flautuleikari, burtfarartónleika frá Tónlistarskóla Kópavogs í Salnum og eru tónleikarnir jafnframt síðasti hluti framhaldsprófs hennar við skólann. Með Ingunni á tónleikunum leikur Sólveig Anna Jónsdóttir á píanó og sembal. Á efnisskrá tónleikanna eru verk eftir Jean-Marie Leclair, Karólínu Eiríksdóttur, Camille Saint-Saëns og Georges Enescu.

[ Meira ]

27. maí 2005

Þverflaututónleikar

Mánudaginn 30. maí kl. 18.00 mun Solveig Þórðardóttir, þerflautunemandi í framhaldsnámi, halda próftónleika í Salnum. Sólveig Anna Jónsdóttir leikur með henni á tónleikunum. Á efnisskránni eru verk eftir J. S. Bach, J. Ibert og P. Hindemith. Aðgangur að tónleikunum er ókeypis og allir eru velkomnir.

27. maí 2005

Skólaslit

Skólaslit og afhending einkunna verða mánudaginn 6. júní nk. og hefst athöfnin í Salnum kl. 17:00.

26. maí 2005

Píanómaraþon

Laugardaginn 28. maí fer fram píanómaraþon í TK og er áætlað að það standi í um fimm klukkustundir. Á milli 75 og 80 píanónemendur munu koma fram og leika hátt í 200 verkefni, styttri eða lengri. Því miður er ekki pláss til að bjóða foreldrum eða öðrum gestum að vera viðstaddir en kannski verður það hægt á næsta ári.

Tilgangurinn með þessu uppátæki er í sjálfu sér sá sami og með píanónámi yfirleitt, eða að leika á hljóðfærið fyrir sig og aðra og hlusta á hina sem eru að vinna að því sama. En einnig er markmiðið að efla samstöðu meðal píanónemenda og stuðla að því að þeir átti sig á því hve mikil vinna þeirra er þegar allir leggja saman og þó er þetta ekki nema smáhluti af öllu vetrarstarfinu.

Á næsta ári er áætlað að gera fleira skemmtilegt, jafnvel skreppa af bæ, taka rútu og heimsækja skóla utan höfuðborgarsvæðisins.

[ Listi yfir þátttakendur ]

25. maí 2005

Skólatónleikar í Salnum

Skólatónleikar verða haldnir í Salnum fimmtudaginn 26. maí kl. 18:15 og munu margir nemendur skólans koma fram. Aðgangur að tónleikunum er ókeypis og eru allir velkomnir.

25. maí 2005

Próftónleikar á miðvikudag og fimmtudag

Í dag, miðvikudaginn 25. maí, heldur Stefán Þór Sigfinnsson, nemandi í framhaldsnámi í klarínettuleik, stutta próftónleika í Salnum og hefjast þeir kl. 17:30. Með honum leikur Tómas Guðni Eggertsson á píanó.

Á morgun, fimmtudaginn 26. maí, verða þrennir próftónleikar á vegum skólans og fara þeir fram í stofu 19. Á fyrstu tónleikunum, sem hefjast kl. 17:00, syngur Erla Steinunn Guðmundsdóttir, söngnemandi í miðnámi. Kl. 17:30 hefjast próftónleikar Þórhöllu Sigríður Stefánsdóttur, söngnemanda í miðnámi, og kl. 18:00 hefjast tónleikar Sigurjóns Arnar Böðvarssonar, söngnemanda í grunnnámi. Krystyna Cortes leikur á píanó á öllum söngtónleikunum.

22. maí 2005

Þverflaututónleikar

Á morgun, mánudaginn 23. maí, munu Inger Björk Ragnarsdóttir og Ragnhildur Anna Ragnarsdóttir, þverflautunemendur í framhaldsnámi, halda próftónleika í Salnum. Píanó- og semballeikari með þeim er Sólveig Anna Jónsdóttir. Á tónleikunum kemur einnig fram hópur flautunemenda í framhaldsnámi og flytur Vatnasvítuna eftir Händel í útsetningu Lombardo og Amazing grace í útsetningu Holcombe. Tónleikarnir hefjst kl. 19:00 og er áætlað að þeir standi í rúmlega klukkustund.

