Samstarf við skóla og stofnanir

Forskóli í grunnskóla

Skólaárið 2001-2002 hófst samstarf Tónlistarskólans og tveggja grunnskóla í Kópavogi, Kársnesskóla og Salaskóla, um forskólakennslu. Haustið 2003 bættist Lindaskóli í þennan hóp og haustið 2005 var tekið upp samstarf við Snælandsskóla. Samstarf skólanna felst í því að viðkomandi grunnskólar setja á fót forskólanám í tónlist sem skyldunámsgrein í samstarfi við og í faglegri umsjá Tónlistarskólans. Um er að ræða samþætt byrjendanám í tónlist, þ.m.t. nám í blokkflautuleik, og undirbúning fyrir frekara nám í hljóðfæraleik. Notað er námsefni sem Tónlistarskólinn hefur útbúið og skipulag kennslunnar er í samræmi við kröfur hans. Nemendur koma fram á tónleikum Tónlistarskólans í Salnum um jól og að vori.

Forskóli í húsnæði grunnskóla

Tónlistarskólinn hefur um árabil átt samstarf við nokkra grunnskóla í Kópavogi um forskólakennslu á vegum Tónlistarskólans í húsnæði grunnskóla. Skólaárið 2005-2006 er slíkt fyrirkomulag í gangi í Lindaskóla og í Kársnesskóla að loknu einu ári í skyldunámi.

Hljóðfærakennsla í húsnæði grunnskóla

Kennsla í hljóðfæraleik á vegum Tónlistarskólans fer fram í Kársnesskóla og Salaskóla. Þessi kennsla er skipulögð í framhaldi af samstarfi skólanna um forskólakennslu.

Mat tónlistarnáms í grunn- og framhaldsskólum

Nokkrir grunnskólar í Kópavogi meta nám við Tónlistarskóla Kópavogs til valgreina í efstu bekkjum grunnskóla. Þá geta framhaldsskólanemar fengið tónlistarnám við skólann metinn til eininga. Skólinn hefur m.a. átt samstarf við Menntaskólann í Kópavogi og Menntaskólann við Hamrahlíð um að útskrifa stúdenta af tónlistarbraut skólanna.

Salurinn

Það liggur í hlutarins eðli að samstarf Tónlistarskólans og Salarins er náið, enda eru þessar stofnanir undir sama þaki. Tónlistarskólinn hefur afnot af Salnum fyrir tónleika skólans, hljómsveitaræfingar og aðra starfsemi samkvæmt samkomulagi hverju sinni. Þá lætur skólinn Salnum í té kennslustofur til æfinga ef þörf krefur.