Námsgreinar í tölvutónlist
Í Tónlistarskóla Kópavogs er boðið upp á nám í
tölvutónlist við tónver skólans. Tónverið er elsta
starfandi tónver landsins og þar er mjög fullkomin aðstaða
til að fást við tónlist og hljóð.
Kennslan skiptist í:
- verklega tíma, þar sem kennd er meðferð tækja og
hugbúnaðar til hljóðhönnunar, upptökutækni og
tónsköpunar
- bóklega tíma, þar sem farið er yfir helstu atriði
hljóðfræði og þróun raf- og tölvutónlistar
- tónfræðatíma, þ.e. tónheyrn, hljómfræði og
tónlistarsögu auk valgreinar.
Markmið með náminu er að þjálfa nemendur í að nota
tölvu sem aðalhljóðfæri og leggja öflugan grunn að námi á
háskólastigi og starfi þeirra sem
"raftónlistar-menn". Námið er á framhaldsstigi
samkvæmt aðalnámskrá tónlistarskóla og er námslengd
áætluð þrjú ár. Í einstaka tilvikum kann að vera unnt að
ljúka náminu á skemmri tíma en einnig getur lengri námstími
verið eðlilegur. Ekki er gert upp á milli tónlistarstefna,
heldur er nemendum gert kleift að fara sínar eigin leiðir í
þeim efnum.
Inntökuskilyrði og námskröfur
Inntökuskilyrði í raftónlistarnám eru eftirfarandi: a)
hafi lokið miðprófi í tónfræðagreinum og/eða b) hafi
færni í notkun tölvu tengdri tónlistariðkun. Sé þekkingu í
tónfræðagreinum ábótavant þurfa nemendur að sækja
sérstaka tíma í tónfræðagreinum samhliða aðalnámi og
skulu þeir ljúka miðprófi í tónfræðagreinum innan tveggja
ára.
Við námslok þurfa nemendur að ljúka öllum námsáföngum
sem tilheyra raftónlistarnáminu, ljúka almennu framhaldsprófi
í tónfræðagreinum og að hafa lokið klassísku eða rytmísku
grunnprófi í hljóðfæraleik eða söng samkvæmt
aðalnámskrá tónlistarskóla.
Námi í raftónlist lýkur með 30-60 mínútna löngum
framhaldsprófstónleikum sem metnir eru af Prófanefnd
tónlistarskóla
Námsáfangar
Við lok náms í tölvutónlist þurfa nemendur, auk þess að
ljúka framhaldsprófi í tónfræðagreinum, að hafa lokið
eftirfarandi áföngum:
Hljóðfræði I
Kenndir eru grunnþættir í hljóðeðlisfræði, þ.e.
eiginleikar hljóðbylgja og hvernig þær berast til eyrans,
virkni og uppbygging hljóðnema og hátalara, stafræn og
hliðræn (analog) tækni, hlutverk og eðli rýmis,
styrkmælingar (dB), tíðnisvið (Hz) o.fl.
Kennslufyrirkomulag er fyrirlestrar með verkefnum. Áfanginn
er kenndur að hausti og lýkur með prófi sem gildir til
helminga við ástundun.
Hljóðfræði II
Farið verður í fleiri þætti í hljóðeðlisfræði, auk
þess sem gengið verður um stigu áhugaverðra
hljóðgerðaraðferða.
Kennslufyrirkomulag er fyrirlestrar með verkefnum. Áfanginn
er kenndur að hausti og lýkur með prófi sem gildir til
helminga við ástundun.
Upptökutækni I
Notkun og gerðir hljóðnema, ferli hljóðsins frá
hljóðvaka til upptökumiðils, notkun hljóðmótunartækja,
s.s. hljóðbreyta (EQ), hljóðþjappa (compressor/limiter) og
rýmisvaka (Reverb/Delay), notkun upptökutækja og -forrita
(DAW), val og staðsetning hljóðnema, notkun rýmis, almenn
vinnubrögð o.fl. Í lok annar hljóðrita nemendur tónleika
framhaldsprófsnemenda við tónlistarskólann eða aðra
nemendatónleika.
Kennslufyrirkomulag er fyrirlestrar og verkefni. Áfanginn er
kenndur að vori og lýkur með stuttu prófi og hljóðritun á
tónleikum nemenda sem fyrr segir.
Upptökutækni II
Farið verður í verklegar hliðar upptökutækninar og meira
lagt upp úr lokavinnslu og frágangi.
Kennslufyrirkomulag er fyrirlestrar og verkefni. Áfanginn er
kenndur að vori og lýkur með stuttu prófi og hljóðritun og
hljóðblöndun.
