Tónlistarsérkennsla

Oft er þörf á að fara óhefðbundnar leiðir í tónlistarnámi þegar þarfir nemandans krefjast þess. Engir tveir nemendur eru eins, og við nálgumst tónlistina frá mismunandi hliðum út frá ólíkum forsendum og upplagi.

Í sértækri tónlistarkennslu er nálgun á viðfangsefnin og efnistökin sniðin að þörfum og getu hvers og eins nemanda. Sveigjanleiki og lausnamiðuð nálgun er þar í fyrirrúmi. Og líkt og í hefðbundnu tónlistarnámi er uppbyggjandi og eflandi iðkun og upplifun á tónlistinni ávallt höfð að leiðarljósi.

Notuð eru þau hljóðfæri sem henta hverju barni fyrir sig. Auk þess sem hreyfing, samhæfing, söngur, málörvun, samskipti og tjáskipti fléttast mögulega inn í sameiginlega tónlistariðkun nemandans og kennarans.
 
Kennsluna annast Inga Björk Ingadóttir. Inga Björk er músíkmeðferðarfræðingur og hefur áralanga reynslu í músíkmeðferð og sértækri tónlistarkennslu. Hún lauk námi í músíkmeðferð í Berlín árið 2006 og hefur síðan þá starfað við fagið þar úti, og svo hér á Íslandi frá árinu 2011. Hún er eigandi Hljómu í Hafnarfirði (www.hljoma.is) og sinnir einnig tónlistarsérkennslu í Tónlistarskóla Kópavogs og Tónlistarskóla Hafnarfjarðar.