Tónlistarskóli Kópavogs


	Úr aðalnámskrá tónlistarskóla: Mennta- og menningarhlutverk tónlistarskóla er að
	-	veita öllum, sem þess æskja, færi á að kynnast tónlistarnámi af eigin raun
	-	skapa nemendum tækifæri til tónlistarflutnings, jafnt innan skóla sem utan

FORSÍÐA

Fréttir 2003

20. desember 2003

Jólaleyfi

Starfsfólk Tónlistarskóla Kópavogs óskar nemendum, aðstandendum þeirra og velunnurum skólans gleðilegra jóla og farsæls nýs árs og þakkar samstarfið á afmælisárinu 2003. Skrifstofa skólans verður lokuð í jólaleyfi frá 22. desember 2003 til 2. janúar 2004, en opnar aftur mánudaginn 5. janúar 2004. Kennsla að loknu jólaleyfi hefst samkvæmt stundaskrá þann dag.

13. desember 2003

Jólatónleikar forskóladeildar

Jólatónleikar forskóladeildar voru haldnir laugardaginn 13. desember sl. í Salnum og komu þar fram um 300 prúðbúin börn á fernum tónleikum. Allir nemendur forskóladeildarinnar komu fram, þar með taldir þeir nemendur Kársnesskóla, Lindaskóla og Salaskóla sem stunda fornám í samvinnu við Tónlistarskólann. Á tónleikunum sungu nemendurnir og léku á blokkflautur eða ásláttarhljóðfæri. Salurinn var þéttsetinn á öllum tónleikunum og nemendurnir stóðu sig með mikilli prýði.

4. desember 2003

Góð frammistaða í píanókeppni

Dagana 26.-30. nóvember síðastliðinn var haldin í Salnum píanókeppni á vegum Íslandsdeildar EPTA, Evrópusambands píanókennara. Keppnin var ætluð píanónemendum yngri en 25 ára og var keppt í þremur flokkum; miðnám (4.-5. stig), framhaldsnám (6.-7. stig) og háskólanám. Þátttakendur voru víða af landinu og fengu þeir æfingaaðstöðu hér í skólanum, en keppnin sjálf fór fram á sviði Salarins. Þuríður Helga Ingadóttir, 13 ára nemandi í Tónlistarskóla Kópavogs, var ein 15 þátttakenda í framhaldsnámsflokknum og þeirra lang yngst. Ekki duldist neinum sem á hlýddi að mikið er spunnið í Þuríði Helgu og var hún sér og kennara sínum, Sigrúnu Grendal Jóhannesdóttur, til sóma með þátttöku sinni í keppninni.

26. nóvember 2003

Nemendatónleikar í desember

Í desember verða nemendatónleikar í Salnum sem hér segir:

Miðvikudaginn 3. desember kl. 17:30 - Nemendur á ýmsum námsstigum munu koma fram.
Miðvikudaginn 3. desember kl. 19:30 - Nemendur á ýmsum námsstigum munu koma fram, m.a. blásarasveit skólans undir stjórn Jóns Halldórs Finnssonar.
Laugardaginn 6. desember kl. 14:00 - Strengjasveitir I, II og III leika undir stjórn Unnar Pálsdóttur og Stefáns Arnar Arnarsonar.
Mánudaginn 8. desember kl. 19:30 - Nemendur á ýmsum námsstigum koma fram.
Laugardaginn 13. desember kl. 10:30, 11:30, 12:30 og 13:30 - Jólatónleikar forskóla. Allir forskólanemendur koma fram þ.m.t. þeir nemendur Kársnesskóla, Lindaskóla og Salaskóla sem stunda fornám í samvinnu við Tónlistarskólann. Tónleikarnir eru fjórskiptir og munu nemendur fá nánari upplýsingar um tímasetningu þeirra tónleika.
Mánudaginn 15. desember kl. 18:00 - Nemendur á ýmsum stigum námsins koma fram, m.a. Suzuki-fiðlunemendur.
Mánudaginn 15. desember kl. 19:30 - Nemendur á ýmsum stigum leika.