22. maí 2005

Fernir söngtónleikar í Salnum

Á morgun, mánudaginn 23. maí, munu fjórir söngnemendur halda stutta einsöngstónleika í Salnum. Tónleikarnir eru jafnframt árspróf nemendanna þetta árið. Píanóleikari á öllum tónleikunum er Krystyna Cortes. Fjóla Kristín Nikulásdóttir, sópran, nemandi í framhaldsnámi, flytur verk eftir John Dowland, Christoph Willibald Gluck, Antonio Caldara, Hjálmar Ragnarsson og Wolfgang Amadeus Mozart á tónleikum kl. 17:00. Lára Rúnarsdóttir, sópran, nemandi í framhaldsnámi, flytur verk eftir Henry Purcell, Franz Schubert, Robert Schumann og Fjölni Stefánsson á tónleikum kl. 17:30. Á tónleikunum syngur Lára einnig þrjú lög við eigin ljóð. Eyrún Ósk Ingólfsdóttir, sópran, nemandi í framhaldsnámi, flytur verk eftir Giovanni Pergolesi, Christoph Willibald Gluck, Sigvalda Kaldalóns, Edvard Grieg, Hjálmar Ragnarsson og Hugo Wolf á tónleikum kl. 18:00. Ragnheiður Þórdís Stefánsdóttir, messósópran, nemandi í framhaldsnámi, flytur verk eftir Giuseppe Giordani, Georg Frideric Handel, Franz Schubert, Johannes Brahms og Sigvalda Kaldalóns á tónleikum kl. 18:30. Aðgangur að tónleikunum er ókeypis og allir eru velkomnir.

20. maí 2005

Burtfarartónleikar Unnars Geirs Unnarssonar, söngnemanda

Sunnudaginn 22. maí kl. 16.00 heldur Unnar Geir Unnarsson, tenór, burtfarartónleika frá Tónlistarskóla Kópavogs í Salnum, Tónlistarhúsi Kópavogs.

Unnar Geir Unnarsson hóf söngnám við Tónlistarskóla Kópavogs haustið 2002 hjá Önnu Júlíönnu Sveinsdóttur og Krystynu Cortes. Áður hafði hann stundað söngnám við Tónlistarskóla F.Í.H hjá Jóhönnu Linnet og sótt einkatíma hjá Dr. Þórunni Guðmundsdóttur. Unnar Geir hefur tekið þátt í sýningum söngdeildar Tónlistarskólans nú síðast sem Tamino í vinsælli uppfærslu á Töfraflautunni eftir Wolfgang Amadeus Mozart.

Á tónleikunum í Salnum koma fram ásamt Unnari Geir þau Krystyna Cortes, píanóleikari, Hannes Þ. Guðrúnarson, gítarleikari, og hljómsveit Báru Sigurjónsdóttur. Efnisskrá tónleikanna er sérstaklega fjölbreytt og spannar tímann frá 1607 til dagsins í dag. Aðgangur er ókeypis og eru allir velkomnir.

20. maí 2005

Vortónleikar forskóla vorið 2005

Laugardaginn 21. maí verða vortónleikar forskóla haldnir í Salnum. Allir forskólanemendur koma fram, þ.m.t. þeir nemendur Kársnesskóla, Lindaskóla og Salaskóla sem stunda fornám í samvinnu við Tónlistarskólann. Tónleikarnir eru fjórskiptir og verða haldnir kl. 10:30, 11:30, 12:30 og 13:30, en nemendur hafa fengið nánari upplýsingar um tímasetningu sinna tónleika. Með tónleikunum lýkur vetrarstarfi forskóladeildar.

17. maí 2005

Vortónleikar Tónvers TK

Árlegir vortónleikarnir Tónvers Tónlistarskóla Kópavogs verða haldnir í Salnum fimmtudaginn 19. maí kl. 20:00. Frumflutt verða rafskotin tónverk eftir nemendur Tónversins og er óhætt að lofa fjölbreyttri lagaflóru.

