Tónver Tónlistarskóla 
Kópavogs

Í Tónlistarskóla Kópavogs er boðið upp á nám í tölvutónlist við tónver skólans. Það tók til starfa árið 1995 og er eitt elsta starfandi tónver landsins. Í tónverinu er mjög fullkomin aðstaða til að fást við tónlist og hljóð.

Í tónverinu er mjög fullkomin aðstaða til að fást við tónlist og hljóð.

Kennt er á öll vinsælustu tónlistarforrit dagsins í dag og auk þess fræðast nemendur um sögu raftónlistar, læra upptökutækni, hljóðvinnslu, hljóðgervlaforritun og margt fleira. Markmið með náminu er að þjálfa nemendur í að nota tölvu og - búnað sem aðalhljóðfæri og leggja öflugan grunn að námi á háskólastigi og starfi þeirra sem “raftónlistarfólk". Nemendur tónversins hafa frá upphafi komið úr ólíkum áttum - og eftir nám hafa þeir jafnframt dreift sér vítt og breitt um jarðir tónlistarsenunnar og margir hverjir gert það afar gott.

Námið skiptist í:

• verklega tíma, þar sem kennd er meðferð tækja og hugbúnaðar til hljóðhönnunar, hljóðritunar og tónsköpunar.
• bóklega tíma, þar sem farið er yfir helstu atriði hljóðfræði, upptökufræði og þróun raf- og tölvutónlistar.
• raftónlistarsögu, sem kennd er á tveimur önnum.
• tónfræðatíma, þ.e. tónheyrn, hljómfræði og tónlistarsögu auk valgreinar.

Námið er á framhaldsnámsstigi samkvæmt aðalnámskrá tónlistarskóla og er námslengd er áætluð þrjú ár. Í einstaka tilvikum kann að vera unnt að ljúka náminu á skemmri tíma en einnig getur lengri námstími verið eðlilegur. Ekki er gert upp á milli tónlistarstefna.

Miðað er við að nemendur, sem hefja nám við tónverið, hafi lokið miðprófi í tónfræðagreinum. Sé þeirri þekkingu ábótavant er boðið upp á sérstaka tíma í tónfræðagreinum og skal miðprófi lokið innan tveggja ára.

Nemendur útskrifast með framhaldspróf í tölvutónlist eftir að hafa fullnægt öllum þeim kröfum sem farið er fram á samkvæmt aðalnámskrá tónlistarskóla.

Í tónverinu eru m.a. eftirtaldir möguleikar og aðstaða:

• Forrit til tónsmíða m.a. Ableton Live, Logic Pro, Pro Tools, Reaper, Max, PD, Sibelius o.fl.
• Sýndarhljóðfæri (virtual instruments) m.a. frá Native Instruments, Arturia, Roland, Korg ofl.
• Sýndar-stúdíóbúnaður (VST-plugins) m.a. frá Izotope, FabFilter, Waves, Soundtoys ofl.
• Modular hljóðgervlar.
• Útvær stúdíóbúnaður frá Focusrite, SSL ofl.
• Surround (5.1) hátalarakerfi.
• MIDI-stýritæki (Midi-controllers).
• Stafræn hljóðupptaka og -búnaður, og míkrófónar af ýmsum stærðum og gerðum.
• Möguleiki á myndvinnslu og stafrænni meðhöndlun myndefnis.
• Hljóðhönnun - Stafræn og hliðræn (analog) hljóðmyndun og hljóðvinnsla sem nýtist hvort heldur til að búa til hljóð frá grunni eða meðhöndla áður tilbúin hljóð á margvíslegan hátt.
• Stafræn eftirvinnsla á hljóði, t.d. klipping og hreinsun á upptökum með iZotope RX.
• Tónlistarforritun, þar sem hægt er að láta tölvu stýra ýmsum ferlum við samningu og meðhöndlun tónlistar.

Frekari upplýsingar um tónverið má fá á skrifstofu skólans. Einnig er hægt að senda fyrirspurnir beint til kennara tónversins, Haraldar V. Sveinbjörnssonar og Jespers Pedersen, á netfangið tonver@tonlistarskoli.is