Úr aðalnámskrá tónlistarskóla:

Mennta- og menningarhlutverk tónlistarskóla er að

14. mars 2005

Burtfarartónleikar Páls Palomares, fiðluleikara

Miðvikudaginn 16. mars kl. 20.00 heldur Páll Palomares, fiðluleikari, burtfarartónleika frá Tónlistarskóla Kópavogs í Salnum, Tónlistarhúsi Kópavogs. Með Páli á tónleikunum leikur Nína Margrét Grímsdóttir, píanóleikari. Á efnisskrá burtfarartónleikanna eru verk eftir Wolfgang Amadeus Mozart, César Franck, Giuseppe Tartini og Eugene Ysaÿe.

Páll Palomares er 18 ára Kópavogsbúi. Hann hóf fiðlunám fimm ára gamall á Spáni hjá móður sinni, Unni Pálsdóttur, fiðluleikara, og náði snemma góðum tökum á hljóðfærinu. Um 10 ára aldur hafði hann þegar spilað mörg helstu stórverk fiðlubókmenntanna og ellefu ára gömlum hlotnaðist honum sá heiður að koma fram sem einleikari með Ungmennahljómsveit Murcia-héraðs í Spænskri sinfóníu eftir Eduardo Lalo.

Eftir fjögurra ára hlé á tónlistarnámi hóf Páll nám við Tónlistarskóla Kópavogs haustið 2002 undir handleiðslu Margrétar Kristjánsdóttur, fiðluleikara. Auk þess að leiða strengjasveit skólans hefur Páll margsinnis komið fram á tónleikum innan skólans og utan og var m.a. einleikari í nemendaferð til Færeyja vorið 2004. Sama vor kom hann fram á Tíbrártónleikum í Salnum, sem KaSa-hópurinn stóð fyrir undir yfirskriftinni "Ungt og efnilegt tónlistarfólk".

Páll var valinn til taka þátt í starfi Orkester Norden síðastliðið sumar, en sú hljómsveit er skipuð úrvali norrænna hljóðfæraleikara á aldrinum 16-25 ára. Hljómsveitin hélt tónleika í Kaupmannahöfn, Malmö, Kristiansand, Stokkhólmi, Rettvik og Osló. Þá var Páll konsertmeistari á strengjamóti tónlistarskóla sem haldið var á Seltjarnarnesi síðastliðið haust og enn fremur einn þriggja konsertmeistara á tónleikum Sinfóníuhljómsveitar tónlistarskólanna í Langholtskirkju í janúar á þessu ári.

Jafnframt tónlistarnáminu stundar Páll Palomares nám í Verzlunarskóla Íslands og spilar fótbolta með HK og unglingalandsliði Íslands.

Efnisskrá

• Wolfgang Amadeus Mozart (1756-1791) 
  Sónata í e-moll, KV 304 
  - Allegro
  - Tempo di Menuetto
  
• César Franck (1822-1890)
  Sónata í A-dúr 
  - Allegro moderato
  - Allegro
  - Ben moderato
  - Allegretto poco mosso
  
  Hlé
  
• Guiseppe Tartini (1692-1770)
  Sónata í g-moll (Djöflatrillan) 
  Larghetto affetuoso-Allegro-
  Grave-Allegro assai-Grave-
  Allegro assai-Grave-Allegro
  assai-Adagio
  
• Eugène Ysaÿe (1858-1931)
  Sónata op. 27 nr. 3 Ballade

Um verkin

Mozart skrifaði sónötu KV 304 í París árið 1778. Í henni má heyra anda snemmrómantíkur svífa yfir vötnunum. Af þeim 26 verkum, sem Mozart skrifaði fyrir píanó og fiðlu, er þessi sónata sú eina sem er í moll.

Franck samdi sónötu í A-dúr árið 1886. Hún er tileinkuð Eugène Ysaÿe og píanistanum Léontine Marie Bordés-Pène. Þeir frumfluttu verkið í Brussel það sama ár. Sónatan naut strax mikillar hylli, enda einkar litrík, kraftmikil og full af grípandi og fallegum laglínum.

Giuseppe Tartini segir svo frá um tilurð fiðlusónötu sinnar: "Nótt eina, árið 1713, dreymdi mig að ég hefði selt Kölska sálu mína. Þessi nýi þjónn uppfyllti allar mínar óskir. Ég rétti honum fiðluna mína og varð alveg dolfallinn. Hann spilaði sónötu sem var svo undursamleg að ég hafði aldrei heyrt annað eins. Þegar ég vaknaði, greip ég fiðluna og reyndi í örvæntingu að endurvekja tónana úr draumnum. Tónlistin sem ég samdi á því augnabliki er án efa sú besta sem ég hef skrifað en þó svo óendanlega langt frá því sem ég heyrði þá um nóttina."

Belgíski fiðlusnillingurinn, Eugène Ysaÿe, samdi sex sónötur Op. 27 fyrir einleiksfiðlu árið 1924. Hver sónata er tileinkuð ákveðnum fiðlusnillingi og skrifuð með hann í huga. Þetta voru allt samtímamenn Ysaÿe, þeir Joseph Szigeti, Jaques Thibaud, Georges Enescu, Fritz Kreisler, Mathieu Crickboom og Manuel Quiroga. Sónötu nr. 3, sem hér er flutt, tileinkaði hann Enescu. Ysaÿe samdi sónötur sínar undir sterkum áhrifum frá einleiksverkum Bachs.

[ Til baka á Forsíðu ]