Tónlistarskóli Kópavogs


	Úr aðalnámskrá tónlistarskóla: Mennta- og menningarhlutverk tónlistarskóla er að
	-	veita öllum, sem þess æskja, færi á að kynnast tónlistarnámi af eigin raun
	-	skapa nemendum tækifæri til tónlistarflutnings, jafnt innan skóla sem utan

FORSÍÐA

Fréttir 2013

15. desember 2013

Góðar gjafir frá Íslandsbanka og Rótarýklúbbnum Borgum

Í tilefni 50 ára afmælis Tónlistarskóla Kópavogs bárust skólanum góðar gjafir síðastliðinn föstudag frá Íslandsbanka og Rótarýklúbbnum Borgum. Er um að ræða sérstaka taupoka fyrir nemendur í grunnnámi til að nota fyrir nótur og aðra fylgihluti tónlistarnema. Skólinn þakkar kærlega þessa velvild.

Fulltrúar nemenda og skólastjórnendur veittu pokunum viðtöku úr hendi Guðrúnar Katrínar J Gísladóttur, útibússtjóra Íslandsbanka á Digranesvegi 1, og var þessi mynd tekin við það tækifæri. Suzuki-fiðlunemendur undir stjórn Helgu Óskarsdóttur þökkuðu fyrir með tónlistarflutningi fyrir starfsfólk og viðskiptavini bankans.

Fulltrúar forskólanemenda tóku við pokum frá Rótarýklúbbnum Borgum. Við það tækifæri sungu og léku nemendur frumsamið tónverk, Jólaandann, undir stjórn Álfheiðar Björgvinsdóttur. Mynd hér að ofan er frá athöfn í skólanum þegar Málfríður Klara Kristiansen og Guðlaug Rakel Guðjónsdóttir, fulltrúar klúbbsins, afhentu fyrstu pokana.

15. desember 2013

Jólatónleikar í vikunni

Í vikunni er mikið um að vera í skólanum. Ýmsir kennarar eru með jólasamspil eða tónleika með sínum nemendum. Auk þess eru eftirfarandi jólatónleikar á dagskrá í Salnum þar sem hljóðfæra- og söngnemendur á ýmsum námsstigum koma fram.

Þriðjudaginn 17. desember kl. 18:00
- Byrjendasveit fiðlunemenda og Strengjasveitir I og II leika.
Þriðjudaginn 17. desember kl. 19:00
Þriðjudaginn 17. desember kl. 20:00
Miðvikudaginn 18. desember kl. 17:15
Miðvikudaginn 18. desember kl. 18:00
Miðvikudaginn 18. desember kl. 19:00
Miðvikudaginn 18. desember kl. 20:00

Aðgangur að tónleikunum er ókeypis og eru allir velkomnir:

5. desember 2013

Tónleikar í Salnum á mánudag og þriðjudag

Aðventutónleikar verða haldnir í Salnum mánudaginn 9. desember kl. 18:00 og 19:00. Einnig verða tvennir tónleikar þriðjudaginn 10. desember, kl. 18:00 og 19:00. Aðgangur að tónleikunum er ókeypis og allir velkomnir.

5. desember 2013

Jólatónleikar forskóladeildar

Jólatónleikar forskóladeildar verða haldnir í Salnum laugardaginn 7. desember kl. 10:00 og 11:15. Allir forskólanemendur koma fram og hafa nemendur fengið upplýsingar um það hvenær þeir eiga að mæta og hvar þeir eiga að sitja. Hvorir tónleikar eru um 30 mínútna langir. Aðgangur er ókeypis og allir velkomnir.

27. nóvember 2013

Stofnun Hollvinasamtaka Tónlistarskóla Kópavogs

Stofnfundur Hollvinasamtaka Tónlistarskóla Kópavogs verður haldinn næstkomandi laugardag, 30. nóvember 2013, kl. 11.

Meginmarkmið Hollvinasamtakanna verða að efla og styrkja starfsemi Tónlistarskóla Kópavogs og stuðla að framgangi tónlistarmenntunar í samfélaginu.

Samtökin eru öllum opin og eru áhugasamir hvattir til að mæta á stofnfundinn en hann verður haldinn í húsnæði Tónlistarskólans að Hamraborg 6 (gengið inn á austurhlið hússins).

