Úr aðalnámskrá tónlistarskóla:

Mennta- og menningarhlutverk tónlistarskóla er að

4. apríl 2005

Tónleikaröð kennara: Kammertónleikar

Fjórðu og síðustu tónleikarnir í Tónleikaröð kennara Tónlistarskóla Kópavogs starfsárið 2004-2005 verða haldnir laugardaginn 16. apríl kl. 13.00 í Salnum. Á kammertónleikunum leika Sif Tulinius, fiðla, Rúnar Óskarsson, klarinett, Guðrún Birgisdóttir, þverflauta, Sólveig Anna Jónsdóttir, píanó, og Tómas Guðni Eggertsson, píanó. Flutt verða verk eftir Martinu, Strawinsky, Schostakovitch, Enescu og Béla Bartók.

Skólinn vill eindregið hvetja nemendur til að mæta á þessa tónleika, enda er aðgangur ókeypis fyrir þá og ekki spillir að sjá aðstandendur og velunnara skólans með í för.

Efnisskrá

• Bohuslav Martinu (1890 - 1959): 
  Madrigal Sonata fyrir píanó, flautu og fiðlu
  - Poco allegro
  - Moderato
   
• Igor Stravinsky (1882-1971): 
  Þrjú verk fyrir einleiksklarínettu
   
• Dmitri Shostakovits (1906-1975): 
  Fjórir valsar fyrir flautu, klarínettu og píanó
  - Vorvals
  - Valsgletta
  - Vals
  - Lírukassavals
   
• Georges Enescu (1881-1955): 
  Cantabile et Presto
   
• Béla Bartók (1881-1945): 
  Contrasts
  1. Verbunkos
  2. Pihenö
  3. Sebes

Um tónlistina

Martinu samdi Madrigal sónötuna árið 1942 en það var fyrsta ár hans í Bandaríkjunum. Líkt og Enescu lét dvaldi hann langdvölum í París, en var Tékki, nánar tiltekið fæddur í Policka. Tónlist hans er ofin úr nokkrum áberandi þráðum: Nýklassíksur stíll, tékkneskur þjóðararfur, jazzinn og áhugi á renisans tónlist eru meðal þess sem menn þykjast kenna í tónlist hans

Igor Stravinsky var fæddur 1882 í borginni Oranienbaum í Rússlandi, suðvestur af St. Pétursborg. Verkin þrjú fyrir einleiksklarínettu voru samin árið 1918 þegar Stravinsky dvaldist í Sviss. Fyrsta verkið hefur rólega áferð og er eingöngu leikið á neðsta tónsvið A klarínettunnar, en A klarínettan er lengri og hefur dekkri tón en hin venjulega B klarínetta. Annað verkið hljómar nær eins og spuni - það eru engin taktstrik - og
tónskáldið leikur sér með hin ýmsu blæbrigði og tónsvið hljóðfærisins. Þriðja verkið er leikið á B klarínettu og þar heyrum við hljóm bæði frá tangó og ragtime, og gott ef öllu er ekki gefið langt nef í lokin! Verkið var frumflutt 8. nóvember í Lausanne í Sviss ásamt öðru frægu verki tónskáldsins, Sögu dátans.

Dmitri Shostakovich var tengdur leikhúsinu allt sitt líf og samdi mikið af tónlist fyrir leiksýningar og balletta. Sem táningur lék hann einnig á píanó undir sýningum þöglu kvikmyndanna og eftir hann liggur tónlist við þrjátíu og sjö myndir. Valsar og dansar eru stór hluti af þessari kvikmynda- og leikhústónlist og er það ef til vill sú hlið á Schostakovich sem fæstir þekkja. Þá fjóra valsa sem hér verða fluttir útsetti L. Atovmian og eru þeir teknir úr ópusnúmerunum 78, 27, 97A og 45.

George Enescu samdi Cantabile og Presto árið 1921 fyrir vorpróf flautubekkjarins við Konservatóríið í París og tileinkaði Paul Taffanel sem gjarnan hefur verið nefndur faðri franska flautuskólans. Þetta verk er ekta keppnisverk, fyrri hlutinn sýnir blæbrigðaríka syngjandi eiginleika flautunnar en í seinni hlutanum fá fingurnir og lipurðin að skína. Enescu var rúmenskur en Frakkar eigna sér hann óspart.

