Klarínetta

Að undanförnu hafa vinsældir þessa fjölhæfa hljóðfæris verið að aukast í skólanum. Klarínettufjölskyldan er stór, 12 hljóðfæri talsins. Langalgengast þessara hljóðfæra er B-klarínetta og á slík hljóðfæri er kennt í skólanum. Klarínettunemendum gefst kostur á að leika í blásarasveit skólans, sem og með öðrum hljóðfærum.

Námsmarkmið

Í aðalnámskrá tónlistarskóla er gerð grein fyrir þeim markmiðum sem nemendur eiga að hafa náð við lok grunnáms, miðnáms og framhaldsnáms á klarínettu.

Markmið í grunnnámi

Við lok grunnnáms er miðað við að klarínettunemendur hafi náð eftirfarandi markmiðum:

Nemandi

• beiti líkamanum á eðlilegan og áreynslulausan hátt þegar leikið er á hljóðfærið
• hafi náð eðlilegri og óþvingaðri munnsetningu
• beiti jöfnum og markvissum fingrahreyfingum
• hafi náð góðum grundvallartökum á tónmyndun á öllu tónsviðinu frá e til d'''
• hafi náð allgóðum tökum á þindaröndun
• hafi náð allgóðum tökum á inntónun
• geti leikið með greinilegum styrkleikabreytingum
• geti leikið bæði bundið og óbundið
• ráði yfir eðlilegri tungutækni miðað við þetta námsstig
• hafi tök á aukafingrasetningum fyrir h/fís'' (gaffall) og fís'

Nemandi

• hafi öðlast allgott hrynskyn
• geti lesið og leikið án undirbúnings verkefni sambærileg þeim sem fengist var við í fyrri hluta grunnnáms
• hafi þjálfast reglulega í að leika utanbókar
• hafi þjálfast reglulega í að leika eftir eyra
• hafi fengist við skapandi starf frá upphafi námsins
• hafi þjálfast í ýmiss konar samleik
• hafi farið yfir viðunandi fjölda verkefna
• hafi fengist við fjölbreytt úrval verkefna
• hafi þjálfast reglulega í leik tónstiga og hljóma samkvæmt þessari námskrá
• hafi undirbúið prófverkefni til flutnings á grunnprófi samkvæmt þessari námskrá

Nemandi sýni eftirfarandi atriði í þeim mæli sem eðlilegt getur talist eftir um það bil þriggja ára nám:

• tilfinningu fyrir túlkun og hendingamótun
• blæbrigði og andstæður
• þekkingu og skilning á stíl
• tilfinningu fyrir samleik
• öruggan og sannfærandi leik
• persónulega tjáningu
• viðeigandi framkomu

Markmið í miðnámi

Við lok miðnáms þurfa klarínettunemendur því að hafa náð eftirfarandi markmiðum:

Nemandi

• beiti líkamanum á eðlilegan og áreynslulausan hátt þegar leikið er á hljóðfærið
• hafi tileinkað sér eðlilega og vel þjálfaða munnsetningu
• beiti jafnri og lipurri fingratækni
• hafi náð góðum tökum á tónmyndun á öllu tónsviðinu frá e til g'''
• hafi náð góðum tökum á þindaröndun
• hafi náð góðum tökum á inntónun
• geti stillt hljóðfærið við annað hljóðfæri
• geti gert styrkleikabreytingar vel heyranlegar og andstæður augljósar
• geti gert greinilegan mun á legato og staccato
• ráði yfir allgóðri tungutækni bæði hvað varðar hraða og fjölbreytni í túlkun
• sé jafnvígur á notkun vinstri- og hægrihandarfingrasetninga
• geti beitt helstu trillufingrasetningum

Nemandi

• hafi öðlast gott hrynskyn
• geti lesið og leikið án undirbúnings verkefni sambærileg þeim sem fengist var við í fyrri hluta miðnáms
• geti tónflutt létt verkefni upp um heiltón, án undirbúnings
• hafi þjálfast reglulega í að leika utanbókar
• hafi þjálfast í ýmiss konar samleik
• hafi farið yfir viðunandi fjölda verkefna
• hafi fengist við fjölbreytt úrval verkefna
• hafi þjálfast reglulega í leik tónstiga og hljóma samkvæmt þessari námskrá
• hafi undirbúið prófverkefni til flutnings á miðprófi samkvæmt þessari námskrá

Nemanda hafi gefist kostur á að velja hvort og að hversu miklu leyti hann sinnir eftirfarandi atriðum:

• leik eftir eyra
• tónsköpun
• spuna

Nemandi sýni eftirfarandi atriði í þeim mæli sem eðlilegt getur talist eftir sjö til átta ára nám:

• tilfinningu fyrir túlkun og hendingamótun
• ýmis blæbrigði og andstæður
• þekkingu og skilning á stíl
• tilfinningu fyrir samleik
• öruggan og sannfærandi leik
• persónulega tjáningu
• viðeigandi framkomu

Markmið í framhaldsnámi

Við lok framhaldsnáms þurfa klarínettunemendur að hafa náð eftirfarandi markmiðum:

Nemandi

• beiti líkamanum á eðlilegan og áreynslulausan hátt þegar leikið er á hljóðfærið
• hafi tileinkað sér eðlilega og vel þjálfaða munnsetningu
• beiti lipurri og jafnri fingratækni og ráði yfir talsverðum hraða
• hafi náð tökum á öruggri og vel þroskaðri tónmyndun á öllu tónsviðinu frá e til b'''
• hafi náð mjög góðum tökum á þindaröndun
• hafi náð mjög góðum tökum á inntónun
• geti stillt hljóðfærið við annað hljóðfæri
• leiki hreint, kunni grip til lækkunar og hækkunar tóna og geti aðlagað inntónun í samleik
• ráði yfir víðu styrkleikasviði hvar sem er á tónsviði hljóðfærisins
• geti gert skýran mun á legato og staccato
• ráði yfir góðri tungutækni bæði hvað varðar hraða og fjölbreytni
• geti beitt öllum helstu auka- og trillufingrasetningum
• hafi kynnst flutter- og tvítungutækni og glissando

Nemandi

• hafi öðlast mjög gott hrynskyn
• geti lesið og leikið án undirbúnings verkefni sambærileg þeim sem fengist var við á miðprófi
• geti tónflutt einfaldar laglínur án undirbúnings upp um heiltón og upp og niður um hálftón
• hafi fengið reglulega þjálfun í að leika utanbókar
• hafi kynnst a.m.k. einum meðlim klarínettufjölskyldunnar öðrum en B- eða A-klarínettu
• hafi hlotið þjálfun í ýmiss konar samleik
• hafi farið yfir viðunandi fjölda verkefna
• hafi fengist við fjölbreytt úrval verkefna
• hafi þjálfast reglulega í leik tónstiga og hljóma samkvæmt þessari námskrá
• hafi undirbúið prófverkefni til flutnings á framhaldsprófi samkvæmt þessari námskrá
• hafi undirbúið efnisskrá til flutnings á tónleikum samkvæmt almennum hluta aðalnámskrár tónlistarskóla, bls. 41-42

Nemandi sýni með ótvíræðum hætti

• tilfinningu fyrir túlkun og hendingamótun
• margvísleg blæbrigði og andstæður
• þekkingu og skilning á stíl
• tilfinningu fyrir samleik
• öruggan og sannfærandi leik
• persónulega tjáningu
• viðeigandi framkomu