23. nóvember 2013

Skólatónleikar í Salnum á mánudag

Skólatónleikar verða haldnir í Salnum mánudaginn 25. nóvember, kl. 20:00. Aðgangur að tónleikunum er ókeypis og allir velkomnir.

23. nóvember 2013

Tónleikaröð kennara: 200 ár af ítalskri ástríðu

Í tilefni 200 ára afmælis Giuseppe Verdi býður TKTK upp á óvenjulega, frumlega og sjaldgæfa efnisskrá á tónleikum í Salnum þriðjudaginn 26. nóvember kl. 19:00. Við kynnum óperusköpun Verdis með hans frægustu aríum - sem urðu innblástur margra annarra tónskálda í hans tíð. Flytjendur eru Gissur Páll Gissurarson, tenór, Pamela De Sensi, flautuleikari, og Eva Þyri Hilmarsdóttir, píanóleikari.

Skólinn vill eindregið hvetja nemendur til að mæta á þessa tónleika, enda er aðgangur ókeypis fyrir þá og ekki spillir að sjá aðstandendur og velunnara skólans með í för.

[ Meira ]

18. nóvember 2013

Skólatónleikar í Salnum

Skólatónleikar verða haldnir í Salnum miðvikudaginn 20. nóvember kl. 18:00. Fram koma nemendur á ýmsum námsstigum. Aðgangur að tónleikunum er ókeypis og allir velkomnir.

4. nóvember 2013

Skólatónleikar í Salnum

Skólatónleikar verða haldnir í Salnum þriðjudaginn 5. nóvember kl. 18:00. Aðgangur að tónleikunum er ókeypis og allir velkomnir.

4. nóvember 2013

Húsfyllir á hátíðarsamkomu

Salurinn var þéttsetinn á hátíðarsamkomu Tónlistarskóla Kópavogs í tilefni 50 ára afmælis skólans síðastliðinn föstudag. Á dagskrá voru fjölbreytt tónlistaratriði þar sem fram komu bæði forskólanemendur og hljóðfæranemendur á öllum námsstigum, svo og fyrrverandi nemendur. Ávörp fluttu Árni Harðarson, skólastjóri, og Ármann Ólafsson, bæjarstjóri, og tilkynntu þeir um stofnun rytmískrar deildar við skólann á næsta ári. Afhenti bæjarstjóri skólanum peningagjöf til hljóðfærakaupa af því tilefni. Einnig ávarpaði Guðríður Helgadóttir samkomuna og tilkynnti um fyrirhugaða stofnun Hollvinasamtaka skólans.

Meðal tónlistaratriða var samspil fjögurra píanóleikara sem fluttu tilbrigði við afmælislagið, skólanum til heiðurs. Meðfylgjandi ljósmynd er frá þessu atriði, en þar má auk píanóleikaranna sjá kynna samkomunnar, þær Brynju Sævarsdóttur, Brynhildi Erlu Finnbjörnsdóttur, Heklu Martinsdóttur Kollmar og Margrét Júlíu Björnsdóttur.

27. október 2013

Tónlistarskóli Kópavogs 50 ára

Tónlistarskóli Kópavogs fagnar 50 ára afmæli um þessar mundir og verður haldið upp á tímamótin með ýmsum hætti í vetur. Í þessari viku opnum við afmælisárið með námskeiða- og tónleikahaldi, auk þess sem hátíðardagskrá verður í Salnum kl. 17:00 föstudaginn 1. nóvember en þann dag eru 50 ár liðin frá því að skólinn til starfa. Eru nemendur, forráðamenn og aðrir velunnarar skólans velkomnir til að samfagna með okkur.

Eftirfarandi tónleikar verða haldnir í Salnum:

Mánudaginn 28. október kl. 20:00
Þriðjudaginn 29. október kl. 18:00, 19:00 og 20:00
Miðvikudaginn 30. október kl. 19:00 og 20:00

Aðgangur að öllum tónleikunum er ókeypis og eru allir velkomnir.

14. október 2013

Vetrarfrí

Vakin er athygli á því að vetrarfrí verður í Tónlistarskólanum mánudaginn 21. og þriðjudaginn 22. október næstkomandi.