Það var góðvinur Béla Bartóks og samlandi, fiðluleikarinn Jószef Szigeti, sem átti þá snjöllu hugmynd árið 1938 að hvetja sveiflukónginn Benny Goodman til að panta tónverk frá tónskáldinu. Klarínettuleikaranum fjölhæfa leist vel á hugmyndina og pantaði verk sem átti að vera í tveimur köflum og um sex mínútur að lengd, svo hægt væri að koma því fyrir á 78 snúninga hljómplötu. Þegar upp var staðið og endanleg gerð verksins lá fyrir voru kaflarnir þó þrír og mínúturnar nær fimmtán. Goodman lét sér það vel líka og frumflutti verkið í Carnegie Hall árið 1940 ásamt Szigeti og tónskáldinu og þremenningarnir gerðu einnig fræga hljóðritun af verkinu.

Miðkaflinn í Contrasts, sem Bartók laumaði inn í upphaflegu hugmyndina, ber yfirskriftina Pihenö (hvíld eða hlé) og er falleg næturmynd, þar sem hægfara raddir fiðlu og klarínettu eru spegilmyndir hvor af annarri. Ytri kaflar verksins samsvara hefðbundinni skiptingu ungverska dansins csárdás í hægan upphafskafla og fjörugan seinni hluta. Fyrsti kaflinn, Verbunkos, ber nafn forvera csárdásins, en sá dans var dansaður af húsörum við samkomur í þorpum og bæjum Ungverjalands þegar reynt var að lokka unga menn í herinn.

Endurómurinn frá þjóðlegri ungverskri tónlist er vissulega auðgreinanlegur í Contrasts, en áhrifin koma víðar að. Bartók sagðist hafa haft blúskaflann í fiðlusónötu Ravels í huga þegar hann samdi fyrsta kaflann og ekki er laust við að gamelantónlist Indónesíu komi upp í hugann þegar hlýtt er á miðkaflann. Benny Goodman sagði líka stoltur frá því að Bartók hefði sótt innblástur í upptökur með sögufrægu djasstríói hans, Teddy Wilsons og Gene Krupa. Kannski hefur leikgleði þeirra frábæru listamanna kveikt hugmyndirnar að ýmsu tónrænu sprelli í Contrasts, eins og t.d. falskri fiðlunni í upphafi lokakaflans.

Um flytjendur

Guðrún Birgisdóttir hóf störf sem kennari í Tónlistarskóla Kópavogs haustið 1982. Á fyrstu árum sínum í kennslu tók hún þátt í miklu verkefni við að endurskipuleggja og semja námsefni í tónfræði og tónheyrn fyrir skólann en seinni árin hefur hún aðallega kennt flautuleik og er nú deildarstjóri við skólann. Guðrún hefur tekið þátt í tónlistarlífinu hér með margvíslegum hætti. Hún hefur leikið í hljómsveitum, verið einleikari og komið víða fram sem kammermúsíkant. Hún hefur nokkrum sinnum notið starfslauna ríkisins og starfstyrkja frá Kópavogsbæ. Leikur hennar hefur verið hljóðritaður og gefinn út á geisladiskum og fyrir hana hafa íslensk tónskáld samið allmörg tónverk. Guðrún hefur einnig komið fram á fjölda tónleika erlendis.

Sif Tulinius hóf nám í fiðluleik sjö ára gömul hjá Gígju Jóhannsdóttur og lauk einleikaraprófi frá Tónlistarskólanum í Reykjavík vorið 1991 undir handleiðslu Guðnýjar Guðmundsdóttur. Hún stundaði framhaldsnám í Bandaríkjunum og lauk B.A. prófi frá Oberlin College sem nemandi Almitu og Rolands Vamos og meistaragráðu frá New York þar sem kennarar hennar voru Joyce Robbins og Joel Smirnoff. Hún hefur tekið þátt í fjölda tónlistarhátíða í Bandaríkjunum, Evrópu og Japan og hefur einnig starfað sem leiðbeinandi á námskeiðum í Bandaríkjunum. Sif hefur tekið virkan þátt í flutningi nútímatónlistar og hefur starfað með ýmsum tónlistarhópum m.a. Ensemble Modern og CAPUT-hópnum. Sif hefur á undanförnum árum komið fram á öllum helstu tónlistarhátíðum á Íslandi og einnig sem einleikari með Kammersveit Reykjavíkur og Sinfóníuhljómsveit Íslands. Sif hefur gegnt stöðu 2. konsertmeistara frá hausti 2000.