[ Meira ]

17. maí 2005

Skólatónleikar í Salnum

Tvennir skólatónleikar verða haldnir í Salnum næstu daga. Fyrri tónleikarnir verða haldnir miðvikudaginn 18. maí kl. 18:15 og seinni tónleikarnir fimmtudaginn 19. maí kl. 18:15. Aðgangur að tónleikunum er ókeypis og eru allir velkomnir.

17. maí 2005

Vortónleikar Suzukideildar í Salnum

Miðvikudaginn 10. maí síðastliðinn luku fimm fiðlunemendur Suzukideildar áfanga í námi sínu og var ljósmyndin hér til hliðar tekin að loknum útskriftartónleikum þeirra. Einn nemendanna útskrifaðist úr Tilbrigðunum, þrír úr Fyrstu bók og einn úr Þriðju bók. Allir nemendur Suzukideildar munu leika á vortónleikum deildarinnar sem verða haldnir miðvikudaginn 18. maí kl. 17:00 í Salnum. Efnisskrá er fjölbreytt og allir eru velkomnir.

9. maí 2005

Tvennir glæsilegir burtfarartónleikar

Nýlega héldu tveir nemendur skólans, Soffía Sigurðardóttir, flautuleikari, og Þuríður Helga Ingadóttir, píanóleikari, burtfarartónleika í Salnum. Á myndasíðu vefsins eru nú aðgengilegar nokkrar ljósmyndir frá tónleikum Soffíu og Þuríðar Helgu, en þær þóttu báðar sýna afbragðsgóða frammistöðu.

2. maí 2005

Burtfarartónleikar Þuríðar Helgu Ingadóttur, píanóleikara

Miðvikudaginn 4. maí kl. 20.00 heldur Þuríður Helga Ingadóttir, píanóleikari, burtfarartónleika frá Tónlistarskóla Kópavogs í Salnum, Tónlistarhúsi Kópavogs. Á efnisskrá burtfarartónleikanna eru verk eftir Johann Sebastian Bach, Ludwig van Beethoven, Franz Liszt og Frédéric Chopin.

Aðgangur að tónleikunum er ókeypis og eru allir velkomnir meðan húsrúm leyfir.

[ Meira ]

1. maí 2005

Skólatónleikar í Salnum

Skólatónleikar verða haldnir í Salnum mánudaginn 2. maí kl. 18:15 og kl. 19:30. Á efnisskrá eru einleiks- og samleiksverk. Aðgangur að tónleikunum er ókeypis og eru allir velkomnir.

24. apríl 2005

Tvennir skólatónleikar í Salnum

Tvennir tónleikar verða haldnir á vegum Tónlistarskólans í vikunni. Fyrri tónleikarnir verða mánudaginn 25. apríl kl. 20:30 og verða þar flutt einleiks- og samleiksverk á ýmis hljóðfæri. Síðari tónleikarnir verða haldnir þriðjudaginn 26. apríl kl. 18:15. Þar munu strengjasveitir I og II leika undir stjórn Unnar Pálsdóttur og Stefáns Arnar Arnarsonar. Á þeim tónleikum flytja söng- og hljóðfæranemendur einnig atriði úr óperunni Hans og Grétu eftir Humperdinck. Aðgangur að tónleikunum er ókeypis og allir velkomnir.

20. apríl 2005

Aukasýning á Töfraflautunni eftir W.A. Mozart

Vegna mikillar aðsóknar verður aukasýning á Töfraflautunni í Salnum föstudaginn 22. apríl kl. 20:00. Óperan er flutt á íslensku og flytjendur eru nemendur söngdeildar Tónlistarskólans. Aðgangur er ókeypis og eru allir velkomnir meðan húsrúm leyfir.