Hljóðgerð I
Farið er yfir undirstöðuþætti og helstu aðferðir
hljóðgerðar. Stuðst er að mestu við hljóð- og
tónsmíðaforritið Reason. Meðal annars eru teknar fyrir
hljóðgerðaraðferðir á borð við Subtractive Synthesis og FM
synthesis. Tegundir hljóðsía (filtera) svo sem Low Pass, High
Pass og grunntegundir hljóðbylgja; sínus, kassa, sagartannar og
þríhyrnings.
Útskýrður er tilgangur sveifluvaka (oscillator) og
hjúpmyndara (envelope generator) svo eitthvað sé nefnt. Kennt
verður að búa til hljóð sem herma eftir raunverulegum
hljóðfærum s.s. bassa, klarínettu, orgeli og mannsrödd, auk
þess að gera tilraunir til nýsköpunar í hljóðgerð. Farið
verður yfir víðómun (steríómynd) hljóða og gerðar
æfingar því til þjálfunarskyni.
Kennslufyrirkomulag er fyrirlestrar og verkefni. Námið tekur
eina önn og lýkur með prófi sem gildir þriðjung á móti
verkefnaskilum og mætingu sem gilda einnig þriðjung hvort.
Hljóðgerð II
Haldið er áfram að kynna undirstöðuþætti og helstu
aðferðir hljóðgerðar. Stuðst er að mestu við hljóð- og
tónsmíðaforritið Ableton Live. Meðal þess sem tekið er
fyrir eru hljóðgerðaraðferðir á borð við, Additive
synthesis og Sampling tækni. Einnig verða könnuð svið
hljóðeffektaheimsins og gerðar tilraunir með ólíkar leiðir
í þeim efnum. Kennt verður að búa til mismunandi hljóð
unnin úr mannsrödd og öðru hljóðefni sem tengist umhverfi
okkar. Farið verður yfir umhverfisómun (surround).
Kennslufyrirkomulag er fyrirlestrar og verkefni. Námið tekur
eina önn og lýkur með prófi sem gildir þriðjung á móti
verkefnaskilum og mætingu sem gilda einnig þriðjung hvort.
Hljóðgerð III - IV
Kennt er á tónlistarforritið Max/MSP og tengingu þess við
Ableton Live.
Nótnaritun I
Farið er yfir helstu þætti nótnaritunar og kennt að skrifa
slagverksraddir og fjórradda útsetningu eftir fyrirmynd.
Kennslufyrirkomulag er fyrirlestrar og verkefnaskil. Námið tekur
eina önn og lýkur með verkefni sem gildir þriðjung á móti
öðrum verkefnaskilum og mætingu sem gilda einnig þriðjung
hvort.
Nótnaritun II
Farið er yfir helstu þætti nótnaritunar er lítur að
skrifum fyrir minni hljóðfærahópa og gerðar æfingar með að
skrifa raddskrár eftir fyrirmynd. Einnig verður farið í að
setja upp eigin lagasmíðar.
Kennslufyrirkomulag er fyrirlestrar og verkefnaskil. Námið er
ein önn og lýkur með verkefni sem gildir þriðjung á móti
öðrum verkefnaskilum og mætingu sem gilda einnig þriðjung
hvort.
Raftónsmíðar I - II
Námið byggist á eigin tónsmíðum nemanda og er mið tekið
af áherslum og tónmáli hvers og eins. Einnig er farið yfir
helstu grunnatriði tónsmíða s.s. hryn, laglínu, úrvinnslu,
formgerð og tónsmíðaaðferðir.
Kennt er í hóptímum og áhersla lögð á að nemandi
öðlist þroska, viðsýni og reynslu til að tjá sig um eigin
tónsmíðar við samnemendur. Námið er tvær annir og lýkur
hvorri önn með flutningi tónverks á jóla- og vortónleikum
tónversins.
Raftónsmíðar III - IV
Námið byggist á eigin tónsmíðum nemanda og er mið tekið
af áherslum og tónmáli hvers og eins.
Kennt er í einkatímum. Námið er tvær annir og lýkur
hvorri önn með flutningi tónverks á jóla- og vortónleikum
tónversins.
Raftónsmíðar V - VI
Námið byggist á eigin tónsmíðum nemanda og er mið tekið
af áherslum og tónmáli hvers og eins.
Kennt er í einkatímum. Námið er tvær annir og lýkur með
framhaldsprófstónleikum þar sem nemandi setur saman efnisskrá
með eigin tónsmíðum.
Raftónlistarsaga I - II
Rakin verður saga raf- og tölvutónlistar þar sem kynntar
verða helstu stefnur og straumar á því sviði og helstu
tónskáld og tónverk sem þar koma við sögu. Námið tekur
einn vetur.
Kennslufyrirkomulag er fyrirlestrar með tóndæmum. Tekin
verða próf við lok hvorrar annar og gilda þær einkunnir
þriðjung af lokaeinkunn á móti mætingu og verkefnavinnu.
Raftónlistarsaga er kennd á fyrsta ári í tónversnáminu.
Kópavogi, í ágúst 2011
|