14. október 2013

Kynningarfundur fyrir foreldra píanónemenda

Kynningarfundur fyrir foreldra píanónemenda á 1. og 2. námsári verður haldinn í kjallarasal Safnaðarheimilis Kópavogskirkju við Hábraut fimmtudaginn 17. október nk. kl. 19:30-20:30. Farið verður yfir skipulag námsins og ýmis hagnýt atriði við upphaf píanónáms. Foreldrar eru hvattir til að mæta. Kaffi á könnunni.

13. október 2013

Skólatónleikar í Salnum

Fyrstu skólatónleikar á þessu skólaári verða haldnir í Salnum mánudaginn 14. október kl. 20:00. Aðgangur að tónleikunum er ókeypis og allir velkomnir.

10. september 2013

Upphaf kennslu í forskóladeild

Kennsla í forskóladeild hefst samkvæmt stundaskrá mánudaginn 16. september nk. Haft verður samband við nemendur og þeir boðaðir í fyrsta tímann.

10. september 2013

Fyrstu tímar í tónfræðagreinum

Kennsla í tónfræðagreinum í grunn- og miðnámi hefst samkvæmt stundaskrá mánudaginn 16. september nk. og munu hljóðfærakennarar láta nemendur vita hvenær þeir eiga að mæta í tónfræðatíma. Nánari upplýsingar má einnig fá á skrifstofu skólans.

Kennsla í tónlistarsögu hófst í dag, þriðjudaginn 10. september kl. 17:00. Kennari er Ríkharður H. Friðriksson. Kennsla í hljómfræði og tónheyrn hefst á morgun, miðvikudaginn 11. september. Arnþór Jónsson kennir tónheyrn í vetur og Atli Ingólfsson kennir hljómfræði. Nánari upplýsingar um kennslutíma í þessum tveimur greinum eru veittar á skrifstofu skólans.

14. ágúst 2013

Skólasetning

Tónlistarskóli Kópavogs verður settur í Salnum miðvikudaginn 21. ágúst kl. 17:00. Kennsla hefst föstudaginn 23. ágúst og munu kennarar boða nemendur til kennslu. Athygli skal vakin á því að kennsla verður óregluleg fyrstu dagana meðan gengið er frá stundaskrá skólans.

Nemendur eru beðnir um að skila stundaskrám sínum úr grunnskólum eða framhaldsskólum á skrifstofu skólans hið fyrsta.

15. júní 2013

Sumarleyfi

Skrifstofa Tónlistarskóla Kópavogs verður lokuð frá 18. júní nk. vegna sumarleyfa. Opnað verður aftur mánudaginn 12. ágúst 2013.

15. júní 2013

Frá skólaslitum 2013

Tónlistarskóla Kópavogs var slitið mánudaginn 3. júní sl. og lauk þar með 50. starfsári skólans. Að þessu sinni luku þrír nemendur framhaldsprófi í hljóðfæraleik, þau Elín Arna Aspelund, söngvari, Kristín Hulda Kristófersdóttir, þverflautuleikari og Stefán Ólafur Ólafsson, klarínettuleikari. Þá lauk Kristín Lárusdóttir framhaldsprófi í raftónlist og er hún jafnframt fyrsti nemandinn sem lýkur framhaldsprófi í þeirri grein á landinu. Á myndinni má sjá útskriftarnemana (f.v.) Stefán, Kristínu Huldu, Elínu Örnu og Kristínu. Sólveig Magnúsdóttir, þverflautuleikari, lauk hljóðfærahluta framhaldsprófs og þeir Bergþór Olivert Thorsensen, Bjarki Sigurjónsson og Hilmar Bjarnason luku tónsmíða- og tónleikahluta framhaldsprófs í raftónlist.