Aðgangur er ókeypis á alla tónleikana og eru allir velkomnir á meðan húsrúm leyfir.

16. nóvember 2003

Nýtt efni á vefnum

Ljósmyndir frá hátíðarsamkomu TK 1. nóvember 2003 eru nú aðgengilegar á myndasíðu vefsins sem og ávarp Hákonar Sigurgrímssonar, formanns stjórnar TK, sem hann flutti á samkomunni. Auk þess hafa nú verið settar á vefinn myndir frá afmælishátíð skólans 24. maí 2003.

4. nóvember 2003

Afmælishátíð Tónlistarskóla Kópavogs

Laugardaginn 1. nóvember síðastliðinn voru liðin 40 ár frá því Tónlistarskóli Kópavogs tók til starfa. Við hátíðlega athöfn í Salnum, Tónlistarhúsi Kópavogs, í tilefni dagsins var skólanum afhent gjafabréf til kaupa á sembal að gjöf frá Kópavogsbæ. Mun hljóðfærið verða sameign skólans og Salarins. Hákon Sigurgrímsson, formaður stjórnar skólans, tók við gjafabréfinu úr hendi Gunnars I. Birgissonar, formanns bæjarráðs, og þakkaði höfðinglega gjöf. Sagði hann hljóðfærið myndi nýtast vel bæði skólanum og Salnum til kennslu og tónleikahalds.

Þá var Runólfur Þórðarson, verkfræðingur og fyrrverandi formaður Tónlistarfélags Kópavogs, heiðraður. Runólfur starfaði sem formaður félagsins og um leið formaður skólanefndar Tónlistarskólans í yfir þrjá áratugi, eða frá 1970 til 2001. Var rekstur skólans meginverkefni félagsins, allt þar sú breyting var gerð á rekstrarformi skólans að hann var gerður að sjálfseignarstofnun árið 2001. Var Runólfi þakkað óeigingjarnt starf í þágu skólans og honum afhent listaverkagjöf frá skólanum.

1. nóvember 2003

Vefur Tónlistarskóla Kópavogs

Vefur Tónlistarskóla Kópavogs var opnaður af Sigurði Geirdal, bæjarstjóra í Kópavogi, við hátíðlega athöfn í Salnum, Tónlistarhúsi Kópavogs, sem haldin var í dag í tilefni þess að 40 ár eru liðin frá því að Tónlistarskóli Kópavogs tók til starfa. Vefnum er ætlað að auðvelda upplýsingaflæði til nemenda og forráðamanna þeirra. Þar eru birtar tilkynningar og fréttir af starfsemi skólans og veittar almennar upplýsingar um námið. Vefurinn er skreyttur myndum úr skólastarfinu og í hverri viku er birtur stuttur pistill um tónskáld vikunnar sem unninn er af nemendum skólans.

1. nóvember 2003

Nýir kennarar og deildarstjórar

Í haust voru ráðnir þrír nýir kennarar við skólann. Þeir eru Rúnar Óskarsson, sem kennir á klarinett og saxófón, Tómas Eggertsson, sem kennir á píanó, og Þórunn Sigurðardóttir, sem kennir forskóla og tónfræði. Eru þeir boðnir hjartanlega velkomnir til starfa! Þá voru skipaðir nýir deildarstjórar þær Guðrún S. Birgisdóttir í blásaradeild og Sólveig Anna Jónsdóttir í píanódeild. Deildarstjórar eru millistjórnendur og vinna með skólastjóra og aðstoðarskólastjóra að stefnumótun skólans. Aðrir deildarstjórar eru Hilmar Þórðarson, Nína Margrét Grímsdóttir og Marta Sigurðardóttir, deildarstjóri tónfræðadeildar.

