Hljómsveitir nemenda

Í samræmi við aðalnámskrá tónlistarskóla leggur Tónlistarskóli Kópavogs áherslu á að nemendur hafi tækifæri til þátttöku í fjölbreyttum samleik, enda telur skólinn það einn grundvallarþáttinn í skólastarfinu. Hljómsveitarstarf er félagslega mikilvægt og til þess fallið að efla samkennd og tillitssemi, þroska eiginleika til samskipta og samstarfs, jafnframt því að styrkja ábyrgðartilfinningu og sjálfsvitund. Í slíku starfi gefst nemendum kostur á að kynnast tónbókmenntum umfram það sem unnt er í annarri kennslu innan skólans.

Strengjasveitir

Þegar nemendur á strokhljóðfæri hafa náð grundvallartökum á hljóðfæri sínu verður þátttaka í hljómsveitarstarfi hluti af náminu. Tvær strengjasveitir eru starfandi við skólann. Stjórnendur eru Anna Elísabet Sigurðardóttir og Vera Panitch.

Strengjasveit I er verið skipuð þeim nemendum sem hafa náð nægilegri færni til að leika í strengjasveit.

Strengjasveit II er skipuð þeim nemendum sem komnir eru lengra í náminu.

Kammersveit

Kammersveit skólans er skipuð þeim nemendum á strokhljóðfæri sem komnir eru lengst í námi sínu. Einnig taka aðrir nemendur skólans þátt í sveitinni eftir því sem verkefni gefa tilefni til. Stjórnandi sveitarinnar er Guðmundur Óli Gunnarsson.

Flautukór

Flautukór tónlistarskólans er skipaður vel á annan tug þverflautunemenda í framhaldsnámi. Sveitin kemur reglulega fram við ýmis tækifæri, bæði innan og utan skólans. Stjórnandi sveitarinnar er Pamela De Sensi.

.