Eftirtaldir nemendur fengu viðurkenningar fyrir framúrskarandi árangur á áfangaprófum:

Hæstu grunnpróf í hljóðfæraleik og einsöng:

Eva Marín Steingrímsdóttir, píanó
Steinunn Björg Böðvarsdóttir, fiðla
Birta Hlíðkvist Óskarsdóttir, píanó
Ólöf Ágústa Stefánsdóttir, klarínetta
Sólveig Rún Rúnarsdóttir, píanó
Anna Margrét Sverrisdóttir, þverflauta
Vigdís Gunnarsdóttir, fiðla
Baltasar Darri Samper, píanó
Sigrún Gyða Sveinsdóttir, einsöngur
Snædís Lilja Káradóttir, þverflauta
Viktor Jónssn, píanó
Ásta Fanney Söebech, píanó
Erna Diljá Daníelsdóttir, þverflauta
Heiðrún Ösp Hauksdóttir, einsöngur
Róbert Aron Björnsson, saxófónn

Hæstu miðpróf í hljóðfæraleik:

Jóhann Gísli Ólafsson, semball
Elísabet Ósk Bragadóttir, píanó
Ólöf Ragnarsdóttir, þverflauta
Svanhildur Tekla Bryngeirsdóttir, trompet
Hafsteinn Rúnar Jónsson, píanó
Runólfur Bjarki Arnarson, þverflauta
Hinrik Helgason, gítar
Konný Björg Jónasdóttir, píanó

Tónfræði - miðpróf

Fannar Ingi Fjölnisson
Ingibjörg Ragnheiður Linnet
Herdís Ágústa Linnet
Íris Andrésdóttir
Eydís Oddsdóttir Stenersen
Helga Mikaelsdóttir
Hrafnhildur Magnea Ingólfsdóttir
Elísabet Ósk Bragadóttir

Tónfræði - grunnpróf

Birta Hlíðkvist Óskarsdóttir
Kolbrún Björk Ólafsdóttir

29. maí 2013

Skólaslit mánudaginn 3. júní

Skólaslit og afhending einkunna verða mánudaginn 3. júní nk. og hefst athöfnin í Salnum kl. 17:00.

28. maí 2013

Framhaldsprófstónleikar tónversnemenda í Salnum

Á morgun, miðvikudag 29. maí og fimmtudaginn 30. maí, munu nemendur Tónvers, sem eru að ljúka námi sínu, halda framhaldsprófstónleika í Salnum. Tónleikarnir hefjast kl. 20.00 báða dagana. Þetta er í fyrsta sinn sem nemendur Tónversins ljúka framhaldsnámi sínu með tónleikum.

Á tónleikunum á miðvikudaginn verða flutt rafverk eftir Hilmar Bjarnason og Kristínu Lárusdóttur en á fimmtudag verða tónleikar með verkum eftir Bergþór Olivert Thorstensen og Bjarka Sigurjónsson á dagskrá.

Aðgangur að tónleikunum er ókeypis og eru allir velkomnir.

28. maí 2013

Sellótónleikar í Safnaðarheimilinu

Á morgun, miðvikudaginn 29. maí kl. 18:30 mun Heiður Lára Bjarnadóttir, sellónemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru verk eftir J.S. Bach, J. Haydn og A. Piazolla. Meðleikarar hennar eru Helga Bryndís Magnúsdóttir, píanóleikari, Ester Petra Gunnarsdóttir, fiðluleikari og Lilja María Ásmundsdóttir, píanóleikari. Aðgangur að tónleikunum, sem eru um 30 mínútna langir, er ókeypis og eru allir velkomnir.

28. maí 2013

Sellótónleikar í Safnaðarheimilinu

Miðvikudaginn 29. maí kl. 17:45 mun Sóley María Nótt Hafþórsdóttir, sellónemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru verk eftir J.S. Bach, Squire, Saint-Saëns og Eccles. Aðgangur að tónleikunum, sem eru um 30 mínútna langir, er ókeypis og allir eru velkomnir.

28. maí 2013

Saxófóntónleikar í Safnaðarheimilinu

Miðvikudaginn 29. maí kl. 17:00 mun Gunnlaugur Helgi Stefánsson, saxófónnemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Meðleikari á píanó er Helga Bryndís Magnúsdóttir. Aðgangur að tónleikunum, sem eru um 40 mínútna langir, er ókeypis og allir eru velkomnir.

28. maí 2013

Sellótónleikar í Safnaðarheimilinu

Miðvikudaginn 29. maí kl. 16:15 mun Brynhildur Þóra Þórsdóttir, sellónemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru verk eftir J.S. Bach, Gounod, Schumann og Eccles. Meðleikari á píanó er Helga Bryndís Magnúsdóttir. Aðgangur að tónleikunum, sem eru um 30 mínútna langir, er ókeypis og allir eru velkomnir.