1. nóvember 2003

Lindaskóli í samstarf um forskóla

Í haust bættist Lindaskóli í hóp þeirra grunnskóla Kópavogs sem innleiða forskólanám í tónlist sem skyldunámsgrein fyrir 2. bekk. Notað er námsefni sem Tónlistarskólinn hefur útbúið og fer kennslan fram í samstarfi við og í faglegri umsjá hans. Undanfarin ár hafa Kársnesskóli og Salaskóli haft hliðstætt samstarf við Tónlistarskólann.

1. nóvember 2003

Stigakerfið lagt niður

Ný aðalnámskrá tónlistarskóla hefur tekið gildi að fullu. Meginbreytingin er áfangaskipting námsins í grunnnám, miðnám og framhaldsnám. Nemendur þreyta áfangapróf í lok hvers áfanga og um leið heyrir gamla stigakerfið, sem skiptist í átta stig, sögunni til. Í Tónlistarskóla Kópavogs verða framvegis einungis tekin vorpróf og áfangapróf.

1. nóvember 2003

Viðurkenningar fyrir framúrskarandi námsárangur

Við skólaslit Tónlistarskóla Kópavogs 30. maí síðastliðinn hlutu þrír nemendur viðurkenningu fyrir framúrskarandi námsárangur skólaárið 2002-2003. Þeir sem viðurkenninguna hlutu eru Skúli Þór Jónasson, nemandi í sellóleik, Unnar Geir Unnarsson, söngnemandi, og Páll Palomares, nemandi í fiðluleik.

Skúli Þór Jónasson lauk í vor 3. stigsprófi í sellóleik undir handleiðslu Arnþórs Jónssonar. Skúli hefur sýnt mikla hæfileika til námsins, ástundun og árangur síðastliðinn vetur var til fyrirmyndar, hann stóð sig vel á tónleikum og hann tók þátt í hljómsveitarstarfi sem og í öðrum samleik með góðum árangri.

Unnar Geir Unnarsson er í miðhluta söngnámsins. Unnar Geir hefur fengið fagra söngrödd í vöggugjöf og vann síðastliðinn vetur af miklum krafti og tók góðum framförum undir handleiðslu kennara síns, Önnu Júlíönu Sveinsdóttur. Frá því strax í fyrrahaust undirbjó hann sig fyrir að syngja hlutverk Orfeosar í samnefndri óperu Monteverdi í uppsetningu skólans, hlutverk sem hann leysti af hendi svo eftir var tekið.

Páll Palomares er hæfileikaríkur fiðluleikari sem tók námið föstum tökum síðastliðinn vetur og lét árangurinn ekki á sér standa. Kennari hans er Margrét Kristjánsdóttir. Páll lauk 7. stigi nú í vor með ágætiseinkunn 9,2. Hann æfði auk þess kammertónlist síðastliðinn vetur undir leiðsögn Nínu Margrétar Grímsdóttur og hlaut einkunnina 9,5 fyrir frammistöðu sína þar. Páll hefur oft komið fram á tónleikum, einn og sem hluti af kammerhóp, bæði innan og utan skólans.

1. nóvember 2003

Burtfararpróf í þverflautuleik

Á liðnu skólaári lauk einn nemandi, Hafdís Vigfúsdóttir, burtfararprófi í þverflautuleik. Hafdís er yngsti nemandi sem lýkur burtfararprófi frá Tónlistarskóla Kópavogs. Hún hóf ung að árum nám við skólann og var aðalkennari hennar frá upphafi Guðrún S. Birgisdóttir. Hafdís hélt burtfarartónleika sína þann 16. nóvember 2002 og var Sólveig Anna Jónsdóttir meðleikari hennar á píanó. Í umsögn prófdómara á burtfarartónleikunum segir:

"Hafdís lék af miklu öryggi og næmni á burtfararprófstónleikum sínum. Hún sýndi viðfangsefni sínu alúð og lék hvert verk með þeim stíl er við hæfi var hverju sinni og af innileik. Hún hefur þegar náð mjög góðum tökum á tækni og tónmyndun flautunnar. Hafdís hlýtur einkunnina 9,3"

Hafdís hefur þegar hafið framhaldsnám við Listaháskóla Íslands.