17. apríl 2005

Hljómsveitartónleikar í Seltjarnarneskirkju

Páll Palomares, fiðluleikari, verður einleikari á hljómsveitartónleikum í Seltjarnarneskirkju annað kvöld, mánudaginn 18. apríl, og hefjast tónleikarnir kl. 20.00. Hljómsveitin er skipuð eldri nemendum úr Tónlistarskóla Kópavogs og Tónlistarskóla Seltjarnarness, auk nemenda úr Tónmenntaskóla Reykjavíkur og Tónlistarskólanum í Reykjavík. Á efnisskránni eru m.a. 1. þáttur Haustsins eftir A. Vivaldi, sinfónía nr. 25 eftir W. A. Mozart og syrpa úr söngleiknum Chicago. Stjórnendur hljómsveitarinnar eru Unnur Pálsdóttir og Kári Einarsson. Á tónleikunum leikur einnig stengjasveit, skipuð yngri nemendum úr Tónlistarskóla Seltjarnarness og Tónmenntaskóla Reykjavíkur, sem er undir stjórn Helgu Þórarinsdóttur. Aðgangur að tónleikunum er ókeypis og eru nemendur og velunnarar skólans hvattir til að mæta.

12. apríl 2005

Krakártríóið heimsækir skólann

Miðvikudaginn 13. apríl munu félagar í Krakártríóinu leiðbeina nemendum skólans á masterklassnámskeiði. Enn fremur kemur tríóið fram á skólatónleikum í Salnum sem haldnir verða sama dag kl. 18:15. Aðgangur að tónleikunum er ókeypis og allir velkomnir.

Krakártríóið er skipað þeim Jacek Tosik-Warszawiak, píanóleikara, Julian Tryczynsk, sellóleikara og Krzysztof Smietana, fiðluleikara.

[ Meira ]

10. apríl 2005

Söngnemar flytja Töfraflautuna eftir W.A. Mozart

Nemendur söngdeildar Tónlistarskólans munu flytja Töfraflautuna eftir Wolfgang Amadeus Mozart í Salnum fimmtudaginn 14. apríl kl. 20.00 og föstudaginn 15. apríl kl. 20.00. Nemendur söngdeildarinnar hafa í vetur æft óperuna undir handleiðslu Önnu Júlíönu Sveinsdóttur söngkennara, sem leikstýrir sýningunni, og Krystynu Cortes píanóleikara. Óperan er flutt í íslenskri þýðingu eftir Þránd Thoroddsen, Böðvar Guðmundsson og Þorstein Gylfason, en óbundið mál þýddi Gunnsteinn Ólafsson. Leikstjóri stytti, breytti og sleppti setningum til að stytta óperuna og laga að einföldum sviðsbúnaði. Aðgangur er ókeypis og eru allir velkomnir meðan húsrúm leyfir.

[ Meira ]

10. apríl 2005

Tónleikaröð kennara: Kammertónleikar

Fjórðu og síðustu tónleikarnir í Tónleikaröð kennara Tónlistarskóla Kópavogs starfsárið 2004-2005 verða haldnir laugardaginn 16. apríl kl. 13.00 í Salnum. Á kammertónleikunum leika Sif Tulinius, fiðla, Rúnar Óskarsson, klarinett, Guðrún Birgisdóttir, þverflauta, Sólveig Anna Jónsdóttir, píanó, og Tómas Guðni Eggertsson, píanó. Flutt verða verk eftir Martinu, Strawinsky, Schostakovitch, Enescu og Béla Bartók.

Skólinn vill eindregið hvetja nemendur til að mæta á þessa tónleika, enda er aðgangur ókeypis fyrir þá og ekki spillir að sjá aðstandendur og velunnara skólans með í för.

[ Meira ]

5. apríl 2005

Burtfarartónleikar Soffíu Sigurðardóttur, flautuleikara

Föstudaginn 8. apríl nk. kl. 18.00 heldur Soffía Sigurðardóttir, flautuleikari, burtfarartónleika frá Tónlistarskóla Kópavogs í Salnum, Tónlistarhúsi Kópavogs, sem jafnframt eru hluti framhaldsprófs hennar við skólann. Með Soffíu á tónleikunum leikur Ingunn Hildur Hauksdóttir, píanóleikari. Á efnisskrá tónleikanna eru verk eftir Johann Sebastian Bach, Gabriel Fauré, Bohuslav Martinu og Atla Heimi Sveinsson. Aðgangur að tónleikunum er ókeypis og allir eru velkomnir.

