Húsnæði og
kennsluaðstaða
Tónlistarskóli Kópavogs býr við fyrirtaks aðbúnað til
kennslu og tónlistarflutnings. Sérstaða skólans felst í því
að hann deilir húsi með Salnum, þar sem fram fer reglulegt
tónleikahald atvinnufólks við aðstæður sem eru eins og best
verður á kosið.
Skólinn er hluti af Menningarmiðstöð Kópavogs sem er um
3000 fermetra sérhönnuð bygging á þremur hæðum og staðsett
í Borgarholtinu við hlið Listasafns Kópavogs.
Menningarmiðstöðin er annarsvegar safnahús og hýsir
Náttúrfræðistofu Kópavogs og Bókasafn Kópavogs. Hins vegar
er hún tónlistarhús og hýsir Tónlistarskóla Kópavogs og
Salinn, 300 manna sérhannaðan sal fyrir tónlistarflutning.
Húsnæði Tónlistarskólans er á 2. og 3. hæð
Tónlistarhússins, samtals 710 fermetrar að stærð.
Kennslustofur eru 20 talsins, mismunandi að stærð í samræmi
við breytilegar þarfir. Stofur til almennrar hljóðfærakennslu
eru að stærðinni 11-25 fermetrar. Þá eru tvær 39 fermetra
tónfræðakennslustofur, 46 fermetra samspilsstofa og 53 fermetra
forskólastofa, auk 18 fermetra tónvers skólans sem er búið
fullkomnum tækjum til tölvu- og hljóðvinnslu. Auk þessa eru
hljóðfæra- og nótnageymsla, vinnustofa kennara, kaffistofa og
skrifstofurými. Kennslustofur eru allar hannaðar með
tilliti til hljómburðar. Þá er hljóðeinangrun mjög góð á
milli stofa og innréttingum haganlega fyrir komið með tilliti
til kennslunnar.
Salurinn, þar sem tónleikar skólans fara fram, er á 1. og
hluta af 2. hæð hússins. Tréverk á veggjum Salarins er
smíðað úr greni, sprottnu úr Skorradal og gólfefni er unnið
að hluta til úr klöppinni, sem Tónlistarhúsið stendur á.
Húsið er klætt utan með sérstaklega meðhöndluðum
steinflísum, koparplötum og rekaviðardrumbum frá
Melrakkasléttu. Arkitektar hússins eru Jakob E. Líndal og
Kristján Ásgeirsson hjá ALARK. Um hljómburðarhönnun sá
Stefán Guðjohnsen hjá Hljóðvist ehf.
Útibú í Fagraþingi
Frá haustinu 2016 hefur Tónlistarskólinn starfrækt útibú
í húsnæði Fríkirkjunnar Kefas, Fagraþingi 2a í
Vatnsendahverfi. Þar eru þrjú kennslurými og er aðstaðan
sérstaklega ætluð fyrir nemendur í austustu byggðum
Kópavogs. Í Kefas fer fram bæði forskólakennsla,
hljóðfærakennsla og tónfræðakennsla.
|
