Skipulagsskrá fyrir sjálfseignarstofnunina Tónlistarskóla Kópavogs

I. Nafn og markmið

1. gr.

Tónlistarfélag Kópavogs stofnar hér með sjálfseignarstofnun sem heitir Tónlistarskóli Kópavogs. Heimili skólans er í Kópavogi.

2. gr.

Tilgangur stofnunarinnar er rekstur tónlistarskóla sem starfar í Kópavogi.

3. gr.

Stofnfé Tónlistarskóla Kópavogs er kr. 120.666.603. Stofnféð greiðist með hljóðfærum, áhöldum og tækjum að bókfærðu verði kr. 5.308.492 og 27,38% eignarhluta í Tónlistarhúsi Kópavogs, sem greitt hefur verið fyrir með kr. 115.286.111, þar af með skuldabréfi kr. 100.000.000.

Stofnfé skólans skal aldrei verða minna að raungildi en kr. 600.000.

II. Stjórn og fjármál skólans

4. gr.

Stjórn Tónlistarskóla Kópavogs skal skipuð fimm mönnum. Fyrstu stjórn skipa þrír menn tilnefndir af núverandi stjórn Tónlistarfélags Kópavogs og tveir kjörnir af bæjarstjórn Kópavogs, til fjögurra ára í senn, að afloknum svetarstjórnarkosningum. Þegar stjórnarmaður, sem ekki er kjörinn af bæjarstjórn Kópavogs, hverfur úr stjórninni skulu stjórnarmenn sammælast um mann í stjórnina í hans stað. Stjórnin skiptir með sér verkum. Stjórnarmenn skulu eiga lögheimili í Kópavogi.

Stjórnin ræður skólastjóra að skólanum, samþykkir fjárhags- og starfsáætlun skólans, fylgir henni fram og ber ábyrgð á að starfsemin sé í samræmi við lög og reglur um starfsemi tónlistarskóla. Nánar skal kveðið um störf stjórnarinnar, þeirra sem fyrir hana starfa og störf nemenda í skólareglum sem stjórnin setur.

5. gr.

Skólastjóri ræður kennara og aðra starfsmenn skólans. Um laun kennara fer eftir kjarasamningum sem launanefnd sveitarfélaga gerir við stéttarfélög þeirra á hverjum tíma. Laun annarra starfsmanna ákvarðast með hliðsjón af kjarasamningum viðkomandi stéttarfélaga.

6. gr.

Tónlistarskóli Kópavogs er alhliða tónlistarskóli sem starfar í samræmi við ákvæði 1. gr. laga um fjárhagslegan stuðning við tónlistarskóla, nr. 75/1985. Um nám og prófgráður fer eftir aðalnámskrá tónlistarskóla, útgefinni af menntamálaráðuneitinu.
Stjórn Tónlistarskóla Kópavogs getur stofnað til háskólanáms á sviði tónlistar á eigin vegum og/eða í samvinnu við aðrar menntastofnanir á sviði tónlistar í samræmi við lög um háskóla, nr. 7/1998.

7. gr.

Tekjur Tónlistarskóla Kópavogs byggjast á fjárveitingum opinberra aðila, svo sem Kópavogsbæjar, með hliðsjón af lögum nr. 75/1985 um fjárhagslegan stuðning við tónlistarskóla. Jafnframt innheimtir stofnunin skólagjöld af nemendum skólans til að standa að öðru leyti undir kostnaði af rekstri hans, ásamt öðrum tekjum sem skólanum kunna að áskotnast.

8. gr.

Löggiltur endurskoðandi skal valinn af stjórn skólans til eins árs í senn. Starfsár og reikningsár er frá 1. ágúst til 31. júlí.

9. gr.

Ákvörðun um niðurlagingu og breytingar á skipulagsskrá sjálfseiganarstofnunarinnar Tónlistarskóli Kópavogs skal tekin af stjórn hennar. Þarf atkvæði minnst fjögurra stjórnarmanna til að ákvörðun um niðurlagningu sé gild. Verði stofnunin lögð niður renna eignir hennar til Tónlistarhúss Kópavogs eftir að skuldir hafa verið greiddar.

Samþykktir um breytingar á skipulagsskrá sjálfseigarstofnunarinnar og um niðurlagningu hennar, svo og um veðsetningu eða sölu á fasteignum, skal bera undir dómsmálaráðherra í samræmi við lög nr. 19/1988.

10. gr.

Leita skal staðfestingar dómsmálaráðherra á skipulagsskrá þessari, sbr. lög um sjóði og stofnanir sem starfa samkvæmt staðfestri skipulagsskrá, nr. 19/1988.

Skipulagsskrá þessi kemur í stað samnefndrar skipulagsskrá, sem staðfest var 19. september 2001, nr. 732 í B-deild Stjórnartíðinda 2001.