25. maí 2013

Framhaldsprófstónleikar Sólveigar Magnúsdóttur í Salnum

Þriðjudaginn 28. maí nk. heldur Sólveig Magnúsdóttir, þverflautuleikari, framhaldsprófstónleika sína frá Tónlistarskóla Kópavogs. Tónleikarnir verða í Salnum, Tónlistarhúsi Kópavogs og hefjast kl. 20.00. Flutt verða verk eftir eftir Jean-Marie Leclair, Jules Mouquet, Georges Bizet, og Franz Schubert. Meðleikarar á tónleikunum eru Ingunn Hildur Hauksdóttir, píanóleikari og Helga Bryndís Magnúsdóttir, sem leikur á sembal. Aðgangur að tónleikunum er ókeypis og eru allir velkomnir.

25. maí 2013

Píanómaraþon á þriðjudag

Þriðjudaginn 28. maí fer fram árlegt píanómaraþon Tónlistarskóla Kópavogs. Að þessu sinni fer maraþonið fram í kjallarasal Safnaðarheimilis Kópavogskirkju við Hábraut. Píanóleikurinn hefst kl. 13:00 og er áætlað að spila til kl. 19:00. Áheyrendur eru velkomnir meðan húsrúm leyfir.

25. maí 2013

Píanótónleikar Kristínar Nönnu á mánudagskvöld

Kristín Nanna Einarsdóttir, píanóleikari í framhaldsnámi, flytur verk eftir J.S. Bach, J.F. Burgmüller, F. Chopin og E. Grieg á tónleikum mánudaginn 27. maí nk. Tónleikarnir, sem verða haldnir í kjallarasal Safnaðarheimilis Kópavogskirkju við Hábraut, hefjast kl. 19:30. Aðgangur að tónleikunum, sem eru um 30 mínútna langir, er ókeypis og allir eru velkomnir.

25. maí 2013

Píanótónleikar í Safnaðarheimilinu

Mánudaginn 27. maí kl. 18.00 mun Lilja Brandsdóttir, píanónemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskrá tónleikanna eru verk eftir F. Chopin, J. Haydn. E. Granados og D. Shostakovich. Meðleikari Lilju í einu verka á tónleikunum er Þórdís Ylfa Viðarsdóttir, fiðluleikari. Aðgangur er ókeypis og eru allir velkomnir.

25. maí 2013

Píanótónleikar Júlíusar Geirs Sveinssonar

Mánudaginn 27. maí kl. 17.00 mun Júlíus Geir Sveinsson, píanónemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru verk eftir G.F. Händel, F. Chopin, Sigvalda Kaldalóns og L.v. Beethoven. Aðgangur að tónleikunum, sem eru um 30 mínútna langir, er ókeypis og allir eru velkomnir.

25. maí 2013

Þrennir skólatónleikar á mánudag

Þrennir skólatónleikar verða haldnir í Salnum mánudaginn 27. maí og eru þetta jafnframt síðustu almennu tónleikarnir á þessu skólaári. Fyrstu tónleikarnir hefjast kl. 18:00, þeir næstu kl. 19:00 og síðustu tónleikarnir kl. 20:00. Á öllum tónleikunum leika nemendur á ýmsum aldri fjölbreytta tónlist. Aðgangur að tónleikunum er ókeypis og eru allir velkomnir.

23. mars 2011

Framhaldsprófstónleikar Kristínar Huldu Kristófersdóttur í Salnum

Fimmtudaginn 23. maí nk. heldur Kristín Hulda Kristófersdóttir, þverflautuleikari, framhaldsprófstónleika sína frá Tónlistarskóla Kópavogs sem jafnframt eru lokahluti framhaldsprófs hennar við skólann. Tónleikarnir verða í Salnum, Tónlistarhúsi Kópavogs og hefjast kl. 20.00. Flutt verða verk eftir J.S. Bach, E. Varése, B. Martinu, og G. Fauré. Meðleikari á tónleikunum er Ingunn Hildur Hauksdóttir, píanóleikari. Aðgangur að tónleikunum er ókeypis og eru allir velkomnir.