[ Meira ]

19. mars 2005

Páskaleyfi

Skólastarf að loknu páskaleyfi hefst þriðjudaginn 29. mars en þann dag er skipulagsdagur kennara. Kennsla hefst samkvæmt stundaskrá miðvikudaginn 30. mars.

19. mars 2005

Glæsilegir burtfarartónleikar Páls Palomares, fiðluleikara

Nokkrar myndir frá burtfarartónleikum Páls Palomares, fiðluleikara, eru nú aðgengilegar hér á myndasíðu. Salurinn var þétt setinn á tónleikunum og frammistaða Páls einkar glæsileg. Með Páli á tónleikunum lék Nína Margrét Grímsdóttir, píanóleikari. Á efnisskrá burtfarartónleikanna voru verk eftir Wolfgang Amadeus Mozart, César Franck, Giuseppe Tartini og Eugene Ysaÿe, auk þess sem þau fluttu Polonaise de Concert op. 4 eftir Wieniawski sem aukalag.

16. mars 2005

Blokkflaututónleikar Kristveigar Þorbergsdóttur

Kristveig Þorbergsdóttir, blokkflautunemandi, og Sólveig Anna Jónsdóttir, semballeikari, flytja verk eftir Johann Sebastian Bach, Paolo Benedetto Bellinzani, Georg Philip Telemann og Fjölni Stefánsson á stuttum tónleikum sem haldnir verða í Salnum fimmtudaginn 17. mars nk. kl. 20:00. Þessir tónleikar eru fyrstir í röð nokkurra vorprófstónleika þar sem nemendur skólans munu koma fram. Aðgangur að tónleikunum er ókeypis og allir eru velkomnir.

14. mars 2005

Burtfarartónleikar Páls Palomares, fiðluleikara

Miðvikudaginn 16. mars kl. 20.00 heldur Páll Palomares, fiðluleikari, burtfarartónleika frá Tónlistarskóla Kópavogs í Salnum, Tónlistarhúsi Kópavogs. Með Páli á tónleikunum leikur Nína Margrét Grímsdóttir, píanóleikari. Á efnisskrá burtfarartónleikanna eru verk eftir Wolfgang Amadeus Mozart, César Franck, Giuseppe Tartini og Eugene Ysaÿe. Aðgangur að tónleikunum er ókeypis og eru allir velkomnir.

Páll Palomares er 18 ára Kópavogsbúi. Hann hóf fiðlunám fimm ára gamall á Spáni hjá móður sinni, Unni Pálsdóttur, fiðluleikara, og náði snemma góðum tökum á hljóðfærinu. Eftir fjögurra ára hlé á tónlistarnámi hóf Páll nám við Tónlistarskóla Kópavogs haustið 2002 undir handleiðslu Margrétar Kristjánsdóttur, fiðluleikara.

[ Meira ]

13. mars 2005

Hljóðfærakynning fyrir forskólanemendur

Hljóðfærakynning fyrir nemendur sem ljúka forskólanámi í vor og aðstandendur þeirra fer fram í Salnum miðvikudaginn 16. mars kl. 17.00. Í tali, tónum og myndum verða kynnt þau hljóðfæri sem kennt er á í skólanum. Forráðamenn eru hvattir til að fjölmenna með börnum sínum.

13. mars 2005

Árspróf vikuna 14.-18. mars

Árspróf í hljóðfæraleik fara fram í skólanum vikuna 14.-18. mars og því mun kennsla hjá flestum kennurum falla niður að verulegu leyti þessa daga. Þó verður kennt í forskóla og tónfræðagreinum samkvæmt stundaskrá.

13. mars 2005

Skólatónleikar í Salnum

Skólatónleikar verða haldnir í Salnum mánudaginn 14. mars kl. 20:30 og þriðjudaginn 15. mars kl. 18:15. Aðgangur að tónleikunum er ókeypis og eru allir velkomnir.