Sólveig Anna Jónsdóttir er fædd á Akureyri. Hún hóf píanónám á Ísafirði hjá Ragnari H. Ragnar en stundaði annars nám við Tónlistarskólann á Akureyri, Tónlistarskólann í Reykjavík og University of Houston. Meðal kennara hennar voru Philip Jenkins, Halldór Haraldsson og Nancy Weems. Sólveig Anna hefur lengst af haft píanókennslu og meðleik með nemendum að aðalstarfi, nú síðast við Tónlistarskóla Kópavogs. Hún hefur enn fremur komið fram á tónleikum hérlendis og erlendis, með einsöngvurum og kórum, einleikurum og kammerhópum.

Rúnar Óskarsson lauk einleikara- og kennaraprófi frá Tónlistarskólanum í Reykjavík árið 1993 þar sem Sigurður I. Snorrason var kennari hans. Framhaldsnám stundaði hann hjá George Pieterson við Sweelinck Conservatorium í Amsterdam og lauk einleikaraprófi á klarínettu frá skólanum árið 1996. Samhliða klarínettunáminu lagði hann einnig stund á bassaklarínettuleik hjá Harry Sparnaay og lauk einleikaraprófi á bassaklarínettu árið 1998. Rúnar sótti einnig tíma hjá Walther Boeykens í Rotterdam. Eftir að námi lauk starfaði hann við kennslu og hljóðfæraleik í Hollandi í þrjú ár. Eftir heimkomu árið 2001 hefur Rúnar leikið með ýmsum hópum, t.d. Kammersveit Reykjavíkur, hljómsveit Íslensku óperunnar og CAPUT auk þess að leika á fjölda kammer- og einleikstónleika. Rúnar hefur leikið með Sinfóníuhljómsveit Íslands síðan í janúar 2004.

Tómas Guðni Eggertsson lauk prófi í píanóleik með ágætiseinkunn frá Nýja tónlistarskólanum undir handleiðslu Vilhelmínu Ólafsdóttur vorið 1996. Hann fór til framhaldsnáms við Royal Scottish Academy of Music and Drama í Glasgow og lauk þaðan BA prófi 1999 og Postgraduate námi ári síðar. Kennari hans þar var Jean Hutchinson. Tómas Guðni hefur komið fram á tónleikum hér heima sem og í Bretlandi bæði sem einleikari og meðleikari með söng- og hljóðfæraleikurum. Hann var m.a. valinn til að frumflytja verk tónskáldsins Gracielu Paraskevaídis að henni viðstaddri. Sem meðleikari hefur Tómas Guðni unnið til 1. verðlauna í ljóðakeppni innan RSAMD ásamt mezzo-sópransöngkonunni Andee-Louise Hypolite. Tómas Guðni hefur sótt fjölda námskeiða og m.a. leikið fyrir; John Lill, Martino Tirimo, Roger Vignoles, Martin Isepp, Philip Jenkins, Kenneth Van Barthold, og Benjamin Luxon. Tómas Guðni hefur samið, útsett og stjórnað tónlistarflutningi við leiksýningar með leiklistardeild RSAMD í Glasgow og ferðast með sýningar til Manchester og Lundúna, með Stúdentaleikhúsinu í Reykjavík og Leikfélagi Menntaskólans á Ísafirði. Tómas Guðni hefur kennt píanóleik við Tónlistarskóla Kópavogs frá 2003.

Aðgangseyrir

• Almennt miðaverð: 1.500 kr.
• Eldri borgarar, öryrkjar og námsmenn: 1.200 kr.
• Kennarar Tónlistarskóla Kópavogs og aðstandendur nemenda: 500 kr.
• Nemendur Tónlistarskóla Kópavogs: Frítt.
• 12 ára og yngri: Frítt

Sími í miðasölu er 5 700 400 og er opið virka daga kl. 9.00-16.00 og klst. fyrir tónleika.

[ Til baka á Forsíðu ]