14. maí 2013

Vortónleikar Tónversnemenda

Árlegir vortónleikarnir Tónvers Tónlistarskóla Kópavogs verða haldnir í Salnum miðvikudaginn 15. maí kl. 20:00. Frumflutt verða verk nemenda Tónversins og er óhætt að lofa fjölbreyttum og skemmtilegum tónlistarviðburði. Aðgangur að tónleikunum er ókeypis og allir velkomnir.

13. maí 2013

Skólatónleikar í Salnum í dag og á morgun

Tvennir skólatónleikar verða haldnir í dag, mánudaginn 13. maí. Á fyrri tónleikunum, sem hefjast kl. 18:15, leikur fiðlusveit byrjenda og strengjasveitir II og III. Seinni tónleikarnir hefjast kl. 19:30 og þar leika nemendur á ýmsum námsstigum fjölbreytta tónlist. Á morgun, þriðjudaginn 14. maí, verða tónleikar kl. 18:00 og 19:00. Efnisskrá er fjölbreytt og allir eru velkomnir.

5. maí 2013

Tvennir skólatónleikar í Salnum

Í vikunni verða tvennir skólatónleikar haldnir í Salnum. Fyrri tónleikarnir verða á morgun, mánudaginn 6. maí kl. 19:30. Seinni tónleikarnir verða þriðjudaginn 7. maí kl. 18:00. Á tónleikunum koma fram nemendur á ýmsum námsstigum. Aðgangur að tónleikunum er ókeypis og allir velkomnir.

2. maí 2013

Vortónleikar forskóla

Laugardaginn 4. maí verða vortónleikar forskóladeildar haldnir í Salnum. Tónleikarnir eru tvískiptir og hvorir tónleikar eru rúmlega 30 mínútna langir. Fyrri tónleikarnir hefjast kl. 10 en síðari tónleikarnir kl. 11:15. Allir eru velkomnir á tónleikana á meðan húsrúm leyfir.

28. apríl 2013

Skólatónleikar í Salnum á mánudag og þriðjudag

Skólatónleikar verða haldnir í Salnum mánudaginn 29. apríl kl. 19:30 og þriðjudaginn 30. apríl kl. 18:00. Aðgangur að tónleikunum er ókeypis og allir velkomnir.

21. apríl 2013

Fiðlutónleikar í Safnaðarheimilinu

Þriðjudaginn 23. apríl kl. 18:15 mun Sæunn Ragnarsdóttir, fiðlunemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru verk eftir César Franck, Johann Sebastian Bach og Wolfgang Amadeus Mozart. Meðleikari Sæunnar á tónleikunum er Helga Bryndís Magnúsdóttir, píanóleikari. Aðgangur að tónleikunum, sem eru um 30 mínútna langir, er ókeypis og allir eru velkomnir.

21. apríl 2013

Fiðlutónleikar í Safnaðarheimilinu

Þriðjudaginn 23. apríl kl. 17.30 mun Sigurrós Halldórsdóttir, fiðlunemandi í framhaldsnámi, halda tónleika í kjallarasal Safnaðarheimilis Kópavogskirkju við Hábraut. Á efnisskránni eru verk eftir H. Henryk Wieniawski, Johann Sebastian Bach, Pietro Mascagni og Wolfgang Amadeus Mozart. Píanóleikari á tónleikunum er Helga Bryndís Magnúsdóttir. Aðgangur að tónleikunum, sem eru um 30 mínútna langir, er ókeypis og allir eru velkomnir.

21. apríl 2013

Tvennir skólatónleikar í vikunni

Skólatónleikar verða haldnir í Salnum mánudaginn 22. apríl og hefjast þeir kl. 20:00. Á tónleikunum leikur strengjasveit, skipuð elstru strengjasveitarnemendum skólans, Brandenborgarkonsert eftir Johann Sebasteian Bach og Divertimento eftir Wolfgang Amadeus Mozart. Stjórnandi sveitarinnar er Helga Ragnheiður Óskarsdóttir. Seinni skólatónleikarnir verða í Salnum þriðjudaginn 23. apríl kl. 18:00. Á þeim tónleikum koma fram nemendur á ýmsum námsstigum og er efnisskráin fjölbreytt. Aðgangur að tónleikunum er ókeypis og allir velkomnir..