8. mars 2005

Tónleikaröð kennara: Sononymus - Gagnvirk verk fyrir klassísk hljóðfæri og tölvu

Laugardaginn 12. mars 2005 kl. 13:00 verða haldnir tónleikar í Salnum í tónleikaröð kennara Tónlistarskóla Kópavogs. Í þetta sinn verða flutt gagnvirk verk eftir Hilmar Þórðarson fyrir klassísk hljóðfæri og tölvu. Flytjendur auk Hilmars eru Kristinn H. Árnason, gítarleikari, Áki Ásgeirsson, trompetleikari, og Þórunn Ósk Marinósdóttir, víóluleikari. Einnig mun Haraldur Karlsson fremja sjónlist, en Ríkharður H. Friðriksson annast hljóðstjórn.

Skólinn vill eindregið hvetja nemendur til að mæta á þessa tónleika, enda er aðgangur ókeypis fyrir þá og ekki spillir að sjá aðstandendur og velunnara skólans með í för.

[ Meira ]

7. mars 2005

Masterklass hjá Dimitri Ashkenazy

Dimitri Ashkenazy heimsækir Tónlistarskóla Kópavogs föstudaginn 11. mars og heldur masterklass í klarínettuleik í Salnum kl. 13-17.30. Þar gefst nokkrum nemendum skólans ásamt nemendum úr Tónlistarskólanum í Reykjavík og Listaháskóla Íslands kostur á að fá leiðsögn í verkefnum sínum hjá listamanninum.

Aðgangseyrir fyrir áheyrendur að masterklass Dimitri Ashkenazy í Salnum er 500 krónur. Tónlistarnemar, klarínettuleikarar og annað tónlistaráhugafólk er velkomið á meðan húsrúm leyfir.

[ Meira ]

7. mars 2005

Skólatónleikar í Salnum

Skólatónleikar verða haldnir í Salnum þriðjudaginn 8. mars, kl. 18:15. Aðgangur að tónleikunum er ókeypis og allir velkomnir.

31. janúar 2005

Vel heppnaðir tónleikar Sinfóníuhljómsveitar tónlistarskólanna

Síðastliðinn laugardag 29. janúar hélt Sinfóníuhljómsveit tónlistarskólanna tónleika í Langholtskirkju undir stjórn Guðna Franzsonar og lauk þar með hljómsveitarnámskeiði undir hans stjórn sem hófst 7. janúar síðastliðinn. Fjölmennt var á tónleikunum og hrifust tónleikagestir af frammistöðu hinna ungu tónlistarmanna. Jón Svavarsson ljósmyndari tók myndir á einni æfingu hljómsveitarinnar og er nokkrar þeirra að finna hér.

24. janúar 2005

Tónleikar Sinfóníuhljómsveitar tónlistarskólanna

Laugardaginn 29. janúar nk. kl. 16:00 heldur Sinfóníuhljómsveit tónlistarskólanna tónleika í Langholtskirkju.

Efnisskrá:

Malcolm Arnold: Skoskir dansar op. 59
John Speight: "Ariel", konsert fyrir básúnu og hljómsveit
Igor Stravinsky: Sinfónía í þremur þáttum (1945)

Einleikari á básúnu er Sigurbjörn Ari Hróðmarsson. Stjórnandi er Guðni Franzson.

Almennur aðgangseyrir er 1000 kr. en 500 kr. fyrir nemendur og verða aðgöngumiðar seldir við innganginn.

18. janúar 2005

Skólatónleikar í Salnum

Skólatónleikar verða haldnir í Salnum miðvikudaginn 19. janúar, kl. 18:15. Aðgangur að tónleikunum er ókeypis og eru allir velkomnir.

15. janúar 2005

Sinfóníuhljómsveit tónlistarskólanna

Átján nemendur skólans taka um þessar mundir þátt í hljómsveitarnámskeiði sem er samstarfsverkefni fjögurra tónlistarskóla á höfuðborgarsvæðinu. Þetta eru nemendur í strengjasveit III ásamt nokkrum nemendum sem leika á þverflautu, klarínettu og óbó.

[ Meira ]