16. apríl 2013

Skólatónleikar í dag og á morgun

Skólatónleikar verða haldnir í Salnum í dag, þriðjudaginn 16. apríl kl. 18:00, og á morgun, miðvikudaginn 17. apríl kl. 18.00. Aðgangur að tónleikunum er ókeypis og eru allir velkomnir.

10. apríl 2013

Viðurkenningar á svæðishátíð NÓTUNNAR og lokatónleikar í Hörpu 14. apríl

Laugardaginn 16. mars var haldin á Selfossi svæðishátíð Nótunnar, uppskeruhátíðar tónlistarskóla, þar sem skólar í Kraganum, Suðurnesjum og Suðurlandi tóku þátt. Þar komu nemendur skólanna fram og kepptu um viðurkenningar sem veittar voru fyrir framúrskarandi atriði að mati dómnefndar. Þátttakendur frá Tónlistarskóla Kópavogs voru þær Ingibjörg Ragnheiður Linnet, Herdís Ágústa Linnet og Nína Guðrún Arnardóttir sem léku sexhent á píanó, Kristín Hulda Kristófersdóttir sem lék einleik á flautu og Lilja Brandsdóttir sem lék einleik á píanó. Þær stóðu sig með miklum ágætum og uppskáru allar viðurkenningar í sínum þátttökuflokkum. Samleikur þeirra Ingibjargar, Herdísar og Nínu var síðan eitt af þeim atriðum sem valin voru til að koma fram á lokahátíð í Hörpu sunnudaginn 14. apríl. Munu þær leika á fyrri tónleikunum sem hefjast kl. 11:30.

Á myndinni eru þátttakendur okkar með verðlaunagripi sína. Við óskum þeim til hamingju með frammistöðuna!

10. apríl 2013

Skólatónleikar í Salnum á fimmtudag

Skólatónleikar verða haldnir í Salnum fimmtudaginn 11. apríl kl. 18:00. Efnisskráin er fjölbreytt og fram koma nemendur á ýmsum aldri. Aðgangur að tónleikunum er ókeypis og allir velkomnir.

1. apríl 2013

Kennsla að loknu páskaleyfi

Kennsla að loknu páskaleyfi hefst samkvæmt stundaskrá þriðjudaginn 2. apríl.

18. mars 2013

Söngdeild flytur óperuna Venus og Adónis

Söngdeild Tónlistarskóla Kópavogs mun flytja óperuna Venus og Adónis eftir enska tónskáldið John Blow í Salnum, þriðjudaginn 19. mars og miðvikudaginn 20. mars kl. 20.00. Flytjendur í aðalhlutverkum eru nemendur söngdeildar skólans, en einnig taka þátt í sýningunni dansarar frá Balletskóla Sigríðar Ármann. Hljóðfæraleikur í sýningunni er í höndum nemenda og kennara skólans. Leikstjóri sýningarinnar er Anna Júlíana Sveinsdóttir söngkennari. Í aðalhlutverkum eru Bryndís Guðjónsdóttir, Tinna Jóhanna Magnusson og Kristófer Kvaran. Aðgangur er ókeypis á meðan húsrúm leyfir.

10. mars 2013

Tónlistarveisla í Salnum á laugardaginn

Laugardaginn 16. mars verður sannkölluð tónlistarhátíð í Salnum, þegar kennarar Tónlistarskóla Kópavogs standa fyrir tvennum tónleikum í TKTK röðinni.

Kl. 13:00 flytja Guido Bäumer, saxófóneikari, og Aladár Rácz, píanóleikari, franska saxófóntónlist eftir Debussy, Sancan, Caplet, Jolivet, Schmitt og Desenclos.

Kl. 15.00 flytur Eva Þyri Hilmarsdóttir, píanóleikari, píanótónlist frá ýmsum tímum. Á efnisskránni eru verk eftir Scarlatti, Beethoven og Ginastera.

Kl. 14.00-15.00 munu nemendur Tónlistarskóla Kópavogs gleðja tónleikagesti með fjölbreyttum tónlistarflutningi í anddyri Salarins.

[ Meira um tónleika Guido og Aladár ]

[ Meira um tónleika Evu Þyríar ]

10. mars 2013

Skólatónleikar á miðvikudag og fimmtudag

Skólatónleikar verða haldnir í Salnum miðvikudaginn 13. mars kl. 18:00 og fimmtudaginn 14. mars kl. 18:00. Efnisskrá beggja tónleikanna er fjölbreytt og allir eru velkomnir.

6. mars 2013

Kennsla og tónleikar falla niður í dag

Vegna veðurs fellur öll kennsla niður í skólanum í dag. Sömuleiðis er tónleikunum sem vera áttu í Salnum kl. 18 frestað.

3. mars 2013

Skólatónleikar í Salnum á miðvikudag

Skólatónleikar verða haldnir í Salnum miðvikudaginn 6. mars kl. 18:00. Efnisskrá er fjölbreytt og allir eru velkomnir.

3. mars 2013

Skólatónleikar Nótunnar á þriðjudag

Skólatónleikar verða haldnir í Salnum þriðjudaginn 5. mars nk. kl. 18:00. Á tónleikunum koma fram nemendur sem valdir hafa verið til þátttöku í skólatónleikum Nótunnar, uppskeruhátíðar tónlistarskólanna 2013. Eftir tónleikana verða síðan valin atriði af tónleikaefnisskránni til þátttöku í svæðishátíð Nótunnar sem fram fer á Selfossi laugardaginn 16. mars. Aðgangur að tónleikunum er ókeypis og eru allir velkomnir.

25. febrúar 2013

Hljóðfærakynning fyrir forskólanemendur

Hljóðfærakynning fyrir nemendur sem ljúka forskólanámi í vor og aðstandendur þeirra fer fram í Salnum þriðjudaginn 26. febrúar kl. 17.15. Í tali, tónum og myndum verða kynnt þau hljóðfæri sem kennt er á í skólanum. Forráðamenn eru hvattir til að fjölmenna með börnum sínum.

18. febrúar 2013

Vetrarfrí

Vakin er athygli á því að vetrarfrí verður í Tónlistarskólanum föstudaginn 22. og mánudaginn 25. febrúar næstkomandi.

18. febrúar 2013

Músikfundur píanónemenda í Safnaðarheimilinu

Músikfundur píanónemenda í grunn-, mið- og framhaldsnámi verður haldinn í kjallarasal Safnaðarheimilis Kópavogskirkju miðvikudaginn 20. febrúar kl. 18:30. Allir eru velkomnir meðan húsrúm leyfir.

18. febrúar 2013

Skólatónleikar í Salnum

Skólatónleikar verða haldnir í Salnum miðvikudaginn 20. febrúar, kl. 18:00. Aðgangur að tónleikunum er ókeypis og allir velkomnir.

10. febrúar 2013

Söngtónleikar í safnaðarheimilinu

Tónleikar söngdeildar verða haldnir í kjallarasal safnaðarheimilisins Kópavogskirkju miðvikudaginn 13. febrúar kl. 20:00. Flutt verða sönglög eftir John Dowland við gítarundirleik Hannesar Þ. Guðrúnarsonar. Aðgangur er ókeypis og allir velkomnir.

10. febrúar 2013

Tvennir skólatónleikar í Salnum í vikunni

Tvennir skólatónleikar verða haldnir í Salnum í vikunni. Fyrri tónleikarnir verða þriðjudaginn 12. febrúar kl. 18:00 en þeir síðari miðvikudaginn 13. febrúar kl. 18:00. Aðgangur að tónleikunum er ókeypis og eru allir velkomnir.

5. febrúar 2013

Lokað vegna útfarar Þorkels Sigurbjörnssonar

Útför Þorkels Sigurbjörnssonar, tónskálds, verður gerð frá Hallgrímskirkju föstudaginn 8. febrúar kl. 13:00. Þorkell átti sæti í stjórn Tónlistarskóla Kópavogs frá árinu 2001 til dauðadags. Við minnumst hans með þakklæti og virðingu.

Skólinn verður lokaður frá kl. 12:00 á hádegi útfarardaginn og fellur öll kennsla niður.